ផុតពីលក់លៀសលេងៗ តារាសម្ដែង យ៉ាដាវ ងាកមកបើកកន្លែងលក់ម្ជូរមែនទែន

2015-07-24 13:31:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ផុតពីការសម្ដែងធ្វើជាអ្នកលក់លៀសលេងៗក្នុងរឿង អេន យ៉ាដាវ ដែលបានបើកអាជីវកម្មហាងសាឡន ឈ្មោះ "យ៉ាដាវសាឡន" មួយហើយនោះ បានងាកមកបើកកន្លែងលក់ម្ជូរមែនទែនវិញម្ដង។

“លក់លៀស គឺជាការសម្ដែងក្នុងរឿង ប៉ុន្តែម្ជូរ មិនមែនជាការសម្ដែងទេ គឺលក់មែនទែនបង បន្ថែមពីលើហាងសាឡនដែលនៅដំណើរធម្មតា"។ យ៉ាដាវ ថ្លែងមកកាន់ Sabay។

ស្រីស្អាតរូបនេះ បញ្ជាក់ថា បើមិនមានអ្វីប្រែប្រួលទេ កន្លែងលក់ម្ជូររបស់នាងយីហោ "យ៉ាដាវជូរអែម" មានទីតាំងបណ្ដោយផ្លូវត្រសក់ផ្អែមនឹងបង្ហាញវត្តមានបម្រើប្រិយមិត្តដែលចូលចិត្តរបស់ជូរៗកំដរមាត់ ឬហៅថាម្ជូរនេះ ក្នុងរង្វង់ពីរបីថ្ងៃខាងមុខ ដោយមានលក់គ្រប់មុខពាក់ព័ន្ធនឹងម្ជូរ។ បច្ចុប្បន្ន នាងកំពុងរៀបចំ ធ្វើអំបិលម្ទេស ប្រហុក កាពិ និងទិញចូលរបរប្រើប្រាស់ដែលពាក់ព័ន្ធនានា។

របរលក់ម្ជូរ "យ៉ាដាវជូរអែម" គឺជាការងារបន្ថែមមួយ ដែលយ៉ាដាវធ្វើ ដើម្បីពង្រីកជីវភាព បន្ថែមពីលើអ្វីដែលនាងមានស្រាប់ គឺអាជីពជាតារាសម្ដែង ដោយនាងបានសម្ដែងខារ៉ាអូខេ និងភាពយន្តជាច្រើន។ រឿងចុងក្រោយរបស់នាង គឺរឿង "ខ្ញុំថាខូច ខូចមែន" ត្រៀមនឹងចាក់បញ្ចាំងក្នុងពេលឆាប់ៗ ក្នុងនោះនាងសម្ដែងជាអ្នកលក់លៀស។ ក្រៅពីនេះនាងមានហាងសាឡន ដែលដំណើរយូរហើយ។

តារាស្រីរមែងថតរូបបង្ហាញរាងល្វតល្វន់បង្ហោះលើ Facebook រូបនេះ ថ្លែងថា "បើយើងមិនខំប្រឹងជួយខ្លួនឯង តើនរណានឹងជួយយើង ហើយនេះជារបរបន្ថែមជាជាងទុកពេលទំនេរអត់ប្រយោជន៍"។ យ៉ាងណា យ៉ាដាវ បញ្ជាក់ថា ហាងសាឡនរបស់នាង ក៏មានអតិថិជនមិនដាច់ដែរ។

ការងាកមកបើកមុខរបរបន្ថែមបែបសាមញ្ញ ខណៈខ្លួនឯងគឺតារាមួយរូបនេះ យ៉ាដាវ ប្រាប់ថា នាងហេតុផលបី។ ទី១ មុខរបរនេះតូច ចាយទុនទិចងាយស្រួលគ្រប់គ្រង ទី២ ជាចំណូលចិត្តរបស់នាងដែលចូលចិត្តម្ជូរ និងមើលឃើញថាមនុស្សភាគច្រើនចូលរបស់ទាំងនេះញុំាកំដរមាត់។ ឯទី៣ នាងអាចដាក់លក់នៅមុខហាងសាឡននាងតែម្ដង ដែលក្នុងពេលតែ១អាចមើលមុខរបរពីរបាន។

ជាមួយគ្នានេះដែរ តារាស្រីមានវ័យ ២៣ឆ្នាំរូបនេះ អះអាងថា មិនខ្លាចប៉ះពាល់ងារជាតារាតែមកលក់របស់តាមចិញ្ចើមថ្នល់នោះឡើយ។ ផ្ទុយទៅវិញ នាងគិតថា ភាពជាអ្នកសិល្បៈរបស់នាង នឹងជួយឲ្យមុខរបរសាមញ្ញរបស់នាង កាន់តែមានប្រជាប្រិយភាព៕