បញ្ចប់ពានរង្វាន់បាល់ទាត់កម្រិតយុវជនជាង ៣៣ ក្រុមនៅខណ្ឌដង្កោ

2015-04-29 17:01:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់បាល់ទាត់កម្រិតយុវជន ដែលមានក្រុមចូលរួមចំនួន ៣៣ ក្រុមចែកជា ៣ កម្រិតអាយុ រៀបចំឡើងដោយកងរាជអាវុធហត្ថរាជធានីភ្នំពេញ បានបញ្ចប់ការប្រកួតរបស់ខ្លួនហើយ កាលពីពេលថ្មីៗ នេះ។

ក្រុមជយលាភីទទួលរង្វាន់

យោងតាមទិន្នន័យមកពីគណៈកម្មការរៀបចំការប្រកួត ព្រឹត្តិការណ៍នេះបានរៀបចំឡើងជាងមួយខែមកហើយ ដោយជាលទ្ធផលមាន៖

កម្រិតវិទ្យាល័យ លេខ១ បានទៅវិទ្យាល័យទួលអំពិល លេខបានទៅវិទ្យាល័យព្រែកកំពិស និងវិទ្យាល័យពងទឹកជាប់លេខ៣។
កម្រិតអនុវិទ្យាល័យ លេខ១ បានទៅអនុវិទ្យាល័យហ៊ុនសែនព្រៃវែង លេខ ២ បានទៅអនុវិទ្យាល័យត្រពាំងសាលា និង លេខ៣ បានទៅអនុវិទ្យាល័យពងទឹក។
កម្រិតបឋមសិក្សា លេខ១ បានទៅក្រុមបឋមសិក្សាឧកញ៉ាហ៊ុននាងព្រែកកំពិស លេខ២ បឋមសិក្សាកំពុងក្ដុល និង លេខ៣ បឋមសិក្សាដង្កោ។

ឧត្ដមសេនីយ៍ទោ រ័ត្ន ស៊្រាង មេបញ្ជាការរងកងរាជអាវុធហត្ថលើផ្ទៃប្រទេសនិងមេបញ្ជាការកងរាជអាវុធហត្ថរាជធានីភ្នំពេញ គ្រោងរៀបចំការប្រកួតកីឡាបាល់ទាត់ទម្រង់បែបនេះឱ្យបានគ្រប់ខណ្ឌក្នុងរាជធានីភ្នំពេញ ដោយចាប់ផ្ដើមនៅខណ្ឌដង្កោមុនសិនប៉ុណ្ណោះ។ កាលជាមេបញ្ជាការខេត្តបន្ទាយមានជ័យ លោកធ្លាប់សហការជាមួយសហព័ន្ធកីឡាបាល់ទាត់បង្កើតវគ្គសិក្សាទាំងកម្រិតគ្រូបាល់ទាត់ វគ្គអាជ្ញាកណ្ដាល និង ការប្រកួតនានាជាច្រើនផងដែរ។

ក្នុងពិធីបិទការប្រកួតពានរង្វាន់នេះដែលរៀបចំឡើងនៅបរិវេណអនុវិទ្យាល័យហ៊ុនសែនព្រៃវែង ដែលមានទីតាំងក្នុងខណ្ឌដង្កោ កាលពីថ្ងៃទី ២៧ ខែ មេសា កន្លងទៅ លោក រ័ត្ន ស៊្រាង បានប្រគល់រង្វាន់លើកទឹកចិត្តដល់ក្រុមចំណាត់ថ្នាក់លេខ១ ទទួលបានពានជយលាភី១ ទង់ចំណាត់ថ្នាក់ ១ ថវិកា ១ លានរៀល និង បាល់ ៥គ្រាប់ ហើយក្រុមលេខ ២ បានទង់ចំណាត់ថ្នាក់១ ថវិកា ៧០ ម៉ឺនរៀល និងបាល់ ៥ គ្រាប់ និង ក្រុមលេខ៣ ទទួលបានទង់ចំណាត់ថ្នាក់១ ថវិកា ៥០ ម៉ឺនរៀល និង បាល់ ៥ គ្រាប់៕