រឿង"៧ថ្ងៃ" ចំណាយទុនជិត ១០ម៉ឺនដុល្លារ ដាក់បញ្ចាំងផ្លូវការ

2015-03-05 21:38:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំទី១របស់ផលិតកម្ម Rich Kids Media ដែលអ្នកដឹកនាំអះអាងថា ចាយទុនដល់ជិត ១០ម៉ឺនដុល្លារនោះ ដល់វេលាចាក់បញ្ចាំងផ្លូវការហើយ ដោយបានបើកសម្ពោធយប់មិញនៅរោងភាពយន្ត Major Cineplex By Cellcard យប់មិញ។

តាម ចាន់ណា រ៉ូណាន អ្នកដឹកនាំរឿងម្នាក់ក្នុងចំណោមពីរជាមួយលោក ជ័យ រិទ្ធា អះអាងថា រឿង "៧ថ្ងៃ" របស់លោក បានចំណាយទុនសរុបអស់ប្រមាណ ៨ម៉ឺនដុល្លារ និងបានចំណាយពេលផលិតដល់ទៅជាងកន្លះឆ្នាំឯណោះ។ ប្រើទុនខ្ពស់ និងរយៈពេលវែងដូច្នេះ ដោយសារថា ផលិតកម្មចង់ចម្រាញ់យកគុណភាព ព្រោះនេះ ជាភាពយន្តដំបូងរបស់ Rich Kids Media ផង។

ជ័យ រិទ្ធា ជាគ្រូរបស់ រ៉ូណាន និងជាអ្នកដឹកនាំម្នាក់ក្នុងរឿងនេះដែរ មិននិយាយអះអាងពីគុណភាពមុនទេ ដោយទុកឲ្យប្រិយមិត្តទស្សនា និងវាយតម្លៃដោយខ្លួនឯង។ លោក គ្រាន់បញ្ជាក់ថា អ្វីគ្រប់យ៉ាង គឺធ្វើដោយសម្រិតសម្រាំងបំផុត ឯក្រុមការងារផលិតរបស់លោកទៀតសោតសុទ្ធតែមានសមត្ថភាពខ្ពស់ និងជំនាញពិតប្រាកដ។

“ខ្ញុំបានផ្ទេរចំណេះដឹងរបស់ខ្ញុំទៅសិស្សរបស់ខ្ញុំអស់ហើយ ហើយកូនសិស្សខ្ញុំទាំងពីរ ពួកគេសុទ្ធតែពូកែ ម្នាក់គឺជា អ្នកបច្ចេកទេសមានជំនាញច្បាស់លាស់ អីចឹងខ្ញុំហ៊ានធានាថា គុណភាពនៃបច្ចេកទេសកាត់តរបស់យើងឈានដល់ស្តង់ដារអន្តរជាតិ ឯកូនសិស្សខ្ញុំម្នាក់ទៀត រ៉ូណាន ផ្នែកសិល្បៈ ក៏សុទ្ធតែអ្នកមានទេពកោសល្យពិតប្រាកដ អីចឹងទេខ្ញុំអាចនិយាយថា ប្រិយមិត្តអាចទទួលយកបាន"។

អ្នកនិពន្ធ និងដឹកនាំរឿងបញ្ចប់ការសិក្សាពីបរទេសរូបនេះ បន្ថែមថា "៧ថ្ងៃ" មានគ្រប់រសជាតិ ពិសេសកំប្លែងសើចសប្បាយ និងបង្កប់ការអប់រំ ហើយសាច់រឿងប្រទាក់ក្រឡាបង្កប់អាថ៌កំបាំងជាច្រើន ហើយប្រិយមិត្តរកស្មានមិនត្រូវ។ ចំណុចនេះ លោកអះអាងទៀត មានខុសប្លែកដាច់ពីភាពយន្តខ្មែរផ្សេងៗទៀត។

ភាពយន្តខ្នាតធំរឿង "៧ថ្ងៃ" និយាយពីការដឹងខ្លួនរបស់ខ្មោចដែលស្លាប់ទៅហើយគម្រប់៧ថ្ងៃតាមការតំណាលតៗគ្នារបស់ចាស់ៗ។ អ្នកនិពន្ធ ចង់បង្ហាញពីកម្មពៀរពិតជាមានមែនលើលោកសន្និវាសយើងនេះ។ "កម្មពៀរពិតជាមានមែន ហើយមិនចាំដល់ជាតិក្រោយទេ គឺជាតិនេះតែម្ដង វានឹងសងមកយើងវិញ នេះជាសារសំខាន់ដែលយើងចង់បង្ហាញ។ ចាន់ណា រ៉ូណាន ថ្លែង។

Post by Rich Kids Media Co., Ltd.

នី មុន្នីនាថ ដែលសម្ដែងជាតួនាង មនោរថ ត្រូវជាភរិយានាយ យ៉ាន ថ្លែងដែរថា "៧ថ្ងៃ" គឺជារឿងនិយាយពីបាប បុណ្យ ក៏ដូចជាផលកម្ម ហើយសាច់រឿងលាក់អាថ៌កំបាំងពីដំណើររឿងបាបកម្មដែលយើងបានសាង។ នាថ អះអាងថា រឿងនេះ នឹងជាខ្សែភាពយន្តដ៏ល្អមើលមួយ។

"៧ថ្ងៃ" ចូលសម្ដែងដោយតារាល្បីៗ វ័យក្មេងស្អាតៗ និងតារាកំប្លែងជាច្រើន មានដូចជា នី មុន្នីនាថ សុទ្ធ ពេញបរមី ទេព រិនដារ៉ូ សុធា ពិសិដ្ឋ ប៊ូសាយ ខ្ញុង នាយ យ៉ាន និងតាចេក ជាដើម។ បន្ទាប់ពីបើកសម្ពោធយប់មិញនេះ ភាពយន្តមួយនឹងដាក់បញ្ចាំង Premiere ម្ដងទៀតល្ងាចនេះ នៅរោងភាពយន្ត Platinum Cineplex មុនពេលដាក់បញ្ចាំងគ្រប់រោងនៅរាជធានី៕