ដឹងថា ស្រីនៀត ទទួលបានទឹកប្រាក់ប៉ុន្មាន ក្រោយឈ្នះជយលាភីប្រជាប្រិយពី Miss Grand International?

2014-10-10 18:11:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូចប្រិយមិត្តបានជ្រាបស្រាប់ហើយ កញ្ញា នូ ទឹមស្រីនៀត ទើបឈ្នះជយលាភីផ្នែកប្រជាប្រិយ (Miss Popular Vote Award) ក្នុងកម្មវិធី Miss Grand International ពីប្រទេសថៃ ដោយទទួលបានពានរង្វាន់មួយ រួមជាមួយប្រាក់រង្វាន់អមជយលាភីផង។

លោក ប៊ុន កើដ អគ្គនាយកក្រុមហ៊ុន BKA Entertainment បានបង្ហើបប្រាប់ថា ជាមួយនឹងជយលាភីខាងលើ ស្រីនៀត ដែលតំណាងឲ្យកម្ពុជា ទទួលបានទឹកប្រាក់ចំនួន ៥០០០ដុល្លារសហរដ្ឋអាមេរិក។ អគ្គនាយករូបនេះថ្លែងថា និយាយពីទឹកប្រាក់ គឺតិចតួចទេ ប៉ុន្តែអ្វីដែលយើងបានចំណេញច្រើនជាងនេះ គឺយើងបានផ្សព្វផ្សាយវប្បធម៌ ទេសចរណ៍ និងសម្រស់របស់នារីខ្មែរទៅកាន់ពិភពលោក។

យោងតាមច្បាប់របស់កម្មវិធី ក្រោយជាប់ជយលាភីខាងលើ កញ្ញា នូ ទឹមស្រីនៀត មិនមានសិទ្ធិទៅចូលរួមកម្មវិធីដដែលនៅឆ្នាំក្រោយក្នុងនាមជាបេក្ខជនប្រឡងទៀតឡើយ ប៉ុន្តែនាងនឹងចូលរួមជាតារាកិត្តិយស។ ជាមួយគ្នានេះដែរ ក្នុងអាណត្តិ១ឆ្នាំនេះ ស្រីនៀត នឹងត្រូវចូលរួមកិច្ចការ ក៏ដូចជាសកម្មភាពនានារបស់កម្មវិធី ទៅតាមការកោះហៅជាក់ស្ដែង។ នេះបើតាមលោក ប៊ុន កើដ។

យ៉ាងណាក៏ដោយ អគ្គនាយករូបនេះ បញ្ជាក់ថា លោកនឹងខិតខំស្វែងរកយុវនារីខ្មែរវ័យក្មេង ស្អាតៗ មានទេពកោសល្យ និងសមត្ថភាពទៅចូលរួមក្នុងប្រកួតក្នុងកម្មវិធី Miss Grand International ដើម្បីស្វែងរកមោទនភាពថ្មីៗមកឲ្យកម្ពុជាបន្តបន្ទាប់ទៀត។ ក្រៅពីនេះ លោក ប៊ុន កើដ ក៏បានបង្ហាញពីមហិច្ឆតាចង់ឲ្យមានកម្មវិធីនេះនៅក្នុងប្រទេសកម្ពុជាយើងដែរ។

“យើងនឹងព្យាយាមឲ្យវាកើតនៅក្នុងស្រុកយើង អាចថា Miss Grand Cambodia អីចឹងទៅ តែបើមិនអាចទេ យើងនឹងរកបេក្ខនារីតំណាងកម្ពុជាចេញទៅប្រកួតនៅប្រទេសគេអីចឹងទៀតទៅ!”។

ក្រោយទទួលបានជយលាភី កញ្ញា នូ ទឹមស្រីនៀត បានវិលត្រឡប់មកដល់ប្រទេសកំណើតវិញហើយតាំងពីព្រឹកថ្ងៃព្រហស្បតិ៍ម្សិលមិញ។ នៅល្ងាចថ្ងៃដដែល កញ្ញា បានទៅចូលរួមក្នុងកម្មវិធី ប្រឡងចម្រៀងកុមារ Kodomo ដែលមានផ្សាយផ្ទាល់តាមកញ្ចក់ទូរទស្សន៍ MyTV។

នាទីនោះ គឺ ស្រីនៀត ថ្លែងអំណរគុណចំពោះជនរួមជាតិទាំងឡាយ ដែលបានជួយបោះឆ្នោតគាំទ្រនាង រហូតឈ្នះដាច់លើជយលាភីប្រជាប្រិយពីកម្មវិធី Miss Grand International 2014៕