តារាខ្មែរពីរដួង ឡើងព្រំក្រហមនៅជប៉ុន

2015-03-31 17:41:42
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាខ្មែរពីរដួងសុទ្ធជាតួសម្ដែងក្នុងរឿង "គ្រាប់ពេជ្រ" ឬ "GEMS ON THE RUN” គឺ Cheky និង វណ្ឌី ពិសិដ្ឋ បានឱកាសឡើងលើព្រំក្រហមនៅប្រទេសជប៉ុនថ្មីៗនេះ ក្នុងមហោស្រពភាពយន្ត Okinawa International Film Festival។

Cheky និង វណ្ឌ ពិសិដ្ឋ តួក្នុងរឿង "គ្រាប់ពេជ្រ" ទទួលការស្វាគមន៍ពីអ្នកគាំទ្រជនជាតិជប៉ុន

វត្តមានរបស់តារាសម្ដែងរបស់កម្ពុជាទាំងពីរនៅលើព្រំក្រហមក្នុងមហោស្រពភាពយន្តខាងលើនេះ គឺក្នុងនាមលោកទាំងពីរ ជាតួសម្ដែងក្នុងរឿង "គ្រាប់ពេជ្រ" ឬ "GEMS ON THE RUN" ដោយតបតាមការអញ្ជើញ ក្រោយភាពយន្តកំប្លែងខ្មែរល្បីមួយនេះ ត្រូវបានជ្រើសរើសជាភាពយន្តខ្មែរតែមួយគត់ក្នុងចំណោម៥ ឲ្យចូលរួមកម្មវិធី ស្របតាមពាក្យស្លោករបស់មហោស្រព "សើច និងសន្តិភាព"។

Cheky តារាខ្មែរម្នាក់ក្នុងចំណោមពីរនាក់ដែលបានទៅដល់មហោស្រពភាពយន្តនេះ ថ្លែងថា “បានដើរលើព្រំក្រហម ខ្ញុំមានអារម្មណ៍រស់រវើក និងរីករាយស្រស់ថ្លាខ្លាំងណាស់ ពិសេសបានឃើញអ្នកគាំទ្រជនជាតិជប៉ុន ស្គាល់យើង និងគាំទ្រយើង។ នោះគឺជាការគាំទ្រដ៏អស្ចារ្យ ប្រកបដោយភាពកក់ក្ដៅមួយ ពួកគេឲ្យតម្លៃយើងខ្លាំងណាស់!"។

តួកំប្លុកកំប្លែងរូបនេះ បញ្ជាក់ថា សារព័ត៌មានជប៉ុនក៏ចុះផ្សាយពីវត្តមានរបស់លោកទាំងពីរនៅជប៉ុនផងដែរ។ ក្រៅពីវត្តមានរបស់តារាសម្ដែងខ្មែរទាំងពីរដួង តារាភាពយន្តរបស់ប្រទេសផ្សេងទៀត ក៏មានវត្តមានលើកម្រាលព្រំក្រហមក្នុងមហោស្រពខាងលើដែរ មានដូចជា ថៃ កូរ៉េ ហុងកុង ឥណ្ឌូណេស៊ី និងតៃវ៉ាន់ជាដើម ក៏ទទួលបានឱកាសនេះដែរ។

Cheky និង វណ្ឌ ពិសិដ្ឋ កំពុងផ្ដល់ហត្ថលេខាអោយអ្នកគាំទ្រជនជាតិជប៉ុន

សម្រាប់តែភាពយន្តខ្មែរយើង ភាគីជប៉ុនបានពោលសរសើរលើចំនុចមួយចំនួន។ "ពួកគេសរសើរយើងថាធ្វើបានល្អ លើគុណភាពរូបភាព ដំណើររឿង និងការសម្ដែងរបស់តួយើង។ អ្វីដែលធ្វើឲ្យពួកភ្ញាក់ផ្អើលបំផុតនោះ គឺពួកគេថា ខ្ញុំជាមនុស្សថ្មីក្នុងឧស្សាហកម្មនេះ ប៉ុន្តែមើលទៅដូចពោរពេញដោយបទពិសោធន៍អីចឹង(សើច)!”។ Cheky ថ្លែង។

នាថ្ងៃម្សិលមិញនេះ ភាពយន្ត "គ្រាប់ពេជ្រ" ឬ "GEMS ON THE RUN” ត្រូវបានចាក់បញ្ចាំងជូនប្រជាជនជប៉ុនទស្សនា ដោយមានទស្សនិកជនជាច្រើនបានចូលទស្សនា ក្នុងនោះភាពយន្តត្រូវបានបញ្ចូលសំឡេងជាភាសាអង់គ្លេស និងបង្ហាញ Subtitle ជាភាសាជប៉ុន។ ប៉ុន្តែ តួសម្ដែងទាំងពីរ បានវិលត្រឡប់មកមាតុប្រទេសវិញហើយ ដោយបានមកដល់នៅវេលាម៉ោងប្រមាណ ១១:០០ យប់មិញនេះ៕