តារាល្បីៗសិង្ហបុរី Jeanette, Elvin និង Desmond Tan មកផ្សព្វផ្សាយភាពយន្តនៅកម្ពុជា

2014-10-10 23:11:36
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីៗរបស់ប្រទេសសិង្ហបុរីចំនួន៣រូបមានកញ្ញា Jeanette Aw, Elvin Ng និងលោក Desmond Tan បានឡើងមកធ្វើសន្និសីទសារព័ត៌មានផ្សព្វផ្សាយពីភាពយន្តរបស់ពួកគេនៅកម្ពុជារឿង "ជីវិតលើមាតុភូមិថ្មី" ដែលកំពុងចាក់ផ្សាយលើកញ្ចក់ទូរទស្សន៍ខ្សែកាប PPCTV។

រឿងភាគរបស់ប្រទេសសិង្ហបុរីមួយនេះ បង្ហាញពីភាពចលាចលក្នុងប្រទេសចិន រួមទាំងការឈ្លានពានពីបរទេសផង ដែលបានបង្ខំប្រជាជនក្នុងប្រទេសមួយនេះ ចាកចេញពីស្រុកកំណើតទៅកាន់កន្លែងរស់នៅថ្មីមួយទៀត ដែលជាក្ដីប្រាថ្នារបស់ពួកគេ នោះគឺណានយ៉ាង។ ក្នុងរឿងនេះ កញ្ញា Jeanette សម្ដែងជាតួនាង Yazi ឬកូនទា Desmond Tan សម្ដែងជា Shi Tou និង Elvin សម្ដែងជាបុរសអ្នកមាន Dong En។

រាប់ពីឆ្វេង " Desmond Tan, Jeanette Aw និងលោក Elvin Ng

នេះជាលើកទី៣ដែល Jeanette បានជួបសម្ដែងជាមួយ Desmond Tan ប៉ុន្តែជាលើកទី១ ដែលពួកគេសម្ដែងជាប្ដីប្រពន្ធនឹងគ្នា។ ចំណុចនេះ Desmond ប្រាប់នៅក្នុងសន្និសីទសារព័ត៌មានមួយម៉ោងមុនថា លោក ពិបាកមែនទែន ព្រោះ Jeanette ស្អាតពេក កាន់តែលេងស្និទ្ធកាន់តែមានអារម្មណ៍ចូលចិត្តនាង។ ពួកគេទាំង៣ស្នើឲ្យទស្សនិកជនគាំទ្រភាពយន្តមួយនេះរបស់ពួកគេផង។

ចំពោះដំណើរមកដល់កម្ពុជាថ្ងៃនេះ កញ្ញា Jeanette Aw និងលោក Elvin Ng ថ្លែងថា ពួកគេរីករាយដែលមកដល់កម្ពុជាជាថ្មីដូចនឹងការសន្យាក្នុងគ្រាកន្លងមក។ "នេះជាលើកទី៤ដែលខ្ញុំបានមកដល់កម្ពុជា ក្នុង៣លើកខ្ញុំមកធ្វើការងារ និងមួយលើកខ្ញុំមកការងារផ្ទាល់ខ្លួនជាមួយកុមារតូចៗរបស់កម្ពុជា ហើយនោះជាបទពិសោធន៍ដ៏កក់ក្ដៅមួយ!”។ Jeanette ថ្លែង។

វិលមកលោក Elvin Ng វិញ ថ្លែងថាលោកក៏បានដល់ប្រទេសកម្ពុជាជាលើកទី៤ដូចគ្នាដែរ។ លោក បន្តថា "ខ្ញុំមានអារម្មណ៍ថា កម្ពុជាដូចជាផ្ទះទី២របស់ខ្ញុំ។ កាលពីមកលើកទី១ ខ្ញុំបានស្នាក់នៅកម្ពុជារយៈពេល២០ថ្ងៃ ហើយវេលានោះខ្ញុំមានរឿងល្អៗជាច្រើន។ ខ្ញុំមានមិត្តភក្ដិមួយចំនួននៅទីនេះ អីចឹងខ្ញុំនឹងត្រឡប់មកកម្ពុជាម្ដងហើយម្ដងទៀត"។

ដោយលោក Desmond Tan វិញ គឺជាលើកដំបូងប៉ុណ្ណោះដែលលោកបានមកដល់ប្រទេសកម្ពុជា។ លោក ថ្លែងថា "ខ្ញុំអត់ទាន់បានទៅកន្លែងផ្សេងៗក្នុងប្រទេសកម្ពុជាទេ ព្រោះខ្ញុំទើបមកដល់២ម៉ោងមុននេះប៉ុណ្ណោះ។ ប៉ុន្តែខ្ញុំមានអារម្មណ៍កក់ក្ដៅណាស់ជាមួយកម្ពុជា ខ្ញុំរំភើបមែនទែន ពេលឃើញការគាំទ្ររបស់អ្នកគាំទ្រកម្ពុជា។ អ្វីដែលពិសេស ខ្ញុំបានញុំាអាម៉ុកត្រីរបស់កម្ពុជា វាឆ្ងាញ់ណាស់!"។

ក្រោយបានចាប់បញ្ចាំងកាលថ្ងៃទី២៨ ខែកញ្ញា ២០១៤ ខ្សែភាពយន្តភាគ "ជីវិតលើមាតុភូមិថ្មី" មានចាក់ផ្សាយជារៀងរាល់ថ្ងៃលើកញ្ចក់ទូរទស្សន៍ខ្សែកាប PPCTV ចំនួនពីរដងក្នុងមួយថ្ងៃ ក្នុងនោះលើកទី១នៅម៉ោង ១២ថ្ងៃត្រង់ និងលើកទី២ យប់ម៉ោង ៩ជារៀងរាល់ថ្ងៃ៕

http://youtu.be/8kTzplrK54g

អត្ថបទ៖ ទារិកា