សហព័ន្ធទ្រីយ៉ាត្លុងត្រៀមកីឡាករ២រូបទៅស៊ីហ្គេមទាំងគ្មានសង្ឃឹម

2015-03-17 23:38:59
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាទ្រីយ៉ាត្លុងកម្ពុជាបានត្រៀមកីឡាករជម្រើសជាតិ២រូបដើម្បីចូលរួមប្រកួតក្នុងព្រឹត្តិការណ៍កីឡាស៊ីហ្គេម (Sea Games) នៅប្រទេសសិង្ហបុរីចាប់ពីថ្ងៃទី៦ ដល់ថ្ងៃទី ១៦ ខែមិថុនា ឆ្នាំ ២០១៥ ប៉ុន្តែពុំមានសង្ឃឹមទទួលបានលទ្ធផលល្អឡើយ។

លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានឲ្យដឹងថា កីឡាករកម្ពុជាពីររូបប៉ុណ្ណោះដែលត្រូវចូលរួមក្នុងព្រឹត្តិការណ៍ ស៊ីហ្គេម ឆ្នាំនេះគឺគីឡាករ ឈុន ប៊ុនថន និង ចេង ចាន់ដារ៉ា។

កីឡាករទាំងពីរ លោកបានប្រាប់ថា បានសម្រិតសម្រាំងអស់មួយឆ្នាំពេញដោយឆ្លងកាត់ការត្រួតពិនិត្យលើបួនវិញ្ញាសានៅក្នុងស្រុក គឺការប្រកួតថ្នាក់ជាតិ, C C អាក្វាត់ត្លុង , នួអាត្លុង និងទ្រីយ៉ាត្លុង។ ឆ្លងការប្រកួតទាំង៤វិញ្ញាសាមក កីឡាករ ឈុន ប៊ុនថន ជាប់លេខ ១ និង ចេង ចាន់ដារ៉ា ជាប់លេខ ២ ដែលតម្រូវឲ្យសហព័ន្ធជ្រើសរើសពួកគេទៅស៊ីហ្គេម។

លោក ងិន សុបញ្ញា លើកឡើងទៀតថា គោលការណ៍របស់សិង្ហបុរី គេអនុញ្ញាតឲ្យមានកីឡាករចូលរួមក្នុងប្រភេទកីឡាទ្រីយ៉ាត្លុងបុរស ២ នាក់ និងស្រី២ នាក់ ប៉ុន្តែដោយយោងតាមការមើលឃើញរបស់គណៈកម្មការរៀបចំការប្រកួតកន្លងមក បេក្ខនារីមិនមានសមត្ថភាពគ្រប់គ្រាន់ដើម្បីចូលរួមស៊ីហ្គេមឡើយសម្រាប់កម្ពុជា។

លោកនិយាយថា មិនសង្ឃឹមបានមេដាយឡើយ ព្រោះជាការហ្វឹកហាត់នៅក្រៅប្រទេសលើកទី១ ហើយក៏ជាចូលរួមស៊ីហ្គេមលើកទីមួយដែរសម្រាប់កីឡាទ្រីយ៉ាត្លុងរបស់កម្ពុជា។ បច្ចុប្បន្នក្រុមជម្រើសជាតិកម្ពុជាទាំងពីរនាក់កំពុងខិតខំហ្វឹកហាត់នៅប្រទេសថៃ។ កីឡាករបានចេញទៅហាត់នៅប្រទេសថៃតាំងពីដើមខែមិនាមកម្ល៉េះ តែមិនទាន់ច្បាស់សម្រាប់ការវិលត្រឡប់មកកម្ពុជាវិញទេ។

ក្នុងព្រឹត្តិការណ៍ស៊ីហ្គេមនេះ វិញ្ញាសាកីឡាទ្រីយ៉ាត្លុងតម្រូវឲ្យមាន៣ដំណាក់កាលគឺហែលទឹកសមុទ្រ១៥គីឡូម៉ែត្រ បន្តជិះកង់៤០ គីឡូម៉ែត្រ និងរត់១០ គីឡូម៉ែត្រថែមទៀត៕