កម្ពុជាឈ្នះម៉ាឡេស៊ី ៥-៣ ប្រកួតមិត្តភាពកម្តៅសាច់ដុំ

2015-07-13 19:20:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាអេឡិចត្រូនិក (Esports) កម្ពុជាបានប្រកួតឈ្នះក្រុមម៉ាឡេស៊ីដោយលទ្ធផល ៥ ទល់នឹង ៣ ក្នុងជំនួបមិត្តភាពអន្តរជាតិកាលពីម្សិលមិញនៅ TheArena។

ឆ្លងកាត់តាមការប្រកួតយ៉ាងស្វិតស្វាញអស់រយៈពេលពេញមួយថ្ងៃជាលទ្ធផលក្រុមខ្លាំងរបស់កម្ពុជាទាំងពីរ YouWillKnow និង Crimianl X បានប្រកួតឈ្នះ៥ហ្គេម ខណៈក្រុមម៉ាឡេស៊ីឈ្នះតែ៣ហ្គេមប៉ុណ្ណោះក្នុងការប្រកួតសរុបចំនួន៨ហ្គេម។

ខាងក្រោមនេះជាតារាងពិន្ទុនៅក្នុងការប្រកួតនីមួយៗ។

ក្រុមកម្ពុជា	ពិន្ទុ		ក្រុមម៉ាឡេស៊ី	ផែនទីប្រកួត	Server
YouWillKnow	5	0	EDP RoG	Huangpu Terminal	កម្ពុជា
YouWillKnow	5	2	EDP RoG	Nile Delta	កម្ពុជា
YouWillKnow	5	4	Team Emo	Sea-Maid Town	ម៉ាឡេស៊ី
YouWillKnow	4	5	Team Emo	Dragon World	ម៉ាឡេស៊ី
CriminalX	4	5	EDP RoG	Sea Maid Town	ម៉ាឡេស៊ី
CriminalX	3	5	EDP RoG	Dragon World	ម៉ាឡេស៊ី
CriminalX	5	1	Team Emo	Huangpu Terminal	កម្ពុជា
CriminalX	5	0	Team Emo	Sea Maid Town	កម្ពុជា

ក្រោយការប្រកួតនេះ BlueX ប្រធានក្រុម YouWillKnow របស់កម្ពុជាបានលើកឡើងថា៖ «នេះជាការប្រកួតដ៏អស្ចារ្យមួយហើយក្រុមរបស់ខ្ញុំធ្វើមិនទាន់បានល្អនៅឡើយទេ ជាពិសេសនៅមានបញ្ហាច្រើនគឺនៅត្រង់ការសហការគ្នាជាក្រុមពោលគឺមិនទាន់យល់ចិត្តគ្នាព្រោះយើងទើបធ្វើការផ្លាស់ប្ដូរសមាជិកថ្មីមួយរូប ដូច្នេះតាមរយៈការប្រកួតនេះជាមេរៀនសម្រាប់ត្រៀមខ្លួនការប្រកួតពានរង្វាន់ CCC2015 នៅពេលខាងមុខ»។

ជាមួយនឹងទឹកមុខញញឹមញញែម LeOn ប្រធានក្រុម CiminalX បាននិយាយថា៖ «ពួកខ្ញុំមានភាពសប្បាយរីករាយមែនទែន ទោះបីបញ្ចប់លទ្ធផលត្រឹមឈ្នះ២នឹងចាញ់២ក៏ដោយ តែអ្វីដែលសំខាន់គឺក្រុមខ្ញុំបានប្រកួតជាមួយក្រុមខ្លាំងៗរបស់ម៉ាឡេស៊ីទាំងពីរព្រោះពួកគេជាក្រុមជើងឯកប្រចាំប្រទេសផង»។

ក្រុមខ្លាំងកម្ពុជាទាំងពីរក៏សូមថ្លែងអំណរគុណដល់ Sabay ដែលបានរៀបចំការប្រកួតនេះឡើងដែលបានផ្តល់ឱកាសដល់ពួកគេសាកសមត្ថភាពទល់ក្រុមខ្លាំងជាអន្តរជាតិ ដើម្បីត្រៀមចូលរួមក្នុងការប្រកួតជើងឯកប្រចាំប្រទេសនាពេលខាងមុខ។