Rambo និង Arnold ចង់ប្រកួតគ្នារកអ្នកខ្លាំងដូច Floyd និង Pacquiao ដែរ

2015-05-12 13:05:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងតួ “Rambo” Sylvester Stallone បាននិយាយថាខ្លួននិងមិត្តសំឡាញ់ Arnold Schwarzenegger នឹងឡើងសង្វៀនជាមួយគ្នាដើម្បីប្រកួតរកអ្នកប្រយុទ្ធជើងខ្លាំងក្នុងប្រវត្តិសាស្ត្ររបស់ហូលីវូដ។

តារាវ័យ ៦៨ឆ្នាំ រូបនេះបាននិយាយបែបលេងសើច ជាមួយក្រុមអ្នកថតរូប នៅពេលដែលលោក និង Arnold ដើរចេញពីភោជនីយដ្ឋានមួយនៅទីក្រុង Los Angeles បន្ទាប់ពីញ៉ាំបាយថ្ងៃត្រង់ជាមួយគ្នា។

ខណៈដែលពួកគេកំពុងដើរសំដៅទៅចំណតរថយន្ត អ្នកថតរូបម្នាក់បានសួរ តួឯករឿង “Rocky” ថាតើលោកគិតដូចម្ដេចពីការប្រកួតរបស់ Mayweather និង Pacquiao កាលពីសប្ដាហ៍កន្លងទៅ។

Sylvester បានឆ្លើយតបថា “ខ្ញុំគិតថាការប្រកួតនោះជាកម្មវិធីធំមួយដែលធ្វើឲ្យអ្នកគ្រប់គ្នាមានអារម្មណ៍រំភើបរីករាយ”។ ប៉ុន្តែនៅពេលអ្នកថតរូបសួរថា តើលោកចង់ឲ្យមានការប្រកួតម្ដងទៀតដែរឬយ៉ាងណា តារាសម្ដែងរូបនេះបានឆ្លើយទាំងសើចថា "ចង់! ប៉ុន្តែខ្ញុំនិង Arnold នឹងជាអ្នកវាយក្នុងកម្មវិធីនោះ។ បើពួកយើងវាយ គឺទាល់តែ ៣០ទឹកអីនោះ!"។

ដោយឡែកតារាសម្ដែងវ័យ ៦៧ឆ្នាំ Arnold មិនបាននិយាយអ្វីទាំងអស់ ដោយគ្រាន់តែសើចតិចៗ ហើយក៏ឡើងឡានចេញទៅ។

តារាសម្ដែងជើងចាស់ទាំងពីររូប បានជួបគ្នាចុងក្រោយក្នុងខ្សែភាពយន្ត រឿង "Expendables 3” ដែលបានបញ្ចាំងកាលពីឆ្នាំមុន។ នៅឆ្នាំ២០១៥នេះ Sylvester នឹងត្រលប់មកវិញតាមរយៈរឿង "Creed” ដែលជាវគ្គទី៧ នៃស៊េរីភាពយន្ត "Rocky” នៅខែវិច្ឆិកា ខាងមុខ។ ចំណែកតារាសម្ដែងអតីតអភិបាលរដ្ឋ California Arnold នឹងបន្តចេញវគ្គទី៥ នៃខ្សែភាពយន្ត "Terminator” នៅដើមខែកក្កដា ៕