កូរ៉េខាងត្បូង ប្រកាសថាអស់ជំងឺ MERS ហើយ

2015-07-28 17:58:48
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃអង្គារនេះ ប្រទេសកូរ៉េខាងត្បូងបានប្រកាសថា ជំងឺផ្លូវដង្ហើមមជ្ឈឹមបូពា៌ MERS បានបញ្ចប់ការរីករាលដាលហើយ ក្រោយឆក់យកជីវិតមនុស្សអស់៣៦នាក់។ នេះបើយោងតាម ការចុះផ្សាយរបស់សារព័ត៌មាន Korea Herald។

នៅក្នុងកិច្ចប្រជុំនាទីក្រុងសេអ៊ូល ថ្ងៃទី២៨នេះ លោកនាយករដ្ឋមន្ត្រីកូរ៉េខាងត្បូង Hwang Kyo-ahn បានប្រកាសជាផ្លូវការថាជំងឺផ្លូវដង្ហើមមរណៈនេះបានបញ្ចប់ការរីករាលដាលហើយ និងបានសុំឲ្យសាធារណជនរីករាយនឹងសកម្មភាពប្រចាំថ្ងៃរបស់ពួកគេឡើងវិញ។ យ៉ាងណាក្ដី ការប្រកាសបញ្ចប់ជាផ្លូវការ រំពឹងថានឹងធ្វើឡើងនៅចុងខែសីហា ដោយសារអង្គការសុខភាពពិភពលោក តម្រូវឲ្យនៅចាំមើលសភាពការណ៍រយៈពេល២៨ថ្ងៃ ក្រោយអ្នកជំងឺចុងក្រោយជាសះស្បើយ។

ដោយឡែករដ្ឋាភិបាលក្រុងសេអ៊ូលបានបន្ថែមទឹកប្រាក់ចំនួន៩,៩ពាន់លានវុន (ជាង៨លានដុល្លារ) សម្រាប់ចំណាយក្នុងការទប់ស្កាត់ជំងឺ MERS កុំឲ្យកើតឡើងជាថ្មីផងដែរ។

គួរបញ្ជាក់ផងដែរថា ជំងឺផ្លូវដង្ហើមមជ្ឈិមបូព៌ាបានផ្ទុះឡើងដំបូងក្នុងប្រទេសកូរ៉េខាងត្បូងកាលពីថ្ងៃទី២០ ខែឧសភា។ ជំងឺមរណៈមួយនេះបានឆក់យកជីវិតមនុស្ស៣៦នាក់ និងមានអ្នកឆ្លងចំនួន១៨៦នាក់៕

ចុចអាន៖ អ្នកឆ្លងជំងឺ MERS ទីមួយនៅថៃបានជាសះស្បើយវិញហើយ

ប្រែសម្រួល៖ មាន រតនា ប្រភព៖ koreaherald, channelnewsasia