ទ្រីយ៉ាត្លុង បន្តហ្វឹកហាត់នៅថៃ ក្រោយដណ្ដើមបានមេដាយសំរឹទ្ធ១ គ្រឿង

2015-04-01 22:23:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាករជម្រើសជាតិទ្រីយ៉ាត្លុងកម្ពុជា (រត់+ហែលទឹក+ជិះកង់) ដែលមានគម្រោងចេញទៅហ្វឹកហាត់នៅប្រទេសថៃ រយៈពេលតែ ១ ខែ ដើម្បីត្រៀមចូលដណ្ដើមមេដាយក្នុងព្រឹត្តិការណ៍កីឡាស៊ីហ្គេម ឆ្នាំ ២០១៥ នៅប្រទេសសិង្ហបុរី ឥឡូវសម្រេចចិត្តបន្តហ្វឹកហាត់នៅទីនោះទៀត ឱ្យដល់ថ្ងៃចេញទៅប្រកួតតែម្ដង ក្រោយដណ្ដើមបានមេដាយសំរឹទ្ធ មួយគ្រឿង ក្នុងប្រកួតព្រឹត្តិការណ៍អន្តរជាតិកម្ដៅសាច់ដុំ។

កីឡាករ ចេង ចាន់ដារ៉ា ឈ្នះមេដាយសំរឹទ្ធ កាលពីថ្ងៃចុងសប្ដាហ៍កន្លងទៅ

កីឡាករ ចេង ចាន់ដារ៉ា របស់កម្ពុជា ដណ្ដើមបានមេដាយសំរឹទ្ធ ១ គ្រឿងពីព្រឹត្តិការណ៍ប្រកួតពានរង្វាន់ទ្រីយ៉ាត្លុង អន្តរជាតិ LMP international Triathlon Championship 2015 នៅប្រទេសថៃ វិញ្ញាសាលើអាយុ ២៩ ឆ្នាំ ដោយមានប្រកួត ហែលទឹកចម្ងាយ ១.៥ គីឡូម៉ែត្រ, ជិះកង់ចម្ងាយ ៤០គីឡូម៉ែត្រ និងរត់ចម្ងាយ១០ គីឡូម៉ែត្រ ។កាលពីចុងខែ មីនា កន្លងទៅ ខណៈលេខ ១ បានទៅកីឡាកររបស់ប្រទេសអ៊ូបេគីស្ថាន ហើយលេខ ២ បានទៅម្ចាស់ថៃ។

លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានថ្លែងអំណរគុណដល់លោកឧកញ៉ា គង់ ឬទ្ធីជព្វ ដែលចំណាយទឹកប្រាក់មិនតិចជាង ៣ ពាន់ដុល្លារក្នុងមួយខែ ក្នុងការចំណាយដល់ការហ្វឹកហាត់នៅក្រៅប្រទេសរបស់ក្រុមជម្រើសជាតិ។ លោកថាប្រទេសក្បែរខាងសរសើរដល់កីឡាករកម្ពុជា ដែលហ្វឹកហាត់ត្រឹមមួយខែ ប៉ុណ្ណោះ តែកម្រិតសមត្ថភាពកើនឡើងគួរឱ្យកត់សម្គាល់រហូតដណ្ដើមបានមេដាយក្នុងការប្រកួតកម្ដៅសាច់ដុំ។

លោកអគ្គលេខាធិការបន្តថា៖ «យើងមិនទាន់ហ៊ានថាសង្ឍឹមដណ្ដើមបានមេដាយនៅក្នុងកីឡាស៊ីហ្គេម នោះទេព្រោះពេលវេលានៃការហ្វឹកហាត់នៅខ្លីណាស់ តែយើងនឹងខិតខំប្រឹងប្រែងឱ្យអស់ពីសមត្ថភាព»។ សហព័ន្ធកីឡាទ្រីយ៉ាត្លុងកម្ពុជា បានសហការជាមួយក្រសួងអប់រំយុវជននិងកីឡា បញ្ជូនកីឡាករ ៤ រូប និង គ្រូបង្វឹកមួយរូបទៅហ្វឹកហាត់ នៅខេត្ត Rayong ជាប់មាត់សមុទ្រប្រទេសថៃ រយៈពេលមួយខែ គឺតាំងពីដើមខែ មីនា មកម៉្លេះ។ ក្រុមជម្រើសជាតិទាំង ៤ នាក់រួមមាន កីឡាករ ឈុន ប៊ុនថន, ចេង ចាន់តារ៉ា, សៃ សុភស និង នាង ពេជ្រពិសិដ្ឋ ក្រោមការបង្វឹកពីអ្នកស្រី សូ រ៉ាន់ដេត ជាគ្រូបង្វឹក។

តាមពិតសហព័ន្ធបានបង្ហាញបញ្ជីឈ្មោះកីឡាករចំនួន ២ រូបដែលនឹងបង្ហាញខ្លួនកីឡាស៊ីហ្គេមឆ្នាំនេះមាន គីឡាករ ឈុន ប៊ុនថន និង ចេង ចាន់ដារ៉ា៕

អត្ថបទ៖ ម៉ឺន រស្មី រូបថត៖ ផ្ដល់ឱ្យ