រស់នៅជិតបង្គោលអង់តែនទូរសព្ទ មានផលប៉ះពាល់សុខភាពមែនអត់?

2015-03-24 20:26:17
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នការកើនឡើងនូវចំនួនអ្នកប្រើប្រាស់ទូរសព្ទ ក៏ជំរុញឲ្យមានការពង្រីកតំបន់សេវាទូរសព្ទខ្លាំងណាស់ដែរ។ ដោយហេតុនេះហើយបានជាក្រុមហ៊ុនទាំងនោះបានបន្ថែមនូវសេវារបស់ខ្លួន ដោយបង្កើននូវចំនួនបង្គោលអង់តែន មិនថាទីក្រុង ឬជនបទនោះទេ។ តែការកើនឡើងនូវចំនួនបង្គោលអង់តែននេះក៏មានមតិជាច្រើនបានលើកឡើងពីការភ័យខ្លាចពីផលប៉ះពាល់នៃសារធាតុវិទ្យុសកម្ម ដែលចេញពីបង្គោលអង់តែនទូរសព្ទនេះដែរ។ ទាក់ទងទៅនឹងបញ្ហានេះមានការសិក្សាមួយចំនួនបានធ្វើការអះអាងទៅលើហេតុផលផ្សេងៗគ្នា។

តាមរយៈការសិក្សារទៅលើផលប៉ះពាល់បង្កដោយបង្គោលអង់តែនទូរសព្ទរបស់អង្គការ Mount Shasta Bioregional Ecology Center ក្នុងរដ្ឋកាលីហ្វញ៉ា សហរដ្ឋអាមេរិក ក៏ដូចជាតាមរបាយការណ៍មួយចំនួនផ្សេងទៀតបានឲ្យដឹងស្រដៀងគ្នាថា បង្គោលអង់តែនទូរសព្ទបានបង្កផលប៉ះពាល់ដល់សុខភាព និងខូចខាតដល់ប្រព័ន្ធកោសិការ ព្រមទាំង DNA របស់មនុស្ស។ មិនត្រឹមតែប៉ុណ្ណោះ វាក៏បង្កផលប៉ះពាល់ផ្សេងទៀតដូចជា បង្កឲ្យមានជម្ងឺមហារីក, ជម្ងឺមហារីកខួរក្បាល, ជម្ងឺធ្លាក់ទឹកចិត្ត, រលូតកូន, ជម្ងឺភ្លេចភ្លាំងច្រើន និងជម្ងឺផ្សេងៗជាច្រើនទៀត។

មិនត្រឹមតែមានផលប៉ះពាល់ដល់មនុស្សទេ តាមការសិក្សារទៅលើសត្វគោររបស់វេជ្ជបណ្ឌិត W. Lšscher របស់អាល្លឺម៉ង់ បានបង្ហាញឲ្យឃើញថា សត្វគោដែលរស់ជិតទៅបង្គោលអង់តែនទូរសព្ទរយៈពេល ២ឆ្នាំគឺបានចុះថយនៃការផលិតទឹកដោះ បូករួមទាំងការកើនឡើងនូវបញ្ហាសុខភាពនិងអាកប្បកិរិយាប្លែកពីធម្មតាថែមទៀតផង។

យ៉ាងណាមិញក៏មានការសិក្សាមួយចំនួនផ្សេងទៀតបានរកឃើញផ្ទុយទៅនឹងការសិក្សាបញ្ជាក់ខាងលើ។ ជាក់ស្ដែងតាមការបញ្ជាក់របស់ក្រុមហ៊ុនទូរសព្ទ និង រដ្ឋបាលផ្នែកអាហារ និងឱសថរបស់អាមេរិកបានអះអាងថា បង្គោលអង់តែនទូរសព្ទគឺមិនបានបង្កឲ្យមានផលប៉ះពាល់ដល់សុខភាពមនុស្ស ឬសត្វនោះទេ។ ហើយតាមការសិក្សាមួយចំនួនក៏បានគាំទ្រទៅនឹងការអះអាងនេះដែរ។

ជាមួយគ្នានេះដែរ តាមរបាយការណ៍ចេញដោយអង្គការសុខភាពពិភពលោក (WHO) កាលពីឆ្នាំ ២០០៦ បានបញ្ជាក់ឲ្យដឹងផងដែរថា គ្មានភស្ដុតាងជាក់លាក់ណាមួយបញ្ជាក់ថា រលកសញ្ញាប្រេកង់វិទ្យុដែលចេញពីបង្គោលអង់តែនទូរសព្ទបង្កឲ្យមានផលប៉ះពាល់ដល់សុខភាពនោះឡើយ។

បន្ថែមទៅទៀតនោះ វេជ្ជបណ្ឌិត Andrew Weil នៅសកលវិទ្យាល័យ Arizona បានពិនិត្យលើរបាយការណ៍ចេញដោយក្រុមព្រឹក្សារស្រាវជ្រាវជាតិ (NRC) ក្នុងឆ្នាំ ២០០៨ បានឲ្យដឹងថា របាយការណ៍ស្រាវជ្រាវនេះគឺមិនបានបញ្ជាក់ច្បាស់ថា បង្គោលអង់តែនទូរសព្ទ, អត់តែនទូរទស្សន៍ ឬ បង្គោលអង់តែនទំនាក់ទំនងដទៃផ្សេងទៀតផ្ដល់ផលប៉ះពាល់សុខភាពនោះឡើយ ហើយអ្នកវិទ្យាសាស្រ្តដែលធ្វើរបាយការណ៍នេះក៏មិនបានដឹងពីផលប៉ះពាល់សុខភាពច្បាស់លាស់នោះដែរ។ លើសពីនេះ គេមិនទាំងដឹងថា វានឹងបង្កឲ្យមានផលប៉ះពាល់ក្នុងរយៈពេល១០, ២០ ឬ ៣០ ឆ្នាំក្រោយនោះទេ។

ដូច្នេះរហូតមកដល់បច្ចុប្បន្ននេះ គឺមិនទាន់មានរបាយការណ៍ ឬ ការសិក្សាណាមួយបានបញ្ជាក់ច្បាស់ពីបញ្ហានេះទេ។ បើទោះបីជាយ៉ាងណាក៏ដោយ គេក៏មិនប្រាកដផងដែរថា ការរស់នៅកៀកទៅនឹងឧបករណ៍ទាំងនេះអាច ឬមិនអាចបង្កគ្រោះថ្នាក់ដល់សុខភាពរបស់មនុស្សនោះដែរ៕

អានបន្ត៖ ផលប៉ះពាល់នៃវិទ្យុសកម្ម មិនអាចមើលរំលង ការពារដោយរបៀបណា?

ប្រែសម្រួល៖ សំនៀង ប្រភព៖ eastcountymagazine, emfblues