កុំព្យូទ័រគុណភាពល្អតម្លៃសមរម្យ មានចំណុចពិសេសត្រូវពិចារណា

2015-05-07 17:39:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីទទួលបានកុំព្យូទ័រមួយដែលមានគុណភាពល្អហើយអាចបំពេញនូវតម្រូវការរបស់អ្នកបាននោះ វាមិនប្រាកដថាទាល់តែត្រូវចំណាយថវិកាច្រើននោះទេ។ អ្នកក៏អាចទទួលបានកុំព្យូទ័រដែលមានគុណភាពល្អជាមួយនឹងតម្លៃទាបបានដែរ ប្រសិនបើអ្នកដឹងពី ប្រភេទកុំព្យូទ័រណាដែលអាចបំពេញសេចក្ដីត្រូវការរបស់អ្នកបាននោះ។ ដូចនេះអ្នកគួរតែជ្រើសរើសកុំព្យូទ័របែបណាប្រសិនបើអ្នកចង់បានកុំព្យូទ័រដែលមានគុណភាពល្អហើយតម្លៃស្ដួចស្ដើងនោះ?

អ្នកស្រី ហួរ អ្នកគ្រប់គ្រងប្រចាំហាងលក់កុំព្យូទ័រឃុន ហុង បានណែនាំទៅដល់សិស្សនិស្សិតពីការជ្រើសរើសប្រភេទកុំព្យូទ័រ ដែលសមស្របតាមតម្រូវការប្រើប្រាស់រួមទាំងថវិកាមានកំណត់៖

កុំព្យូទ័រសម្រាប់ប្រើប្រាស់ទូទៅ៖

ដោយសារតែការប្រើប្រាស់ទូទៅដូចជា ការវាយឯកសារ ការស្រាវជ្រាវ ការប្រើប្រាស់អ៊ីនធឺណិត និងបណ្ដាញទំនាក់ទំនងសង្គមជាដើម មិនទាមទារឲ្យមានកុំព្យូទ័រដែលមានសមត្ថភាពខ្ពស់ពេក អ្នកស្រីបានណែនាំកុំព្យូទ័រដែលមានលក្ខណៈសម្បត្តិដូចជា CPU ត្រឹម Core-i3, RAM ទំហំ 4GB, HDD ទំហំ 500 GB, VGA ប្រភេទជាប់។ សមត្ថភាពប៉ុណ្ណេះសមស្របការប្រើប្រាស់ទូទៅសម្រាប់សិស្សនិស្សិតពិចារណាទិញយកទៅប្រើប្រាស់។

អ្នកស្រីថា កុំព្យូទ័រកម្រិតសមត្ថភាពដែលបានរៀបរាប់នេះតម្លៃខ្ទង់ ៤០០ដុល្លារ ដែលមានដូចជាម៉ូដែល ASUS ឫ Acer ជាដើម។

កុំព្យូទ័រសម្រាប់ប្រើប្រាស់ជាមួយនឹងការងារធំៗ៖

សម្រាប់ការប្រើប្រាស់ក្នុងគោលបំណងដូចជា កាត់តវីដេអូ ឬរូបភាព ការលេងហ្គេម ជាពិសេសសិស្សនិស្សិតដែលសិក្សាខាងផ្នែកវិទ្យាសាស្ត្រដែលទាមទារឲ្យមានកុំព្យូទ័រដែលមានសមត្ថភាពខ្លាំង ព្រោះលំហូរការងារខ្ពស់ជាងការប្រើប្រាស់ទូទៅ។ អ្នកស្រីណែនាំកុំព្យូទ័រដែលមានសមត្ថភាពពិសេសដូចជា CPU ប្រភេទ Core-i3, RAM ទំហំ4GB, HDD ទំហំ 500 GB និង VGA ដាច់ទំហំ 2GB សម្រាប់អេក្រង់វិញទំហំចាប់ពី១៤អ៊ីញឡើងទៅ ហើយកាន់តែធំកាន់តែល្អ។

សមត្ថភាពកុំព្យូទ័រកម្រិតនេះ ការបំពេញការងារមានភាពរលូន។ ចំពោះតម្លៃវិញចន្លោះចាប់ពី៤០០ទៅ៤៥០ដុល្លារ សម្រាប់ពពួកម៉ូដែល ASUS។

អត្ថបទ៖ ហៃ សុខហេង