អ្នកចាត់ការថ្មីឆ្មាខ្មៅ នាឡិកានៅដៃស្ដាំ ទៅចង្អុលដៃឆ្វេង

2015-03-23 21:42:44
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Dick Advocaat អ្នកចាត់ការថ្មីក្រុមឆ្មាខ្មៅ Sunderland ភ្លេចខ្លួន ច្រឡំចង្អុលកដៃខាងឆ្វេង ដើម្បីប្រាប់អាជ្ញាកណ្ដាលឲ្យមើលម៉ោង ខណៈដែលលោកពាក់នាឡិកានៅដៃខាងស្ដាំសោះ។

អ្នកចាត់ការសញ្ជាតិហុល្លង់ ដែលទើបតែដឹកនាំក្រុមប្រកួតលើកដំបូង ក្នុងក្របខ័ណ្ឌ English Premier League រូបនេះ ធ្វើមិនបានល្អទេ ខណៈដែលប្រកួតលើកទី១ ចាញ់ក្រុម West Ham United ១-០ ទៅហើយ។

បន្ទាប់ពីខ្សែប្រយុទ្ធ Diafra Sakho ស៊ុតឲ្យក្រុមម្ចាស់ផ្ទះញញួរយក្ស West Ham នាំមុខ ១-០ នៅចុងម៉ោងនាទី៨៨ ក្រុមមួយនេះបានព្យាយាមលេងរបៀបអូសបន្លាយពេលវេលាយ៉ាងខ្លាំង ធ្វើឲ្យលោក Advocaat ទ្រាំមិនបាន ក៏លើកដៃចង្អុលនាឡិកា ដើម្បីជាសញ្ញាប្រាប់ដល់អាជ្ញាកណ្ដាលជួយមើលផងថា ម៉ោងជិតអស់ហើយ ប៉ុន្តែស្ថិតក្នុងកាលៈទេសៈ ដែលលោកមានសំពាធពីអ្នកគាំទ្រយ៉ាងខ្លាំងនោះ បែរភ្លេចខ្លួនវង្វេង អត់ដឹងថាខ្លួនឯងពាក់នាឡិកាដៃស្ដាំ ច្រឡំចង្អុលទៅកដៃខាងឆ្វេងទៅវិញ។

លោក Advocaat បានឡើងកាន់តំណែងអ្នកចាត់ការក្រុម Sunderland ដើម្បីជំនួសអ្នកចាត់ការចាស់ Gus Poyet ដែលត្រូវបានបណ្ដេញចេញ បន្ទាប់ពីប្រកួតចាញ់ Aston Villa ដល់ទៅ ៤-០ កាលពីថ្ងៃសៅរ៍សប្ដាហ៍មុន។

ងាកទៅមើលតារាងចំណាត់ថ្នាក់វិញ ក្រោយចាញ់ West Ham ១-០ កាលពីចុងសប្ដាហ៍មិញទៀត Sunderland ដូចជាយ៉ាប់យឺនបន្តិចហើយ ដោយឈរនៅលើក្រុមដែលស្ថិតនៅតំបន់កាត់ចោលតែ១លេខ និង១ពិន្ទុតែប៉ុណ្ណោះ៕

ចុចអាន៖ ខឹងអ្នកគាំទ្រខ្លួនឯងស្រែកចំអកឲ្យ Emenike ដោះអាវរត់ចេញតែម្ដង

ប្រែសម្រួល៖ វិន ជីវ័ន្ត ប្រភព៖ Metro