Jeanette Aw ឈ្នះពានកំពូលតារាសិង្ហបុរី នៅកម្ពុជា ម៉ាឡេស៊ី និងឥណ្ឌូណេស៊ី

2015-04-20 19:11:44
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងសិង្ហបុរី Jeanette Aw បានឈ្នះពានរង្វាន់ធំជាងគេ រួមទាំងពានរង្វាន់ដទៃទៀតសរុប ៦ពាន ពីកម្មវិធី Star Awards 2015 Show 1 ដែលបានរៀបចំនៅមហោស្រពស្ថានីយទូរទស្សន៍ MediaCorp កាលពីថ្ងៃអាទិត្យ។

សារព័ត៌មាន Channel News Asia បានចុះផ្សាយថា ពានរង្វាន់ទាំង ៦ដែល តារាវ័យ ៣៥ឆ្នាំរូបនេះ បានឈ្នះ រួមមានពានរង្វាន់តួសម្ដែងស្រីពេញនិយម, ពានរង្វាន់គូស្នេហ៍ក្នុងភាពយន្ត, ពានរង្វាន់បណ្ដាញសង្គម រួមជាមួយពានរង្វាន់ប្រជាប្រិយភាពតាមតំបន់ចំនួន ៣ប្រទេសរួមមានប្រទេសកម្ពុជា ប្រទេសម៉ាឡេស៊ី និងប្រទេសឥណ្ឌូណេស៊ី។

បន្ទាប់ពីចប់កម្មវិធី តារាល្បីក្នុងរឿង "ជីវិតនាងនូយ៉ា" រូបនេះបានផ្ដល់សម្ភាសន៍ជាមួយអ្នកសារព័ត៌មាន ដោយបានអរគុណអ្នកគាំទ្រទាំងអស់ដែលបានស្រឡាញ់ចូលចិត្ត និងបោះឆ្នោតឲ្យនាង និងបានសម្ដែងការព្រួយបារម្ភចំពោះអ្នកគាំទ្រមួយចំនួនដែលនិយាយថា ពួកគេនឹងសម្លាប់ខ្លួនប្រសិនបើនាងមិនបានឈ្នះពានរង្វាន់ធំ។ Jeanette និយាយថា នាងមិនចង់ចូលរួមកម្មវិធីពានរង្វាន់ដែលជ្រើសរើសតាមការបោះឆ្នោតទៀតទេ ព្រោះខ្លាចមានរឿងបែបនេះកើតឡើងនៅថ្ងៃក្រោយ។

នាងបានបន្ថែមថា អ្វីដែលសំខាន់សម្រាប់នាងគឺមិនមែនការឈ្នះពានរង្វាន់នោះទេ ប៉ុន្តែគឺដើម្បីបំពេញបំណងរបស់អ្នកគាំទ្រ និងបន្តបង្កើតអ្វីដែលថ្មីៗដើម្បីបម្រើអារម្មណ៍ទស្សនិកជនតែប៉ុណ្ណោះ។

តារាសម្ដែង Zhang Zhen Huan ដែលឈ្នះពានរង្វាន់គូស្នេហ៍ក្នុងភាពយន្តជាមួយ Jeanette ក៏បានឈ្នះពានរង្វាន់តួសម្ដែងប្រុសពេញនិយមដែរ សម្រាប់ការសម្ដែងរឿង "ព្យុះបាល់ក្រោមជើង"។

បន្ទាប់ពីកម្មវិធី Star Awards Show 1 កម្មវិធី Star Awards Show 2 នឹងត្រូវរៀបចំនៅថ្ងៃទី២៦ ខែមេសា នៅទីកន្លែងដដែល សម្រាប់ការប្រកាសពានរង្វាន់ផ្នែកសម្ដែង រួមទាំងពានរង្វាន់កំពូលតារាទាំង ១០រូប។ នេះគឺជាឆ្នាំចុងក្រោយហើយដែលកម្មវិធីពានរង្វាន់ប្រចាំឆ្នាំទាំងពីរនេះត្រូវរៀបចំនៅស្ថានីយទូរទស្សន៍ MediaCorp ដែលជាអ្នករៀបចំកម្មវិធីនេះដំបូងតាំងពីឆ្នាំ១៩៩៤។ នៅឆ្នាំក្រោយកម្មវិធីនេះ នឹងត្រូវផ្ទេរឲ្យក្រុមហ៊ុន Mediapolis ជាអ្នករៀបចំ។