បេ វណ្ណារ៉ា ជួបគ្រោះថ្នាក់ចរាចរណ៍

2015-05-13 17:25:44
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជើងចាស់ បេ វណ្ណារ៉ា បានជួបគ្រោះថ្នាក់ចរាចរណ៍កាលពីយប់ម្សិលមិញជាមួយតារាប្រុសម្នាក់ទៀត ក្រោយពួកគេទាំងពីរជិះម៉ូតូត្រឡប់ពីថតភាពយន្តនៅកៀនស្វាយវិញ។

ហេតុការណ៍នេះ បានកើតឡើងនៅម្ដុំវត្តនិរោធនាវេលាម៉ោងប្រមាណ ១២រំលងអាធ្រាត្រទៅហើយ។ លោក បេ វណ្ណារ៉ា ថ្លែងថា "ខ្ញុំបានជិះម៉ូតូធ្លាក់ជង្ហុកដួលដោយខ្លួនឯងអត់មានអ្នកណាបុកទេ ណាមួយគេចពីឡានកុងតឺន័រផង"។

រូបភាព៖ FB បេ វណ្ណារ៉ា

បន្ទាប់ពីថតរឿង " រនាតស្នេហ៍ " ចប់ប្រហែលជាម៉ោង១២អាធ្រាត្រនៅម្តុំកៀនស្វាយរូបលោកក៏បានត្រលប់មកផ្ទះវិញដោយជិះម៉ូតូមានគ្នាពីរនាក់។មិនទាន់បានដល់ផ្ទះផងក៏បានជួបគ្រោះថ្នាក់តែម្ដង។ "ពេលហ្នុង ខ្ញុំជិះម៉ូតូពីរនាក់អ្នកថតរឿងជាមួយគ្នា ទាំងកណ្ដាលយប់ម៉ោង១២យប់ទៅហើយ។ ពេលមកដល់ម្ដុំវត្តនិរោធ ផ្សំនឹងយើងចំណាស់ៗមើលមិនសូវច្បាស់ផង ផ្សំនឹងម្ដុំនោះមានជង្ហុកច្រើនផង និងមានឡានកុងតឺន័រធំមួយនៅកណ្ដាលផ្លូវទៀត ក៏ព្យាយាមគេចរហូតធ្លាក់ជង្ហុកទប់ជំហរមិនជាប់ក៏ដួលតែម្ដងទៅ"។ បេ វណ្ណារ៉ា បន្ថែម។

ក្រោយកើតហេតុ តួឯកនៅក្នុងរឿង"ម៉ាក់ថឺង"រូបនេះបានប្រាប់ថា លោករងរបួសមិនសូវជាធ្ងន់ធ្ងរប៉ុន្មានទេ ដោយគ្រាន់តែរយះដៃហើមជើងឈឺចង្កេះប៉ុណ្ណោះ ប៉ុន្តែមកដល់ឥឡូវនេះបានធូរស្រាលអាចដើរបានតិចៗ។ ឯដៃគូម្នាក់ទៀតដែលរួមដំណើរជាមួយលោក ក៏រងរបួសស្រាលដែរ។

លោក បេ វណ្ណារ៉ា ជាតារាសម្ដែងជើងចាស់មួយរូបដែលទស្សនិកជនបានស្គាល់រូបគាត់តាមរយៈរឿង "ម៉ាក់ថឺង" ក្នុងនាមជាតួអង្គតា "ម៉ាក់ថឺង" ជាមួយនឹងអ្នកនាង ព្រំ រដ្ឋា ក្នុងកំឡុងឆ្នាំ២០០០។

លោក បេ វណ្ណារ៉ា ចូលសម្ដែងតាំងពីឆ្នាំ១៩៨៧រហូតមកដល់ពេលនេះបានជាង១៥០រឿងដូចជារឿង"ម៉ាក់ថឺង, ទិព្វសូដាចន្ទ, សព្ទសិទ្ធិ,បដាចារ...ជាដើម។ ហើយថ្មីៗកំពុងថតរឿង "រនាតស្នេហ៍"និងរឿង"វេរាស្នេហ៍"ដែលនឹងត្រៀមបញ្ចាំងនៅកញ្ចក់ទូរទស្សន៍ CTN នាពេលខាងមុខនេះ៕ អត្ថបទ៖ ថា ម៉ាលីដា