"Jurassic World" ភាពយន្តប្រយុទ្ធរវាងមនុស្សនិងដាយណូស័របុកពោះពីដើមដល់ចប់

2015-06-09 17:26:47
ចំនួនមតិ 0 | ចំនួនចែករំលែក 0

ចន្លោះមិនឃើញ

"Jurassic World" ជាខ្សែភាពយន្តប្រឌិតបែបវិទ្យាសាស្ត្រសំបូរដោយឈុតវាយប្រហាររវាងមនុស្ស និងដាយណូស័រ រវាងដាយណូស័រនិងដាយណូស័រ ដែលធ្វើឱ្យអ្នកទស្សនាភ័យរន្ធត់ បុកពោះតាំងពីដើមដល់ចប់។

លោកសៀង បញ្ញា ដែលបានចូលទស្សនាការចាក់បញ្ចាំងរឿងនេះជាលើកដំបូង នៅរោងភាពយន្ត Major Cineplex By Cellcard កាលពីយប់មិញ បានឱ្យដឹងថា ពិតជាល្អមើល ព្រោះសំបូរដោយឈុតរន្ធត់ ទឹកភ្នែក និងសប្បាយរីករាយលាយឡំគ្នា។

បន្ថែមលើរឿងសំបូរដោយសត្វចម្លែកៗនេះ និស្សិតសាកលវិទ្យាល័យបញ្ញាសាស្ត្របន្តថា អ្វីដែលធ្វើឱ្យលោកចាប់អារម្មណ៍នោះគឺ ឈុតសត្វដាយណូស័រអាក្រក់ Indominus rex (ពណ៌ស) ចាប់ផ្ដើមបង្កបញ្ហាសម្លាប់មនុស្ស និងសត្វដាយណូស័រស្លូតៗផ្សេងទៀត រួមទាំងឈុតវាយប្រហារចុងក្រោយ។

ឈុត Owen និងសត្វរបស់ខ្លួនតាមរក Indominus rex

“Jurassic World " ខ្សែភាពយន្តប្រភេទ3D។ Jurassic World ជាឧទ្យានដាយណូស័រ របស់នាយកប្រតិបត្តិនៃក្រុមហ៊ុន Masrani Corporation លោក Simon Masran មានទីតាំងស្ថិតលើកោះ Isla Nublar ក្នុងសមុទ្រប៉ាស៊ីហ្វិក នៅអាមេរិកកណ្ដាលក្បែរប្រទេសកូស្តារីកា។ Masrani និងប្រធានគ្រប់គ្រងឧទ្យាននាង Claire Dearing រួមទាំងក្រុមការងារ បានបង្កើតដាយនូស័រកូនកាត់ឈ្មោះ Indominus rex ដោយប្រើប្រាស់ DNA ដាយណូស័របួនផ្សេងគ្នាដូចជា Giganotosaurus, Rugops, Majungasaurus និង Carnotaurus ដើម្បីទាក់ទាញអ្នកទស្សនា។

ទីបំផុតវាបានវិវឌ្ឍខ្លួនធំគួរឱ្យខ្លាច និងក្លាយជាដាយណូស័រអាក្រក់ អុកឡុក សម្លាប់មនុស្សពេញឧទ្យាន។ ពិតជាសំណាងអាក្រក់ចំពោះ Claire ណាស់ ព្រោះថានៅថ្ងៃក្មួយប្រុសទាំងពីររបស់នាង ទៅលេងឧទ្យាននោះ ចំពេលដែល Indominus rex រួចចេញពីទ្រុង។ នាងនិងតួឯកប្រុស Owen Grady ក៏បាននាំគ្នាជិះឡានកាត់ព្រៃតាមរកពួកគេ។

ដោយសារមនុស្សស្លាប់ច្រើនពេក Owen អ្នកហ្វឹកហាត់ណាយណូស័រនៃឧទ្យានខាងលើ បានប្រើណាយណូស័របួនក្បាលដែលខ្លួនបង្កើត ឈ្មោះ Blue, Charlie, Delta and Echo តាមរកដើម្បីសម្លាប់ Indominus rex ចោលវិញ។ មិនអាចធ្វើអ្វីបាន ជម្រើសចុងក្រោយ Claire បានបញ្ជាឱ្យ Lowery Cruthers អ្នកប្រតិបត្តិពិសោធន៍បច្ចេកវិទ្យា បើកទ្រុងទី៩ ដើម្បីឱ្យណាយណូស័រធំមួយក្បាលទៀត ចេញមកជួយសម្លាប់ Indominus rex។

យប់មិញនេះក៏មានវត្តមានតារាចម្រៀងមកពីផលិតកម្មហង្សមាស លោក ណុប បាយ៉ារិទ្ធិ និងកញ្ញា ទេព បូព្រឹក្សចូលទស្សនាដែរ៕