២យ៉ាងនៅពីក្រោយ MV បទ "ប៉ា" របស់ ទ្រី សក្កដា អ្នកនិពន្ធ Original Song

2015-06-08 19:12:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញនេះបទចម្រៀង "ប៉ា"របស់ ទ្រី សក្កដា បានចេញជា MV ផ្លូវការហើយក្នុងនោះក៏មានរឿង២យ៉ាង ទី១គឺតែងជាពិសេសជូនលោកឪពុករបស់លោក និងទី២ដើម្បីជួយដល់កុមារកំព្រា។

បទចម្រៀង "ប៉ា" ដែលជាបទកម្សត់មនោសញ្ចេតនារវាងឪពុក និងកូនរបស់ ទ្រី សក្កដា ត្រូវបានចេញកាលពីម្សិលមិញហើយសាមីខ្លួនបានបញ្ជាក់ថាថវិកាទាំងប៉ុន្មានបានមកពីការលក់វីដេអូចម្រៀង (MV) មួយនេះបរិច្ចាគទៅឲ្យសមាគមចលនាវប្បធម៌ជាតិដើម្បីកុមារកំព្រា និងកុមារក្រីក្ររបស់តារាកំប្លែងជើងចាស់លោកតា ហ្វុយហ្សូ។

ទាក់ទងនឹងបទចម្រៀងនេះគឺជាបទដែលបង្ហាញពីសាច់រឿងពិតខ្លះរបស់ ទ្រី សក្កដា។ លោក ថ្លែងថា "បទនេះដែលត្រូវបានតែងជាពិសេសជូនលោកប៉ាខ្ញុំ ហើយក្នុងនោះមានពាក្យពេចន៍មួយចំនួនគឺជាសាច់រឿងពិតរបស់ខ្ញុំ គឺត្រង់ឈុតម្តាយនិយាយទៅកាន់កូន ខ្ញុំចាំគ្មានភ្លេចទេ បងទឹកភ្នែកក៏មិនដឹងហូរមកពីណាដែរ"។

“កូនឯងដឹងទេប៉ាកូនឯងស្រលាញ់កូនឯងស្មើជីវិត ពុកឯងខំធ្វើការទាំងយប់ទាំងថ្ងៃដើម្បីកូនដើម្បីគ្រួសារយើងកាលពីឯងនៅតូចគាត់ឈឺខ្លាំងគាត់អត់ទិញថ្នាំលេបទេ គាត់សុខចិត្តយកលុយទៅទិញនាឡិកាមកឲ្យកូនព្រោះតែស្រលាញ់កូន"។ ឃ្លាដែលតួអង្គម្តាយនិយាយទៅកាន់កូន។

មូលហេតុទី២នោះ គឺរាល់ថវិកាដែលបានមកពីលក់ វីដេអូចម្រៀង (MV) នេះ រូបលោកប្រគល់ជូនទៅសមាគមកុមារកំព្រាដែលកំពុងតែមានវិបត្តិមួយចំនួន៖ "ដោយសារតែសមាគមមួយនេះមានការខ្វះខាតព្រោះតែខែនេះចូលដល់ខែភ្លៀងហើយកុមារកំព្រាទាំងនោះខកខានចេញទៅសម្ដែងធ្វើឲ្យពួកគាត់ជួបប្រទះនូវបញ្ហាខ្លះៗ ទើបពួកខ្ញុំសម្រេចធ្វើដូច្នេះ"។

ទ្រី សក្កដា តារាចម្រៀង និងជាអ្នកនិពន្ធបទ "ប៉ា"

បទ "ប៉ា" នេះដែលលោក ទ្រី សក្កដា បានប្រាប់ថាដឹកនាំសម្ដែងដោយ ហុត រ៉ាវី ម្ចាស់ជយលាភីលេខ១ រឿងចិញ្ចៀនក្នុងកម្មវិធីប្រកួតរឿងខ្លីរបស់ទូរទស្សន៍បាយ័ន។

ថ្មីៗនេះម្ចាស់បទ "Forever Alone" រូបនេះត្រៀមនឹងចេញ MV នូវបទដែលរូបលោក ធ្លាប់បាននិពន្ធបង្ហោះនៅក្នុងYoutubeដែរ។ វីដេអូចម្រៀងនោះ ក៏នឹងដាក់ក្នុងផលិតកម្មមេហ្គាដូចគ្នា៕