តារា ៣ រូបនេះ ទទួលងារជាឯកអគ្គរាជទូតសុឆន្ទៈ របស់អង្គការអន្តរជាតិក្នុងឆ្នាំ ២០១៥

2015-07-15 16:17:25
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការកត់សម្គាល់ថា ឆ្នាំ ២០១៥ នេះ មានអ្នកសិល្បៈខ្មែរ ៣ ដួង បានទទួលងារជាឯកអគ្គរាជទូតសុឆន្ទៈប្រចាំកម្ពុជារបស់អង្គការអន្តរជាតិនានា ក្រោយពួកគេបានធ្វើសកម្មភាពជួយសង្គមយ៉ាងផុលផុសកន្លងមក។ តើមានតារារូបណាខ្លះទៅហ្ន?

១. មាស សុខសោភា៖ បានទទួលងារជាឯកអគ្គរាជទូតសុឆន្ទៈ របស់អង្គការមនុស្សធម៌កូរ៉េមានឈ្មោះថា W Foundation/ Cambodia កាលពីថ្ងៃទី ៣០ មិថុនា ២០១៥ តាមរយៈគម្រោងមួយហៅថា HIP។ គម្រោងនេះផ្ដោតសំខាន់លើការថែទាំ និង អប់រំសុខភាពដល់កម្មការិនីខ្មែរ កំពុងបំពេញការងារនៅរោងចក្រកាត់ដេរកូរ៉េក្នុងប្រទេសកម្ពុជា។

ក្រៅពីគម្រោងនេះ សោភា ក៏ត្រូវបានគេកត់សម្គាល់ឃើញថា តែងចុះទៅដល់ផ្ទះប្រជាពលរដ្ឋ និង កុមារក្រីក្រជាញឹកញាប់ដើម្បីសួរសុខទុក្ខ និង នាំអំណោយសង្គ្រោះខ្លះផងដែរ។ តារាចម្រៀងរូបនេះ ក៏ធ្លាប់បានទៅដល់ឃុំរកា ស្រុកសង្កែ ខេត្តបាត់ដំបង ដើម្បីសួរសុខទុក្ខ និង លើកទឹកចិត្តដល់ប្រជាពលរដ្ឋមានផ្ទុកមេរោគអេដស៍នៅទីនោះ។

២. មាន សូនីតា៖ ត្រូវបានប្រកាសទទួលងារជាឯកអគ្គរាជទូតសុឆន្ទៈ របស់អង្គការ USAID កាលពីថ្ងៃទី ១០ មិថុនាកន្លងទៅនេះ តាមរយៈគម្រោងមួយឈ្មោះថា CITP ដោយមិនបានត្រៀមខ្លួនជាមុនទេ។ គម្រោងនេះមានគោលបំណងអប់រំផ្សព្វផ្សាយពីចំណាកស្រុក ប្រកបដោយសុវត្ថិភាព និង បង្ការអំពើជួញដូរមនុស្សនៅប្រទេសកម្ពុជា ដែលត្រូវចុះទៅកាន់ខេត្តគោលដៅចំនួន ៥។

តារាថ្ពាល់ខួចវ័យ ២៥ ឆ្នាំខាងលើ តែងចុះទៅជួបកុមារ ឬប្រជាពលរដ្ឋក្រីក្រតាមមូលដ្ឋានជនបទផងដែរ ដែលជាផ្នែកមួយនៃកិច្ចការមនុស្សធម៌របស់នាង និង ផ្សព្វផ្សាយពីក្រមាខ្មែរជារឿយៗ ដោយអះអាងថា កិច្ចការមនុស្សធម៌ជាក្ដីស្រមៃរបស់នាង។

៣. សាវីន ហ្វីលីប៖ ប្រសិនបើមិនមានការប្រែប្រួលទេនោះ តារាសម្ដែងវ័យ ៤៣ ឆ្នាំ រូបនេះ នឹងទទួលការតែងតាំងជាផ្លូវការពីអង្គការ CGF Foundation របស់ប្រទេសបារាំង ក្នុងនាមជាឯកអគ្គរាជទូតសុឆន្ទៈប្រចាំប្រទេសកម្ពុជា។ អង្គការនេះមើលឃើញថា តារាសម្ដែងតួឪពុក និង បងធំខាងលើ បានធ្វើសកម្មភាពមនុស្សធម៌ជាច្រើន នៅក្នុងសង្គមរួមមានការសាងសង់អណ្ដូងទឹក ឬផ្ទះសម្បែងដល់ចាស់ជរា, ជនក្រីក្រ និងជួយសង្គ្រោះកុមារជាដើម។

សាវីន ហ្វីលីប បញ្ជាក់ថា បើនិយាយពីអណ្ដូងទឹកស្អាត លោកបានសាងសង់ជាង ១០០ កន្លែងហើយ ក្នុងនោះនៅខេត្តតាកែវចំនួន ៣៥ និង ខេត្តសៀមរាបចំនួន ៦៧ អណ្ដូង៕