ពានរង្វាន់ហ្វូតសាលរីកដុះដាលដូចផ្សិត

2014-10-14 16:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនមានតែតារាងបាល់ទាត់ហ្វូតសាលស្មៅសិប្បនិម្មិតប៉ុណ្ណោះទេ ដែលមានការរីកដុះដាលយ៉ាងឆាប់រហ័សនៅរាជធានីភ្នំពេញ ប៉ុន្តែទន្ទឹមនឹងនេះការប្រកួតដណ្ដើមពានរង្វាន់ហ្វូតសាលក៏កើតមានឡើងស្ទើរតែនៅគ្រប់តារាងស្មៅសិប្បនិម្មិតទាំងនោះដែរ។

បច្ចុប្បន្នមានម្ចាស់តារាងបាល់ទាត់ស្មៅនិម្មិតជាច្រើនបានបង្កើតពានរង្វាន់នៅតាមតារាងរបស់ខ្លួនដើម្បីឲ្យក្រុមនានាចូលរួមប្រកួតប្រជែងក្នុងគោលបំណងបង្កើតមិត្តភាព សាមគ្គីភាព និងជួយធ្វើឲ្យវិស័យកីឡាបាល់ទាត់នៅកម្ពុជាកាន់តែផុលផុសថែមទៀត។ បន្ថែមលើនេះ នៅតាមបណ្ដាគ្រឹះស្ថានសិក្សា អង្គការ សមាគម និងបុគ្គលជាច្រើនបានរួមគ្នាបង្កើតជាពានរង្វាន់ហ្វូតសាលដើម្បីបង្កើនភាពស្និទ្ធស្នាលរវាងគ្នានិងគ្នា។

ជាក់ស្ដែងម្ចាស់តារាងបាល់ទាត់ស្មៅសិប្បនិម្មិត មិង ហួរ ទើបបាននឹងបង្កើតពានរង្វាន់មួយឈ្មោះ មិង ហួរ ហ្វូតសាល ដែលបើកចំហឲ្យក្រុមនានាអាចដាក់ពាក្យចូលរួមប្រកួតបាន ហើយចំនួនក្រុមដែលទទួលសរុបរហូតដល់៣២ក្រុម និងចាប់ទទួលពាក្យចុះឈ្មោះក្រុមចូលរួមចាប់ពីថ្ងៃទី០១ ខែតុលា ឆ្នាំ២០១៤នេះតទៅ។

តារាង មិង ហួរ ប្រកាសរកក្រុមចូលរួមប្រកួត

ងាកទៅមើលមជ្ឈមណ្ឌលកីឡាស្រ៊ីជី ដែលមានតារាងបាល់ទាត់ស្មៅសិប្បនិម្មិតជាច្រើន ហើយមានសកម្មភាពមរមារញឹករៀងរាល់ថ្ងៃនោះវិញក៏គេឃើញមានការប្រកួតដណ្ដើមពានរបស់តារាងផ្ទាល់តែម្ដងគឺ 3G ហ្វូតសាលលីក និងមានពានរង្វាន់ជាច្រើនទៀត ដែលធ្វើការប្រកួតនៅទីនោះដែរ ដូចជា ការប្រកួតពានរង្វាន់លីកហ្វូតសាលសាកលវិទ្យាល័យបញ្ញាសាស្ត្រកម្ពុជា ការប្រកួតពានរង្វាន់ Sponsor Cup ជាដើម។

សកម្មភាពប្រកួតដណ្ដើមពានរង្វាន់នៅតារាង 3G

តារាងនៅម្ដុំទួលគោកឯណោះវិញក៏មានសកម្មភាពយ៉ាងសកម្មជាមួយនឹងការប្រកួតដណ្ដើមពាននៅតាមតារាងមួយៗដែរដូចជា តារាង Premire Sport Club ដែលមានក្រុមនិស្សិតមកពីសាកលវិទ្យាល័យនានាសហការគ្នាបង្កើតជាពានរង្វាន់ដើម្បីធ្វើការប្រកួតប្រជែង។

សកម្មភាពប្រកួតនៅតារាង Premier Sport Club

ក្រៅពីនេះក៏នៅមានតារាងបាល់ទាត់ស្មៅសិប្បនិម្មិតជាច្រើនផ្សេងទៀត ដែលកំពុងមានសកម្មភាពយ៉ាងមមារញឹកក្នុងការប្រកួតដណ្ដើមពានរង្វាន់របស់ខ្លួន និងពានរង្វាន់ជាច្រើនទៀត។ បច្ចុប្បន្នបច្ចុប្បន្ននេះតារាងបាល់ទាត់ស្មៅសិប្បនិម្មិតក៏បានរីកដុះដាលនៅតាមបណ្ដាខេត្តធំៗមួយចំនួនដែរ រួមមានខេត្តកណ្ដាល ខេត្តស្វាយរៀង ខេត្តសៀមរាបជាដើម។

អត្ថបទ៖ អៀង សូទ្រី