ប៉ូលិស ឈ្នះពានវ័យចាស់ឆ្នាំ ២០១៥ ម្សិលមិញ

2015-04-10 16:21:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់វ័យចាស់កម្ពុជា ឆ្នាំ ២០១៥ (CVFA veterans cup 2015) បានធ្លាក់ទៅលើក្រុមអគ្គស្នងការដ្ឋាននគរបាលជាតិ (ប៉ូលិស) ក្រោយប្រកួតឈ្នះក្រុមក្រសួងការពារជាតិ (ទ័ព) នៅវគ្គផ្ដាច់ព្រ័ត្រ រសៀលម្សិលមិញ លើវាលស្មៅស្ដាតចាស់។

ក្រុមប៉ូលិសលើកពាន

លទ្ធផលនៅថ្ងៃប្រកួតផ្ដាច់ព្រ័ត្រម្សិលមិញមាន៖

ជើងឯក៖ ប៉ូលិស ១ – ០ ទ័ព លេខ៣៖ ស្វាយរៀង ២ – ២ (ប៉េណាំងទី ៥ – ៤ ) ណាហ្គា Fair Play៖ ស្វាយរៀង

លោក ប្រាក់ សុមុន្នី គ្រូបង្វឹកក្រុមវ័យចាស់ប៉ូលិស បានលើកឡើងថា មុនឈ្នះជើងឯកនេះក្រុមលោកធ្លាប់បានហ្វឹកហាត់ជុំគ្នាប្រហែលជាជាង ៣ ខែមកហើយតែមិនជាប្រចាំនោះទេ។ លោកថាកីឡាកររបស់លោកទាំងអស់សុទ្ធតែចេះលេងបាល់ដូចៗគ្នា តែឃ្លាតចេញពីពិភពបាល់ទាត់យូរឆ្នាំ ហើយកម្លាំងក៏មិនដូចមុនដែរ។

លោក អ៊ូ រតនា អគ្គលេខាធិការសមាគមវ័យកីឡាបាល់ទាត់ចាស់កម្ពុជា បានលើកឡើងថា ការប្រកួតពានរង្វាន់នេះមានក្លិបចូលរួមចំនួន ៤ ដើម្បីផ្ដល់ឱកាសឱ្យកីឡាករចាស់ៗ តាមក្លិបនីមួយបានជួបគ្នាលើទីលាន ក្នុងគោលបំណងរក្សាចំណងមិត្តភាព សាមគ្គីភាព និង ចូលរួមអបអរសាទរពិធីបុណ្យចូលឆ្នាំប្រពៃណីខ្មែរ។ឆ្លងកាត់ការប្រកួតកន្លងមកលោកសង្កេតឃើញកីឡាករទាំងអស់មាន បច្ចេកទេស នៅល្អដដែល ប៉ុន្ដែកម្លាំងធ្លាក់ចុះបន្តិច។

លោក រិទ្ធ ឌីកា ប្រធានសមាគមកីឡាបាល់ទាត់វ័យចាស់កម្ពុជា ធ្លាប់លើកឡើងថា ក្រៅពីប្រកួតគ្នាក្នុងស្រុក ក្រុមវ័យចាស់កម្ពុជាក៏មានគម្រោងប្រកួតជាលក្ខណៈអន្តរជាតិជាមួយប្រទេសក្នុងតំបន់នាពេលខាងមុខផងដែរ។

សមាគមវ័យកីឡាបាល់ទាត់ចាស់កម្ពុជា បានផ្ដល់លិខិតសរសើរដល់អតីតកីឡាករបាល់ទាត់ គ្រូបង្វឹក និង អ្នកមានស្នាដៃក្នុងវិស័យបាល់ទាត់ កាលពីជំនាន់មុនចំនួន ១៩ នាក់ ជាលើកទឹកចិត្ត និង ដឹងគុណ ផងដែរ។

ដំណាលគ្នានេះហាងលក់សម្ភារៈកីឡា Home Sport បានលក់អាវរៃអង្គាសប្រាក់ក្នុងអំឡុងការប្រកួតបានចំនួន ៤២៤ ដុល្លារ និងលុយខ្មែរចំនួន ១.៨៨៦.៤០០ រៀល ស្របពេលលោក ខៀវ សាម៉េត តំណាងសហព័ន្ធកីឡាបាល់ទាត់កម្ពុជា បានបន្ថែមទឹកប្រាក់ចំនួន ៥០០ ដុល្លារ ទៀត ដើម្បីផ្ដល់ជូនដល់មន្ទីរពេទ្យគន្ធបុប្ផា៕