ពេជ្រមួយគ្រាប់ដាក់ដេញថ្លៃត្រឹម៣នាទី បានជាង២០លានដុល្លារ

2015-04-22 23:03:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេជ្រទម្ងន់១០០ការ៉ាត់ ដែលបានដាក់ដេញថ្លៃនៅឯក្រុមហ៊ុន Sotheby's នាទីក្រុងញូវយ៉ក សហរដ្ឋអាមេរិក អាចលក់បានដល់ទៅ២២,១លានដុល្លារ។ រឹតតែអស្ចារ្យជាងនេះទៅទៀត គឺការដេញថ្លៃតាមអនឡាញទូទាំងពិភពលោកនោះ គឺត្រឹម៣នាទីប៉ុណ្ណោះ។

ពេជ្រមួយគ្រាប់នេះត្រូវបានជីករកឃើញដោយក្រុមហ៊ុនគ្រឿងអលង្ការ Dee Beers ក្នុងប្រទេសអាហ្វ្រិកខាងត្បូង ដែលដំបូងឡើយវាមានទម្ងន់ដល់ទៅជាង២០០ការ៉ាត់ និងចំណាយពេលអស់ប្រហែល១ឆ្នាំដើម្បីច្នៃជាពេជ្រមានតម្លៃនេះឡើង។

បើតាមម្ចាស់ពេជ្រនេះបានឲ្យដឹងថា វាត្រូវបានគេសិក្សាជាច្រើនខែមុននឹងច្នៃ។ គ្រាប់ពេជ្រនេះ បានទទួលការចាប់អារម្មណ៍ជាច្រើនតាមរយៈទំហំរបស់វា ហើយអ្នកស្រី Lisa Hubbard ដែលជាប្រធានចែកចាយរបស់ក្រុមហ៊ុន Sotheby's ប្រចាំអាមេរិកខាងជើង និងត្បូង បាននិយាយថា៖ "វាមានអ្វីៗជាច្រើនដែលអ្នកចង់បានពីគ្រាប់ពេជ្រ ជាមួយរូបរាងច្នៃពិសេសដែលតម្លៃរបស់វាក៏មានទៅតាមនោះដែរ"។

សម្រាប់ត្បូងពេជ្រ ភាគច្រើនគឺកម្រមានទំហំធំណាស់ ហើយកាលពីឆ្នាំ២០១៣ មកមានត្បូងពេជ្រមួយគ្រាប់ទម្ងន់១១៨ការ៉ាត់ត្រូវបានដាក់លក់នៅទីក្រុងហុងកុងតាមរយៈក្រុមហ៊ុន Sotheby's ដែលមានតម្លៃដល់ទៅ៣០.៦លានដុល្លារ៕