ភិន សុដាលីស ក្តាប់បានតំណែងពិធីការិនីថ្មីនៅ PNN

2015-06-22 23:05:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ភិន សុដាលីស ដែលក្ដាប់បានតំណែងតួឯកជាច្រើនរឿងនៅផលិតកម្មមហាហង្សរបស់ឪពុកនាង លោក អិន សុភិន នោះ ថ្មីៗនេះ ដាលីស ទទួលបានអាជីពជាពិធីការនីថ្មីបន្ថែមនៅក្នុងប៉ុស្តិ៍ទូរទស្សន៍ PNN ក្នុងកម្មវិធី Teen Talk ។

ដាលីស បាន Sabay មុននឹងថា ៖ "ចាសបងឆាប់ៗខាងមុខនេះខ្ញុំនឹងត្រៀមចេញមុខ និងចាប់អាជីពថ្មីបន្ថែមនៅទូរទស្សន៍ PNN គឺធ្វើជាពិធីការិនីណាបង"។ បើទោះមិនទាន់ដល់ថ្ងៃចាក់ផ្សាយ ប៉ុន្តែកម្មវិធីខាងលើនេះ បានថតទុកមួយចំនួនរួចហើយ។

ពាក់ព័ន្ធនឹងការងារនេះ ភិន សុដាលីស បានប្រាប់ថា មានការពិបាកព្រោះមិនដែលធ្លាប់ឆ្លងកាត់ពីមុនមក ៖"អូបង...ធ្លាប់តែជាតារាសម្ដែងឥឡូវមកធ្វើជាពិធីការិនីវិញដូចជាពិបាកដែរបងព្រោះអ្វីៗមានលក្ខណៈថ្មីហើយត្រូវនិយាយយ៉ាងណាឲ្យមានភាពស៊ីចង្វាក់ជាមួយដៃគូ និងធ្វើឲ្យទស្សនិកជនបានយល់ពីអ្វីដែលយើងចង់ផ្តល់ទៅឲ្យពួកគាត់"។

ស្រីស្រស់ ដាលីស បន្ត៖ "ការនិយាយរបស់ខ្ញុំមិនទាន់ចេះលើកដាក់សម្លេងបានល្អទេនិយាយទៅខ្ញុំនៅមានការខ្វះខាតច្រើនប៉ុន្តែខ្ញុំនឹងព្យាយាមហ្វឹកហាត់និងរៀនសូត្រតាមរៀមច្បងមួយចំនួន"។

ចំពោះការចាប់ធ្វើជាពិធីការិនីថ្មីនេះ គឺជាការឥតព្រៀងទុកព្រោះពេលនោះខាងអ្នកដឹកនាំរបស់ទូរទស្សន៍ PNN កំពុងតែរកពិធីការនីណាមានវ័យក្មេងហើយស្អាតសមជាមួយកម្មវិធីប៉ុន្តែរកមិនបាន។ តែចៃដន្យ ខណៈពេលមួយក៏បានជួបនឹង ដាលីស ទើបហៅរូបនាងទៅសាកជាមួយនឹងកាមេរ៉ានិងចាប់ផ្តើមធ្វើតេស្ដសម្លេង ក៏ត្រូវអ្នកដឹកនាំទទួលយកបានតែម្ដង។ នេះបើតាម ដាលីស បញ្ជាក់។

ថ្វីត្បិតថា នេះជាការថ្មីសម្រាប់ ដាលីស ប៉ុន្តែនាងមានភាពជឿជាក់នឹងសង្ឃឹមថានឹងទទួលបានជោគជ័យ ព្រោះកម្មវិធីមានលក្ខណៈសប្បាយៗត្រូវនឹងនាង ជាមនុស្សចូលចិត្តសប្បាយដែរ។

ដាលីស កូនស្រីរបស់ម្ចាស់ផលិតកម្មមហាហង្ស ត្រូវបានទស្សនិកជនសង្កេតឃើញថាជាតារាដែលក្តាប់បានតំណែងតួឯកជាច្រើនរឿងដូចជា "ពេជ្រក្នុងបេះដូង”, "ឆ្អែតចិត្ត”, "អច្ឆរិយស្នេហ៍”, "អព្ភូតហេតុស្នេហ៍" ,"រលកបោកខ្សាច់" និងរឿង"អាព្រឿងងាប់ហើយ" ព្រមទាំងលេចមុខតាមឈុតខារ៉ាអូខេរបស់ផលិតកម្មល្បីៗជាច្រើនទៀត៕

អត្ថបទ៖ ថា ម៉ាលីដា