ទ្រាំទ្រប្រាក់ខែបុគ្គលិកមិនរួច Yahoo បង្ខំចិត្តបិទទ្វារនៅចិន
- 2015-03-19 23:55:06
- ចំនួនមតិ 0 | ចំនួនចែករំលែក 0
ទ្រាំទ្រប្រាក់ខែបុគ្គលិកមិនរួច Yahoo បង្ខំចិត្តបិទទ្វារនៅចិន
ចន្លោះមិនឃើញ
ក្រុមហ៊ុន Yahoo នឹងគ្រោងបិទទ្វារមជ្ឈមណ្ឌលស្រាវជ្រាវ (Research Center) ក្នុងទីក្រុងប៉េកាំងប្រទេសចិន ដោយសារតែប្រាក់ខែបុគ្គលិកមានថ្លៃឈ្នួលខ្ពស់ពេក មិនអាចទ្រាំទ្របាន។
ប្រភពនៅក្រុមហ៊ុន Yahoo បានប្រាប់សារព័ត៌មាន SCMP ថា គម្រោងនៃការចង់បិទមជ្ឈមណ្ឌលស្រាវជ្រាវចោលព្រោះតែប្រាក់ខែបុគ្គលិកនៅចិនខ្ពស់ពេក គឺច្រើនជាងពីរដង បើធៀបនឹងឥណ្ឌា ហើយការផ្ដល់សេវាកម្មទៀតសោត គ្មានភាពច្បាស់លាស់។
ទោះបីជាយ៉ាងណា Yahoo បានឱ្យដឹងក្នុងសេចក្ដីថ្លែងផ្ទុយមតិខាងលើថា "ជុំវិញការបិទទ្វារនេះ យើងនឹងផ្លាស់ប្ដូរធនធាន ហើយបង្កើតការសហការ និងកំណែទម្រង់ឱ្យល្អប្រសើរ ក្នុងជំនួញរបស់យើង។ សព្វថ្ងៃយើងបានប្រាប់ បុគ្គលិកយើងនៅប៉េកាំងថា យើងនឹងបិទការិយាល័យនៅទីនោះ"។
ការិយាល័យមួយនេះ មានបុគ្គលិកប្រមាណជា៣៥០នាក់ ប៉ុន្តែគេមិនទាន់ដឹងថា បុគ្គលិកប៉ុន្មាននាក់ត្រូវបានបញ្ឈប់ ឬបញ្ឈប់ទាំងអស់ ឬយ៉ាងណាទេ។
ក្រុមហ៊ុនបម្រើសេវាកម្មលើផ្នែកអ៊ីនធឺណិត, កម្មវិធីកុំព្យូទ័រ និង Web search engine ខាងលើបន្ថែមថា ខ្លួននឹងពង្រឹងតួនាទីលើការិយាល័យមួយចំនួន "ការពង្រឹងនេះរួមបញ្ចូលទាំង ការិយាល័យធំនៅ Sunnyvale រដ្ឋកាលីហ្វញ៉ា សហរដ្ឋអាមេរិកផងដែរ។ បុគ្គលដែលប៉ះពាល់ នឹងទទួលបានការប៉ះប៉ូវ ដោយក្ដីគោរព និងយុត្តិធម៌"។
កាលពីឆ្នាំទៅមិញ ដើម្បីកាត់បន្ថយចំណាយ Yahoo បានបញ្ឈប់បុគ្គលិកមួយចំនួននៅ ឥណ្ឌា វៀតណាម ឥណ្ឌូណេស៊ី ម៉ាឡេស៊ី និងក្រោយមកទៀត នៅប្រទេសសិង្ហបុរី៕
ចុចអាន៖ Yahoo នឹងកាត់បន្ថយបុគ្គលិកចំនួន៤០០នាក់នៅឥណ្ឌា
ប្រែសម្រួល៖ អ៊ុំ សុភក្តិ ប្រភព៖ techcrunch