ព្រោះ Tony Jaa ទើបរឿង “Furious 7” ត្រូវហាមបញ្ចាំងនៅថៃ

2015-03-28 00:19:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តវាយប្រហារ “Furious 7” ដែលនឹងបញ្ចាំងក្នុងប្រទេសថៃនៅទីថ្ងៃ១ ខែមេសាខាងមុខ ត្រូវបានតុលាការស៊ីវិលថៃ ហាមមិនឱ្យចាក់បញ្ចាំង ដោយសារតែមិនទាន់ដោះស្រាយជម្លោះកុងត្រា រវាងផលិតកម្មក្នុងស្រុក Sahamongkol Film International និង ចារភ្នំ យ៉ីរ៉ាំ ហៅ Tony Jaa ចប់នៅឡើយ។

ការហាមរបស់តុលាការ បានធ្វើឡើងកាលពីថ្ងៃព្រហស្បតិ៍ម្សិលមិញ ហើយវិធានការហាមនេះ ធ្វើដោយលោក Somsak "Sia Jiang" Techaratanaprasert ស្ថាបនិករបស់ក្រុមហ៊ុនខាងលើ។

ចារភ្នំ យ៉ីរ៉ាំ ឬកែងឆេះជង្គង់ហោះ ជាប់ចោទពីបទរំលោភលើកិច្ចសន្យា រយៈពេល១០ឆ្នាំជាមួយ Sahamongkol ដែលមានសុពលភាពដល់ឆ្នាំ២០២៣ តែលោកបែរជាទៅសម្ដែងឱ្យក្រុមហ៊ុនដទៃទៅវិញ។

ប្រភពពី Bangkokpost បានឱ្យដឹងថា ចុងចោទក្នុងករណីនេះមាន Tony Jaa, ផលិតកម្ម Universal Pictures និងក្រុមហ៊ុនចែកចាយ United International Pictures Far East Co។ ពាក់ព័ន្ធករណីរំលោភកិច្ចសន្យាខាងដើមបណ្ដឹង បានទារសំណង ១,៦ពាន់លានបាត (ប្រហែលជាង ៤៩លានដុល្លារអាមេរិក)។

លោក Suwat មេធាវីដើមចោទបាននិយាយថា ប្រាក់សងជំងឺចិត្ត គឺយកអាស្រ័យលើតម្លៃខ្លួន ចារភ្នំ ដែលផលិតកម្មថ្មីឱ្យ និងអាស្រ័យលើលុយចំណាយ ផ្សព្វផ្សាយរឿងផ្សេងៗទៀត ដែលធ្វើឱ្យតារារូបនេះល្បីឈ្មោះ។ មេធាវីរូបនេះបន្តថាកូនក្ដីរបស់លោក បានផ្ដល់ការចរចាដោយបើកចំហ ជាមួយភាគីជម្លោះ រួមទាំងអ្នកប្រតិបត្តិការ ខាងរោងភាពយន្តផងដែរ ហើយបើការចរចាត្រូវរ៉ូវគ្នា បណ្ដឹងអាចនឹងត្រូវដក។

ប្រព័ន្ធផ្សព្វផ្សាយក្នុងស្រុកមួយ បានដកស្រង់សម្ដីតារាកូនមួយវ័យ៣៨ឆ្នាំថា លោកមិនដែលភ្លេចផលិតកម្ម Sahamongkol ដែលជ្រោមជ្រែងអាជីពលោកទេ តែលោកត្រូវតែចាប់ឱកាស ដើម្បីបង្ហាញខ្លួនលើឆាកអន្តរជាតិ៕