ចង់ឃើញកូនខ្មែរបារាំង សុខថន បង្ហាញខ្លួនពេលកម្ពុជាប៉ះឡាវស្អែកទេ?

2015-06-01 13:30:17
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបង្ហាញទម្រង់លេងដ៏ល្អនៅក្នុងក្រុមជម្រើសជាតិ និងក្លិបភ្នំពេញក្រោន កីឡាករកូនកាត់ខ្មែរ-បារាំង វ៉ា សុខថន ទទួលបានការចាប់អារម្មណ៍យ៉ាងខ្លាំងពីអ្នកស្នេហាវិស័យបាល់ទាត់កម្ពុជា និងចង់ឃើញរូបគេបង្ហាញខ្លួនឲ្យជម្រើសជាតិ។

ពេលប្រកួតមិត្តភាពជាមួយក្រុមកីឡាករអាហ្វ្រិកប្រកបអាជីពនៅកម្ពុជាកាលពីថ្ងៃទី២៨ កន្លងទៅដែលពេលនោះក្រុមកម្ពុជាឈុតធំបានត្រឹមលទ្ធផលស្មើ២-២ និងមិនសូវមានឱកាសវាយលុកក្រុមកីឡាករមកពីអាហ្វ្រិកឡើយ ប៉ុន្តែនៅពេលនោះ ក្រុមកម្ពុជាអវត្តមានខ្សែបម្រើប្រយុទ្ធសំខាន់ពីររូបគឺ វ៉ា សុខថន និង ធារី ចន្ថាប៊ីន។ ការប្រកួតនោះ វ៉ា សុខថនបង្ហាញខ្លួននៅទីលានឲ្យអ្នកគាំទ្របានឃើញដែរ ប៉ុន្តែកីឡាករមិនបានចូលលេងទេ ខណៈអ្នកគាំទ្រជាច្រើនចង់ឲ្យរូបគេចូលលេង។

ជួបជាមួយ Sabay កីឡាករកូនកាត់ខ្មែរ-បារាំងរូបនេះបានប្រាប់ថា រូបគេមិនទាន់ជាពីរបួស១០០%នៅឡើយទេ ដូច្នេះមិនអាចចូលលេងបានឡើយ ប៉ុន្តែពេលប្រកួតមិត្តភាពរវាងកម្ពុជា និងឡាវនាថ្ងៃទី២ ខែមិថុនាខាងមុខនេះ រូបគេទំនងជាអាចចូលលេងវិញបាន។

ចាប់តាំងពីបានជាប់ជម្រើសជាតិមក វ៉ា សុខថន ដែលមានល្បឿនលឿន បានស៊ុតចូលទីគ្រាប់ដំបូងរបស់ខ្លួនឲ្យជម្រើសជាតិមួយគ្រាប់ហើយនៅពេលក្រុមកម្ពុជាឈុតធំឈ្នះក្រុមកីឡាករជប៉ុនប្រកបអាជីពនៅកម្ពុជាដោយលទ្ធផល៤-១។ អ្វីដែលអ្នកគាំទ្រចាប់អារម្មណ៍រូបគេបំផុតនោះគឺនៅពេលកីឡាកររូបនេះជាប់ជម្រើសដំបូងពេលកម្ពុជាឈ្នះម៉ាកាវក្នុងការប្រកួតជម្រុះ World Cup ដោយលទ្ធផល៣-០ នៅស្តាតចាស់៕ វីដអូ៖ វ៉ា សុខថន ហ្វឹកហាត់ជាមួយមិត្តរួមក្រុម