តារាបាល់ទាត់កម្ពុជាដ៏លេចធ្លោ៥រូបប្រចាំឆ្នាំ២០១៥

2015-04-21 15:00:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លទ្ធផលគួរជាទីមោទនៈសម្រាប់ក្រុមបាល់ទាត់ជម្រើសជាតិកម្ពុជាពីយុទ្ធនាការជម្រុះបាល់ទាត់ពិភពលោកឆ្នាំ២០១៨នៅប្រទេសរុស្ស៊ីជុំទីមួយកាលពីខែមុនបានកើតឡើងដោយសារកម្លាំងសាមគ្គី និងខិតខំប្រឹងប្រែរបស់ក្រុមទាំងមូលទើបបានជាផ្តល់ឱកាសឲ្យកម្ពុជាឆ្ពោះទៅដំណាក់កាលទីពីរជាបន្តទៀត។

ប៉ុន្តែមានកីឡាករបាល់ទាត់កម្ពុជាមួយចំនួនទទួលបានការចាប់អារម្មណ៍ខ្លាំងពីមហាជន ក៏ដូចជាលេចធ្លោជាងគេនៅដើមឆ្នាំ២០១៥នេះ។ Sabay សូមបង្ហាញកីឡាករ៥រូបដែលទទួលបានការចាប់អារម្មណ៍ខ្លាំងនៅដើមឆ្នាំ២០១៥។

ទី១- ចាន់ វឌ្ឍនាកា

ចាន់ វឌ្ឍនាកា ជាកីឡាករវ័យក្មេងលេចធ្លោ និងទទួលបានការចាប់អារម្មណ៍ខ្លាំងតាំងពីឆ្នាំ២០១២ បន្ទាប់ពីកីឡាកររូបនេះឈ្នះពានជាកីឡាករឆ្នើមប្រចាំឆ្នាំ។ ឆ្នាំបន្តបន្ទាប់ កីឡាករដែលមានដើមកំណើតខេត្តកំពតរូបនេះនៅតែធ្វើបានល្អគួរឲ្យកត់សំគាល់ទាំងនៅក្រុមជម្រើសជាតិ និងក្រុមបឹងកេត។ អ្វីដែលពិសេសនោះនៅឆ្នាំ២០១៥នេះ ចាន់ វឌ្ឍនាកា បានបង្ហាញទម្រង់លេងយ៉ាងអស្ចារ្យដោយបានជួយក្រុមជម្រើសជាតិកម្ពុជាឈ្នះម៉ាកាវ៣-០ ក្នុងដីដែលរូបគេរកបាន២គ្រាប់ម្នាក់ឯង។ លើសពីនេះទៀត នៅយុទ្ធនាការជម្រុះ U-23 AFC Championship 2016 កូនប្រុសរបស់ប្រធានមន្ទីរកសិកម្មខេត្តកំពតរូបនេះរកបាន២គ្រាប់នៅពេលកម្ពុជាឈ្នះហ្វីលីពីន៣-១។

ទី២- ប្រាក់ មុន្នីឧត្តម

តារាបាល់ទាត់រូបសង្ហា ប្រាក់ មុន្នីឧត្តមក៏មិនធម្មតាដែរសម្រាប់ដើមឆ្នាំ២០១៥នេះដោយរូបគេបានជួយក្រុមខេត្តស្វាយរៀងឈ្នះពានរង្វាន់សម្តេច ហ៊ុន សែន ឆ្នាំ២០១៥ និងជួយក្រុមកម្ពុជាបានឆ្លងទៅជុំទីពីរនៃយុទ្ធនាការជម្រុះ World Cup ឆ្នាំ២០១៨។ ខ្សែប្រយុទ្ធមុតស្រួចរូបនេះបានក្លាយជាកីឡាកររកគ្រាប់បាល់បានច្រើនជាងគេសម្រាប់ព្រឹត្តិការណ៍ Hun Sen Cup ឆ្នាំ២០១៥ ស្របពេលក្រុមរបស់គេឈ្នះពាននេះ។ ថ្វីត្បិតនៅឈុតធំជម្រើសជាតិកម្ពុជា ប្រាក់ មុន្នីឧត្តមមិនទម្លាយសំណាញ់ទីរបស់ម៉ាកាវ ប៉ុន្តែរូបគេដើរតួនាទីដ៏សំខាន់ផងដែរ។ អ្វីដែលអ្នកគាំទ្រចាប់អារម្មណ៍ខ្លាំងមួយទៀតនោះគឺនៅពេលកីឡាកររូបនេះទាត់បាល់ហ្វ្រីឃីកចូលទីម្ចាស់ផ្ទះថៃបានយ៉ាងល្អនៅពេល U-22 កម្ពុជាចាញ់ថៃ២-១ នៃយុទ្ធនាការជម្រុះ U-23 AFC Championship 2016 ស្របពេលដែលរូបគេដើរតួនាទីជាប្រធានក្រុម។

ទី៣-ឃួន ឡាបូរ៉ាវី

ថ្វីត្បិតវ័យកាន់តែច្រើន និងមានប្រពន្ធកូនដែលខុសពី ចាន់ វឌ្ឍនាកា និងប្រាក់ មុន្នីឧត្តមដែលនៅលីវ ក៏ឃួន ឡាបូរ៉ាវីទទួលបានការចាប់អារម្មណ៍ខ្លាំង និងលេចធ្លោដែរសម្រាប់ដើមឆ្នាំ២០១៥នេះ។ ខ្សែប្រយុទ្ធមុតស្រួចរបស់ក្លិបបឹងកេតអង្គររូបនេះបានទម្លាយសំណាញ់ទីរបស់ម៉ាកាវបាន១គ្រាប់នៅពេលក្រុមកម្ពុជាបានឈ្នះក្នុងដីខ្លួនឯងដោយលទ្ធផល ៣-០ និងបានជួយឲ្យក្រុមកម្ពុជាស្មើម៉ាកាវ១-១នៅលើទឹកដីរបស់ម៉ាកាវ។ សម្រាប់ការប្រកួតរបស់ឈុតធំកម្ពុជា ឡាបូរ៉ាវីបានបំពេញភារកិច្ចជាប្រធានក្រុមថែមទៀត។

ទី៤- ធារី ចន្ថាប៊ីន

ធារី ចន្ថាប៊ីនមិនបានជាប់ជម្រើស១១នាក់ដំបូងទេនៅពេលក្រុមកម្ពុជាបានយកឈ្នះម៉ាកាវ៣-០ នៅក្នុងដីរបស់ខ្លួន ប៉ុន្តែបានជាប់ជម្រើស១១នាក់ដំបូងនៅពេលក្រុមកម្ពុជាធ្វើដំណើរទៅលេងនៅទឹកដីម៉ាកាវវិញម្តង។ នៅទឹកដីម៉ាកាវដែលមានអ្នកគាំទ្រកម្ពុជាតិចតួច តារារូបនេះធ្វើឲ្យអ្នកគាំទ្រកម្ពុជាចាប់អារម្មណ៍ខ្លាំង។ កីឡាករកូនកាត់ខ្មែរ-បារាំងម្នាក់នេះបានទាត់បាល់ហ្វ្រីឃីកចូលទីម៉ាកាវយ៉ាងល្អនៅលើទឹកដីរបស់ម្ចាស់ផ្ទះ ប៉ុន្តែចប់ការប្រកួតកម្ពុជាស្មើម្ចាស់ផ្ទះម៉ាកាវ១-១។ បន្ទាប់ពីចប់ការប្រកួត សមាជិកភ្នំពេញក្រោនរូបនេះបានរៀបរាប់ថា ៖«យើងធ្វើបានហើយ ប្រវត្តិសាស្ត្រថ្មីក្នុងវិស័យបាល់ទាត់ខ្មែរ។ សម្រាប់ខ្ញុំ នេះជាពេលដ៏ពិសេសបំផុត ហើយជាការប្រកួតដំបូងរបស់ខ្ញុំជាមួយក្រុមជម្រើសជាតិឈុតធំ និងជាគ្រាប់បាល់ដ៏រំភើបបំផុតទីមួយដែលរយៈពេល៣ឆ្នាំហើយដែល ខ្ញុំមិនធ្លាប់ទាត់ហ្វ្រីឃីកចូលទីឡើយ»។

ទី៥- អ៊ុំ សិរីរ័ត្ន

អ៊ុំ សិរីរ័ត្ន (កណ្តាល)

ពីមុនអ្នកគាំទ្របាល់ទាត់ជម្រើសជាតិកម្ពុជាមិនសូវស្គាល់មុខ និងចាប់អារម្មណ៍អ្នកចាំទីរបស់ក្លិបក្រសួងការពារជាតិ អ៊ុំ សិរីរ័ត្នឡើយ។ ទើបតែដើមឆ្នាំ២០១៥នេះទេដែលមហាជនជាអ្នកស្នេហាវិស័យបាល់ទាត់ខ្មែរចាប់អារម្មណ៍នឹងរូបគេនោះ។ អ្នកចាំទីវ័យក្មេងរូបនេះបានស្នងតំណែងរបស់បងប្រុសគឺ អ៊ុំ វិចិត្រសម្រាប់ក្រុមទ័ព និងជម្រើសជាតិកម្ពុជា។ អ្នកគាំទ្រខ្មែរស្ទើរតែភ្ញាក់ផ្អើលនៅពេលឃើញគ្រូបង្វឹកជម្រើសជាតិកម្ពុជាសញ្ជាតិកូរ៉េខាងត្បូងបានជ្រើសរើសយករូបគេជាជម្រើសទីមួយទាំងឈុតធំ និងឈុតU-22 កម្ពុជាសម្រាប់យុទ្ធនាការជម្រុះ World Cup 2018 និង U-23 AFC Championship 2016។ ការបង្ហាញខ្លួនឲ្យក្រុមជម្រើសជាតិទាំងឈុតធំ និងឈុតU-22 កម្ពុជានេះហើយដែលធ្វើឲ្យរូបគេត្រូវបានមហាជនស្គាល់ច្រើននោះ៕

អត្ថបទ៖ ជាន ចាន់រ៉ា

ពាក្យទាក់ទង

អត្ថបទសំខាន់ ក្រុមកីឡាបាល់ទាត់ជម្រើសជាតិកម្ពុជា

អត្ថបទពេញនិយម

ដំណើរជីវិត អ៊ុងអ៊ីង នាយករដ្ឋមន្រ្តីវ័យក្មេងបំផុត ក្នុងប្រវត្តិសាស្រ្ត របស់ប្រទេសថៃ

ពីអាគារចាស់ សល់ពី សម័យប៉ុល ពត ក្លាយទៅជាភូមិគ្រិះ ព័ទ្ធដោយសួនធម្មជាតិ យ៉ាងមនោរម្យ!

កាន់តែទាក់ទាញ ទេសចរណ៍នៅសៀមរាប ម៉តូធំអូសរម៉កបំពាក់បាសធំៗត្រៀមជូនភ្ញៀវដើរលេងកម្សាន្ត

កម្ពុជា ជាទីផ្សារនាំចេញប្រេងឥន្ធនៈធំបំផុតទី២ របស់ប្រទសថៃ

ក្រសួងប្រៃសនីយ៍ និងទូរគមនាគមន៍ ជូនដំណឹងស្ដីពីកំណើនឡើង ការវាយប្រហារសាយប័រ

រូបចម្លាក់ “ព្រះមហាក្សត្រ ព្រះបាទជ័យវរ្ម័នទី៧ ប្រយុទ្ធជាមួយតោ” ដាក់តាំង នៅ Garden by the Bay ដ៏ល្បីល្បាញ នៅសិង្ហបុរី

អត្ថបទថ្មី

សារមន្ទីររាងគ្រាប់មីន PMN-2 ធំជាងគេនៅលើពិភពលោក នឹងលេចរូបរាងនៅកម្ពុជា ឆាប់ៗនេះ

ស្រ្តីទី១ កម្ពុជា ទទួលពានរង្វាន់ បុគ្គលឆ្នើមក្នុងវិស័យថែទាំសុខភាពសង្គម នៅ សិង្ហបុរី

ធនាគារកណ្តាលថៃ កាត់បន្ថយអត្រាការប្រាក់ ដើម្បីជួយដល់សេដ្ឋកិច្ច ដែលកំពុងធ្លាក់ចុះ

កងទ័ពថៃ បំពានបទឈប់បាញ់ ដោយដាក់បន្លាលួស នៅព្រំដែនអានសេះ ក្នុងខេត្តព្រះវិហារ

ផ្លូវ Walk Street ចតុមុខ ដាក់ចេញច្បាប់ ហាមឃាត់ការជក់បារីគ្រប់ប្រភេទ!

ចិន គាំទ្រ កម្ពុជា និងថៃ ក្នុងការដោះស្រាយជម្លោះព្រំដែន ឈានទៅស្តារទំនុកចិត្តឡើងវិញ