ជំងឺផ្លូវដង្ហើមគ្មានថ្នាំព្យាបាល MERS រីករាលដាលដល់ថៃហើយ

2015-06-19 15:33:46
ចំនួនមតិ 0 | ចំនួនចែករំលែក 0

ចន្លោះមិនឃើញ

សារព័ត៌មាន Bangkok Post បានចុះផ្សាយថា ប្រទេសថៃទើបមានអ្នកឆ្លងជំងឺផ្លូវដង្ហើម MERS ទីមួយ បន្ទាប់ពីបុរសម្នាក់ធ្វើដំណើរមកពីតំបន់មជ្ឈិមបូព៌ា។ នេះបើតាមការបញ្ជាក់របស់លោក Rajata Rajatanavin ដែលជារដ្ឋមន្ត្រីក្រសួងសុខាភិបាលរបស់ប្រទេសថៃ កាលពីថ្ងៃព្រហស្បតិ៍ម្សិលមិញ។

លោក Rajatanavin បាននិយាយថា បុរសម្នាក់មានផ្ទុកជំងឺផ្លូវដង្ហើម MERS ពេលធ្វើដំណើរមកពីប្រទេសមួយក្នុងតំបន់មជ្ឈិមបូព៌ាចូលប្រទេសថៃ កាលពីថ្ងៃទី១៥ ខែមិថុនា។ រដ្ឋមន្ត្រីក្រសួងសុខាភិបាលរូបនេះ បានបញ្ជាក់ទៀតថា បុរសរងគ្រោះវ័យ ៧៥ឆ្នាំ ត្រូវបានដាក់ឲ្យនៅដាច់ឆ្ងាយពីគេនៅវិទ្យាស្ថានជំងឺឆ្លង Bamrasbaradura ក្នុងខេត្ត Nonthaburi។

បុរសឆ្លងជំងឺ MERS បានធ្វើដំណើរជាមួយសមាជិកក្រុមគ្រួសារបីនាក់ទៀត ដែលកំពុងដាក់ឲ្យស្ថិតនៅក្រោមការឃ្លាំមើល។ ក្រៅពីនេះ មនុស្ស ៥៩នាក់ទៀត ដែលមានជាប់ពាក់ព័ន្ធជាមួយអ្នកជំងឺ ដូចជាអ្នកដំណើរលើយន្តហោះ និងអ្នកបើកតាក់ស៊ី ក៏ត្រូវដាក់ឲ្យនៅក្រោមការត្រួតពិនិត្យដែរ។

បន្ទាប់ពីមានករណីទីមួយនេះ ថៃនឹងក្លាយជាប្រទេសទី២៦ រងការវាយប្រហារដោយជំងឺគ្មានថ្នាំព្យាបាល MERS ដែលរីករាលដាលដំបូងនៅតំបន់មជ្ឈិមបូព៌ាក្នុងឆ្នាំ២០១២។ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានប្រាប់ប្រជាជនកុំឲ្យមានការភ័យស្លន់ស្លោ ចំពោះការរកឃើញករណីឆ្លងដំបូងក្នុងប្រទេសនេះ។

បច្ចុប្បន្ន ជំងឺផ្លូវដង្ហើម MERS កំពុងរីករាលដាលខ្លាំងនៅកូរ៉េខាងត្បូង បន្ទាប់ពីអ្នកជំនួញម្នាក់ធ្វើដំណើរមកពីតំបន់មជ្ឈិមបូព៌ា កាលពីចុងខែឧសភា។ អ្នកស្លាប់ដោយជំងឺនេះ បានកើនឡើងដល់ ២៤នាក់ និងមានអ្នកឆ្លង ១៦៦នាក់ផ្សេងទៀត។ ចំណែកនៅប្រទេសអាល្លឺម៉ង់ ក៏ប្រកាសពីអ្នកស្លាប់ដោយជំងឺឆ្លងយ៉ាងឆាប់រហ័សនេះផងដែរ៕