Arnold បន្លំខ្លួនជាមនុស្សក្រមួនបន្លាច Fan ពេញសារមន្ទីរក្រមួន

2015-06-19 18:41:49
ចំនួនមតិ 0 | ចំនួនចែករំលែក 0

ចន្លោះមិនឃើញ

Arnold បានត្រឡប់មកជាថ្មី តែលើកនេះមិនមែននៅលើកញ្ចក់កុនទេ គឺនៅខាងក្រៅតែម្ដង។ តារាសម្ដែងវ័យ ៦៧ ឆ្នាំបានបន្លាចអ្នកចូលទស្សនាសារមន្ទីរក្រមួន Madame Tussauds ក្នុងទីក្រុង Hollywood ឲ្យភ័យលស់ព្រលឹងគ្រប់គ្នា។

ដើម្បីឲ្យមើលទៅដូចពិត អតីតចៅហ្វាយក្រុង California បានឲ្យអ្នកតុបតែងមុខអាជីព តុបតែងឲ្យដូចពាក់កណ្ដាលមនុស្សយន្ត និងពាក់កណ្ដាលមនុស្សដូចក្នុងរឿង "The Terminator"។ ក្រោយមករូបគាត់បានឈរនៅក្នុងសារមន្ទីរយ៉ាងនឹងដូចរូបក្រមួនរបស់តារាផ្សេងទៀត ពេលមនុស្សម្នាចូលទៅថតជិត គាត់បានបញ្ចេញកាយវិការធ្វើឲ្យអ្នកចូលទៅថតភ្ញាក់ និងរត់ចេញគ្រប់គ្នា។

តាមពិតទៅគោលបំណង នៃការពញ្ញាក់អ្នកគាំទ្រនេះគឺដើម្បីផ្សព្វផ្សាយពីគម្រោង After-School All-Stars ដែលគាត់បានបង្កើតអស់ ២៣ ឆ្នាំមកហើយ។ គម្រោងនេះគឺបង្កើតឡើងដើម្បីជួយដល់យុវវ័យមានបញ្ហាថវិកាលើការអប់រំ។ គាត់បញ្ជាក់ថា នៅពេលដែលមនុស្សម្នាកាន់តែរីករាយនឹងសកម្មភាពគាត់គឺ កាន់តែស្វែងយល់ពីគម្រោងមនុស្សធម៌ខាងលើ ដូច្នេះសម្រាប់គាត់គឺពិតជាមានតម្លៃ។