ក្រោម​ការ​រចនា​ដោយ​យកចិត្តទុកដាក់​និង​យ៉ាង​ប៉ិនប្រសព្វ​នៃ​ក្រុម​អ្នក​ផលិត​ចំណានៗ Rolls-Royce បាន​ក្លាយ​ជា​រថយន្ត​ដ៏​លេចធ្លោ​និង​ជា​ទី​ចាប់​អារម្មណ៍​ពី​មនុស្ស​ម្នា​គ្រប់​ទិសទី សម្រាប់​ភាព​ប្រណិត​លេច​ធ្លោ​​​ដាច់​គេ​។ ការ​រចនា​ច្នៃ​ប្រឌិត​បង្កើត​បាន​រថយន្ត​​ Rolls-Royce គឺ​ស្ថិត​នៅ​ក្រោម​គោលគំនិត​និង​ទស្សនៈ​អភិវឌ្ឍ​យូរ​អង្វែង​របស់​ស្ថាបនិក​រថយន្ត​នេះ។

លោក Sir Henry Royce ជា​ស្ថាបនិក​ក្រុមហ៊ុន​រថយន្ត Rolls-Royce បាន​លើក​ទស្សនៈ​លើ​ការអភិវឌ្ឍន៍​រថយន្ត Rolls-Royce ថា "Take the best that exists and make it better” ដែល​មាន​ន័យ​ថា "យក​របស់​ល្អ​បំផុត​ដែល​មាន​មក​ធ្វើ​ជា​គំរូ ហើយ​ធ្វើ​ឲ្យ​បាន​ល្អ​ជាង បើ​មិន​មាន​ចូរ​រចនា​បង្កើត​ថ្មី"។

លោក Andi Carter-McCann អ្នក​ជំនាញ​លើ​ផលិតផល​និង​ជា​គ្រូ​បណ្ដុះបណ្ដាល​អ្នក​បើកបរ​ក្រុមហ៊ុន Rolls-Royce Motor Car ឲ្យ​ដឹង​ថា ទ្រឹស្ដី​របស់​លោក Sir Henry Royce បាន​ក្លាយ​ជា​អត្តសញ្ញាណ​របស់ Rolls-Royce ដើម្បី​​យក​មក​អភិវឌ្ឍ​រថយន្ត Rolls-Royce ឲ្យ​មាន​ភាព​លេចធ្លោ​ដាច់​គេ។

លោក​ថា ការ​អនុវត្ត​តាម​ទ្រឹស្តី​របស់​លោក Sir Henry Royce បាន​ធ្វើ​ឲ្យ Rolls-Royce មាន​ភាព​ល្បីល្បាញ​ក្លាយ​ជា​រថយន្ត​ដែល​មាន​ការ​ទទួល​ស្គាល់​ពី​បុគ្គល​ដ៏​អស្ចារ្យបំផុត សម្រាប់​ភាព​ប្រណិត​ខុស​ប្លែក​ពី​រថយន្ត​ដទៃ​ទៀត។

អត្ថបទ៖ ប៊ុណ្ណារ៉ា