សិស្សពូកែលេខ៣ថ្នាក់ជាតិបង្ហាញរបៀបវិញ្ញាសាគេនិយមចេញ

2014-10-11 16:20:39
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតសិស្សពូកែលេខ ៣ថ្នាក់ជាតិផ្នែកគណិតវិទ្យាឆ្នាំ២០០៥ គឹម ចាន់ អាយុ២៧ឆ្នាំ តែងប្រមូលវិញ្ញាសាប្រឡងផ្សេងៗមកបង្ហោះលើប្លុករបស់ខ្លួន ដែលមានឈ្មោះថា Cambomaths ដើម្បីចែកជូនអ្នកត្រៀមប្រឡងបាក់ឌុប ប្រឡងសិស្សពូកែ ឬប្រឡងចូលមហាវិទ្យាល័យបានសិក្សាស្វែងយល់។ តាមរយៈបទពិសោធន៍ផ្ទាល់ខ្លួន និងការសង្កេតលើវិញ្ញាសាស្ទើរគ្រប់មុខវិជ្ជា ជាពិសេសគឺគណិតវិទ្យា អតីតសិស្សអាហារូបករណ៍នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចរូបនេះ បានបង្ហាញពីគន្លឹះខ្លះៗ សម្រាប់បេក្ខជនប្រឡងបាក់ឌុបនៅប៉ុន្មានថ្ងៃខាងមុខនេះ តាមរយៈបទសម្ភាសន៍ជាមួយ Sabay ដូចតទៅ៖

Sabay៖ លោក គឹម ចាន់! តើអ្វីជាគោលបំណងរបស់លោកក្នុងការបង្កើតប្លុក Cambomaths នេះ ដោយបង្ហោះវិញ្ញាសាប្រឡងផ្សេងៗ?

គឹម ចាន់៖ ការ បង្កើតប្លុកនេះឡើងនៅពាក់កណ្ដាលខែកញ្ញា ឆ្នាំ២០០៩ គឺដោយសារខ្ញុំផ្ទាល់ស្រឡាញ់ការសិក្សា និងដោយសារមានតម្រូវការពីយុវជនចង់បានវិញ្ញាសាទាំងនេះយកទៅ សិក្សារៀនសូត្រ។ នៅក្នុងប្លុកនេះ ខ្ញុំមិនត្រឹមតែបង្ហោះវិញ្ញាសាប្រឡងឆមាសនីមួយៗ ប្រឡងឌីប្លូម ប្រឡងបាក់ឌុប ឬប្រឡងសិស្សពូកែនោះទេ គឺមានឯកសារជាច្រើនទាក់ទងនឹងការប្រឡងគណិតវិទ្យាពិភពលោកផងដែរ ដែលអាចផ្ដល់ជាជំនួយសម្រាប់ការត្រៀមប្រឡងនានា។ ខ្ញុំសង្ឃឹមថា តាមរយៈប្លុកនេះយុវជនអាចនឹងទទួលបាននូវចំណេះដឹងប្លែកៗ ដើម្បីយកមកធ្វើការពិចារណា ក៏ដូចជាយកមកអភិវឌ្ឍខ្លួនដើម្បីឈានទៅរកជោគជ័យដ៏ប្រពៃក្នុង ថ្ងៃអនាគតរបស់ខ្លួន។

Sabay៖ តើលោកបានវិញ្ញាសាទាំងអស់នេះ មកបង្ហោះលើប្លុករបស់លោក ពីណាមក? គឹម ចាន់៖ ខ្ញុំមានបណ្ដាញរបស់ខ្ញុំ។ ដោយសារខ្ញុំធ្លាប់ជាអតីតសិស្សពូកែប្រចាំខេត្តកំពតទាំងឌីប្លូម និងបាក់ឌុប និងជាជយលាភីលេខ៣ផ្នែកគណិតវិទ្យាឆ្នាំ២០០៥ មានសិស្សជាច្រើនតែងតែមកលេងខ្ញុំ ដើម្បីឲ្យខ្ញុំចែករំលែកនូវបទពិសោធន៍ និងចំណេះដឹងជូនពួកគេ។ យើងបានបង្កើតបណ្ដាញជាមួយគ្នា។

ដូច្នេះហើយសិស្សប្អូនៗជា ច្រើនតែងតែផ្ដល់នូវវិញ្ញាសាដែលគេទទួលបានមកឲ្យខ្ញុំ។ ខ្ញុំប្រមូលបានវិញ្ញាសាទាំងការប្រឡងថ្នាក់ស្រុក ថ្នាក់ខេត្ត និងថ្នាក់ជាតិ ពីខេត្តកណ្ដាល ខេត្តកំពត ខេត្តតាកែវ ក៏ដូចជាខេត្តព្រៃវែង។ ខ្ញុំបានរក្សាវិញ្ញាសាទាំងនេះតាំងពីឆ្នាំ២០០៦មកម្ល៉េះ។ Sabay៖ នៅក្នុងប្លុករបស់ គឹម ចាន់ ក៏មានបង្ហាញវិញ្ញាសាបរទេសផងដែរ។ ចុះវិញ្ញាសាខ្មែរ មានអ្វីដូចគ្នានឹងវិញ្ញាសារបស់បរទេសទេ? គឹម ចាន់៖ តាមការសង្កេតរបស់ខ្ញុំ វិញ្ញាសា ជាពិសេសគណិតវិទ្យាតែម្ដង គឺដកស្រងចេញពីគណិតវិទ្យាអន្តរជាតិ International Mathemmatical Olympiad (IMO)ខ្លះដែរ ដូចជាពីជប៉ុន ចិន ជាពិសេសគឺវៀតណាមតែម្ដង ដោយសារវៀតណាមពូកែណាស់ខាងគណិតវិទ្យា។ តាមការសង្កេតរបស់ខ្ញុំ វិញ្ញាសាគណិតវិទ្យារបស់យើងនៅមានការដកស្រង់ច្រើន ខណៈវិញ្ញាសាគណិតវិទ្យានៅស្រុកគេវិញ គឺមានការបង្កើតឡើងថ្មីៗ។

Sabay៖ តាមរយៈការសង្កេតលើវិញ្ញាសាជាច្រើនរាប់មិនអស់ តើលោកយល់ថា វិញ្ញាសាដែលចេញមកមានអ្វីអាចកត់សម្គាល់បានទេ?

គឹម ចាន់៖ មិនថាមុខវិជ្ជារូប គីមី ឬគណិតឡើយ លំហាត់ដែលចេញមកគឺមានរបៀប និងលំនាំតាមគ្នា។ ឧទាហរណ៍ វិញ្ញាសាគណិតវិទ្យា ដែលជាមុខវិជ្ជាមានពិន្ទុខ្ពស់ជាងគេ គឺរបៀបចេញលំហាត់របស់គេ ជាទូទៅ មានពី៦ទៅ៧លំហាត់។

ជាទូទៅ លំហាត់ទី១គេចេញកុំផ្លិច, ទី២ចេញប្រូបាប, ទី៣ចេញអាំងតេក្រាល (គណនារក A, B, C រួចទាញរកអាំងតេក្រាលI), ទី៤ចេញសមីការឌឺផេរ៉ង់ស្យែល ឬអេលីប ប៉ារ៉ាបូល, ទី៥ចេញអនុគមន៍ (រកដេរីវ៉េ សមីការបន្ទាត់ប៉ះ…), ទី៦ចេញ លំហាត់ធរណីមាត្រក្នុងលំហ (ផលគុណវិចទ័រ សមីការបន្ទាត់ ស្វ៊ែរ សមីការប្លង់ មាឌតេត្រាអែត…) ហើយទី៧ គឺលំហាត់ដែលមានពិន្ទុច្រើនជាងគេ គឺសិក្សាអនុគមន៍ និងសង់ក្រាប (រកលីមីត ដេរីវេ បរមា អាស៊ីមតូត សង់តារាងអត្ថិភាព សង់ក្រាប..)។

ចំណែកលំហាត់រូបវិទ្យា ខ្ញុំកត់សម្គាល់ឃើញមួយថា តែងតែចេញដដែលៗ ដូចជាលំហាត់ធ្លាប់ចេញនៅឆមាសទីមួយនៅឆ្នាំ២០១១ហើយ ស្រាប់តែចេញនៅប្រឡងបាក់ឌុបនៅឆ្នាំ២០១២ម្ដងទៀត គ្រាន់តែដូរលេខប៉ុណ្ណោះ។ ដូច្នេះការសិក្សាពីវិញ្ញាសា គឺសំខាន់ណាស់។

ឥឡូវនេះ វិញ្ញាសាដូចជាមិនពិបាករកទេ គឺគេមានបោះពុម្ពតាំងពីឆ្នាំ២០០២ រហូតមកដល់បច្ចុប្បន្ននេះ ដូច្នេះបើបេក្ខជនអាចធ្វើលំហាត់ក្នុងវិញ្ញាសាទាំងអស់នេះបាន ទាំងអស់ ខ្ញុំជឿថា លំហាត់ដែលចេញមក គេនឹងដឹងភ្លាមថា លំហាត់នោះមាននៅក្នុងវិញ្ញាសាណាមិនខាន និងអាចធ្វើបានទៀតផង។

Sabay៖ ចុះក្រៅពីមុខវិជ្ជាវិទ្យាសាស្ត្រ តើវិញ្ញាសាមុខវិជ្ជាសង្គម ដូចជាភូមិ ប្រវត្តិ ឬពលរដ្ឋវិទ្យាវិញ អាចចេញរបៀបណាដែរ? គឹម ចាន់៖ សម្រាប់មុខវិជ្ជាសង្គមវិញ ខ្ញុំគិតថា បេក្ខជនមិនត្រូវមើលរំលងសៀវភៅពុម្ពរបស់ក្រសួងជាដាច់ខាត ពីព្រោះយើងសិក្សាមេរៀនចេញពីសៀវភៅទាំងនេះ ដូច្នេះលំហាត់ត្រូវចេញពីសៀវភៅទាំងនេះ។ ដូច្នេះ ខ្ញុំឲ្យយោបល់ បេក្ខជនត្រូវគិតមេរៀនក្នុងសៀវភៅពុម្ពឡើងវិញ មិនត្រូវគិតតែក្នុងសៀវភៅកំណែនោះទេ។

សម្រាប់ភូមិវិទ្យា និងប្រវត្តិវិទ្យា ខ្ញុំតែសង្កេតឃើញថា មានសំណួរចេញទាក់ទងនឹងព្រឹត្តិការណ៍ថ្មីៗខ្លះ ដែលកើតមានក្នុងសង្គមខ្មែរ។ ដោយសារថ្មីៗនេះ យើងទើបមានការបោះឆ្នោត ដូច្នេះសិស្សគួរតែស្វែងយល់អំពីតួនាទីនៅសភាផងដែរ។

Sabay៖ ពេលប្រឡងនៅតែប៉ុន្មានថ្ងៃទៀតប៉ុណ្ណោះ។ តាមរយៈបទពិសោធន៍របស់លោកដែលធ្លាប់ឆ្លងកាត់ការប្រឡងជាច្រើន តើសិស្សត្រូវធ្វើយ៉ាងម៉េចអាចរៀនចេះច្រើនក្នុងពេលដ៏ខ្លីនេះ? គឹម ចាន់៖ ថ្វីត្បិតតែសល់ប៉ុន្មានថ្ងៃមែន ប៉ុន្តែបើយើងខំរៀន យើងអាចរៀនបានច្រើននៅប៉ុន្មានថ្ងៃចុងក្រោយនេះ។ ខ្ញុំគិតថា បេក្ខជនដែលត្រៀមប្រឡង គួរតែស្វែងយល់ពីភាពខ្សោយ និងភាពខ្លាំងរបស់ខ្លួនឲ្យឃើញ។ ឧទាហរណ៍ បើយើងខ្សោយមេរៀនប្រូបាប យើងចាប់ផ្ដើមខំប្រឹងធ្វើលំហាត់មេរៀននេះឲ្យបានច្រើន។ ឥឡូវនេះ អ្វីដែលយើងខ្សោយ យើងបុករៀនវិជ្ជាហ្នឹងឲ្យខ្លាំង។ ធ្វើឲ្យច្រើនទៅ ខ្ញុំគិតថា យើងនឹងអាចធ្វើបានខ្លះហើយ។

Sabay៖ សិស្សជាច្រើនតែងលើកឡើងថា គេតែងតែភ័យពេលប្រឡង។ ចុះ គឹម ចាន់ មានយោបល់អ្វីធ្វើឲ្យបេក្ខជនកុំឲ្យតក់ស្លុតឲ្យសោះពេលប្រឡង? គឹម ចាន់៖ ដើម្បីកុំឲ្យភ័យតក់ស្លុត ខ្ញុំគិតថា ពេលទទួលបានវិញ្ញាសាភ្លាម បេក្ខជនត្រូវមើលសំនួរទាំងអស់សិន។ ឃើញសំណួរណាស្រួល យើងធ្វើអាហ្នឹងមុន។ បើយើងធ្វើអាយ៉ាប់មុន ពេលដែលយើងទាល់ យើងអាចភ័យ។ បើភ័យហើយ សូម្បីតែអាស្រួលក៏យើងធ្វើមិនត្រូវដែរ។ ដូច្នេះដើម្បីជៀសវាងបញ្ហាដែលអាចនឹងកើតឡើង យើងធ្វើអាលំហាត់ស្រួលឲ្យរួចសិនទៅ យ៉ាងហោចណាស់យើងអាចបានពិន្ទុខ្លះ។

ប៉ុន្តែវាទាក់ទងនឹងពេល វេលាដែរ។ ខ្ញុំឲ្យយោបល់ថា បេក្ខជនគួរតែមាននាឡិកានៅពេលប្រឡង។ ពេលគេធ្វើបាន៣សំណួរ គេគួរក្រឡេកមើលម៉ោងម្ដង។ ជួនកាលគេជក់នឹងលំហាត់ពេក ភ្លេចគិតពីពេលវេលាដែលជិតអស់ គេអាចនឹងបាត់ឱកាសធ្វើលំហាត់ដែលផ្ដល់ពិន្ទុច្រើនៗដែរ។ ដូច្នេះនាឡិកានេះជួយកុងត្រូលពេលវេលាឲ្យបេក្ខជន ក្នុងការបត់បែនទៅតាមកាលៈទេសៈ៕

-កាន់តែធ្ងន់កហើយ! បាក់ឌុបលើកទី ២ មាននគរបាលយុត្តិធម៌ចូលរួមសង្កេតការណ៍ដែរ!

អត្ថបទ៖ មាស រ័ត្ន