យូរហើយ យ៉ាដាវ អត់មានឡានផ្ទាល់ខ្លួន ឥឡូវកំពុងប្រឹងសន្សំ

2015-07-07 17:14:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ងាត់ៗតារាសម្ដែង អេន យ៉ាដាវ បានបង្ហើបថា នាងកំពុងសន្សំប្រាក់បានមកពីការងារសម្ដែងរបស់នាងទុកទិញរថយន្តធុនកណ្ដាលមួយគ្រឿង ក្រោយប្រឡូកយូរហើយនៅមិនទាន់មានជារបស់ផ្ទាល់ខ្លួន។

ស្រីស្រស់រាងរាវរូបនេះ ប្រាប់ថា កន្លងមកនេះ នាងប្រើតែរថយន្តរបស់គ្រួសារ ដែលជួនកាលខ្ចីរថយន្តម៉ាកកាមេរីបាឡែនរបស់ប្អូនជីដូនមួយ ជួនរថយន្ត Lexus គ្រួសារ។ "ពិបាកណាស់ របស់គេមិនដូចរបស់យើងទេ បងប្អូនគេមិនកំណាញ់ទេ តែជួនយករបស់គេ ចំគេរវល់ដែរ គឺពិបាកមែនទែន អីចឹងហើយមានតែសន្សំទិញខ្លួនឯងទេ បានស្រួល"។ យ៉ាដាវ ថ្លែង។

តាមគម្រោងខាងលើ តារាស្រីក្នុងរឿង "ខ្ញុំថាខូច ខូចមែន" រូបនេះ កំពុងប្រឹងសន្សំប្រាក់ ដោយនាងត្រូវការខ្ទង់ជាង ១ម៉ឺន ទៅ ២ម៉ឺនដុល្លារដើម្បីដើរមើលរថយន្តមួយគ្រឿង ហើយឥឡូវជិតគ្រប់ហើយ។ "ប្រឹងសន្សំណាស់សព្វថ្ងៃ រកបាន ៥០ ចាយវិញ ១០០។ ហាហា....និយាយលេងទេ ខំសន្សំមែន មិនសូវហ៊ានចំណាយផ្ដេសផ្ដាសទេបង ព្រោះមិនចង់ពាក់ព័ន្ធលុយអ្នកផ្ទះ"។

រថយន្តក្នុងក្ដីស្រមៃរបស់ យ៉ាដាវ គឺកាមេរីបាឡែន ដូចនឹងអ្វីដែលធ្លាប់ប្រើប្រាស់កន្លងមកនេះដែរ។ នាងប្រាប់ថា ចង់បានរថយន្តប្រភេទនេះ ដោយសារធ្លាប់ប្រើ ឃើញថាគួរឲ្យពេញចិត្តផ្សំនឹងតម្លៃមិនខ្ពស់ហួសសមត្ថភាពនាងពេកផង ទើបចង់បានជារបស់ខ្លួនឯង។

ដាវ ថ្លែងថា "ពីមុនជិះអាបាឡែនដែរ តែជារបស់គេ ឥឡូវចង់ទិញអាបាឡែនអីហ្នឹងទៀត ធ្វើជារបស់ខ្លួនឯង តែមិនដឹងបានឆាប់ៗហ្នឹង ឬយ៉ាងណាទេបងអ្ហើយ!"។

តារាស្រីដែលទើបត្រូវគេបង្ខូចតាម Facebook ថាជានារីលក់ខ្លួនរូបនេះ រថយន្តក៏នាងត្រូវការ ប៉ុន្តែក៏នៅមានកិច្ចការជាច្រើនទៀត ដែលនាងត្រូវធ្វើហើយត្រូវប្រើប្រាស់ប្រាក់សន្សំទាំងនោះដែរ។ ដូច្នេះហើយ នាងមិនទាន់ប្រាកដខ្លួនឯងឡើយថា អាចកើតឡើងក្នុងពេលឆាប់ៗនេះ។ "ប្រហែលជាមិនអាចឆាប់ តែជួនកាលក៏អាចឆាប់ៗហ្នឹងក៏ថាបានដែរ។ និយាយទៅ នឹងខំឲ្យទាល់តែបាន!"៕