គួច ដានី រកក្លិបនៅជប៉ុនអត់បាន បន្តទៅប្រទេសនៅតំបន់អឺរ៉ុប

2015-04-03 17:47:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតខ្សែបម្រើស្លាបក្រុម Cambodian Tiger FC (ត្រាយអាស៊ីភ្នំពេញ) គួច ដានី នឹងបន្តស្វែងរកក្លិបថ្មីនៅម៉ាល់តាដែលជាប្រទេសកោះមួយនៅតំបន់អឺរ៉ុបភាគខាងត្បូង បន្ទាប់ពីចេញទៅរកនៅប្រទេសជប៉ុនមួយរយៈពេល ប៉ុន្តែមិនទាន់បានក្លិបណាមួយ ក្រោយចាកចេញពីក្លិប Cambodian Tiger FC។

បន្ទាប់ពីបានវិលត្រឡប់មកពីប្រទេសជប៉ុនកាលពីដើមសប្ដាហ៍នេះ គូច ដានី បានប្រាប់ Sabay ថា តាមគម្រោងលោកនឹងចាកចេញពីប្រទេសកម្ពុជាទៅប្រទេសម៉ាល់តាដើម្បីធ្វើតេស្តជាមួយក្លិបលីកអាជីពនៅទីនោះនៅថ្ងៃទី៥ ខែមេសា ឆ្នាំ ២០១៥ ខាងមុខនេះ។ ការធ្វើតេស្តនឹងចាប់ផ្តើមពីថ្ងៃទី៧ ខែមេសាដល់ថ្ងៃទី៣០ ខែឧសភា ឆ្នាំ ២០១៥។

គួច ដានី អាវខៀវ

ដានី បន្ថែមថា ប្រសិនបើធ្វើតេស្តជាប់បានលេងនៅទីនោះ លោកនឹងចាប់អាជីពបាល់ទាត់នៅប្រទេសម៉ាល់តា ១ ឬ ២ ឆ្នាំ។ ផ្ទុយទៅវិញប្រសិនបើធ្វើតេស្តធ្លាក់ លោកនឹងវិលត្រឡប់មកប្រទេសកម្ពុជាវិញ ក្រោយដឹងលទ្ធផលភ្លាមដើម្បីរកក្លិបលីកនៅកម្ពុជាឲ្យទាន់ពេលមុនលីកកំពូលកម្ពុជាចាប់ផ្តើម។

កីឡាករកូនកាត់ខ្មែរ-បារាំងលើកឡើងទៀតថា សម្រាប់ក្លិបនៅកម្ពុជាមាន៤ដែលរូបគេចង់លេងគឺបឹងកេតអង្គរ, ភ្នំពេញក្រោន,ស្វាយរៀងនិង ណាហ្គាវើល ប៉ុន្តែរូបគេចង់សាកល្បងប្រកបអាជីពនៅក្រៅប្រទេសដើម្បីបង្កើនបទពិសោធន៍ និងបច្ចេកទេសថ្មីៗស្របតាមបាល់ទាត់សម័យទំនើប។

កាលពីដើមខែកុម្ភៈ គួច ដានី បានចេញទៅប្រទេសជប៉ុនដើម្បីស្វែងរកក្លិបក្រុមបាល់ទាត់ហ៊្វូតសាលដែលជាសមាជិកលីកអាជីពជប៉ុន ក្រោយកិច្ចសន្យារបស់ខ្លួនជាមួយក្លិបត្រាយអាស៊ីបានបញ្ចប់ ប៉ុន្តែនៅប្រទេសជប៉ុនមិនអាចរកបានឡើយ។

កីឡាករកូនកាត់ខ្មែរ-បារាំងរូបនេះមានប្រភពដើមចេញមកពីបាល់ទាត់ហ្វូតសាលរហូតជាប់ក្នុងឈុតក្រុមជម្រើសជាតិហ៊្វូតសាលរបស់បារាំងអាយុក្រោម២១ឆ្នាំ (U-21) មុនធ្វើដំណើរមកកាន់ប្រទេសកម្ពុជាលេងឲ្យក្លិបត្រាយអាស៊ី៕