កីឡដ្ឋានស្វាយរៀងគ្រោងបើកសម្ពោធនៅថ្ងៃបុណ្យអុំទូក
- 2014-10-14 21:06:16
- ចំនួនមតិ 0 | ចំនួនចែករំលែក 0
កីឡដ្ឋានស្វាយរៀងគ្រោងបើកសម្ពោធនៅថ្ងៃបុណ្យអុំទូក
ចន្លោះមិនឃើញ
ទីលានបាល់ទាត់របស់ក្លិបបាល់ទាត់ខេត្តស្វាយរៀងគ្រោងនឹងបើកសម្ពោធជាផ្លូវការនៅថ្ងៃបុណ្យអុំទូកដើមខែក្រោយនេះហើយ បន្ទាប់ពីចំណាយពេលសាងសង់អស់រយៈពេលជាច្រើនខែកន្លងមក។ នេះបើតាមការឲ្យដឹងពីលោក អោក សំអាង អ្នកគ្រប់គ្រងក្លិបបាល់ទាត់ខេត្តស្វាយរៀង។
អ្នកគ្រប់គ្រងខាងលើបានលើកឡើងថា ឯកឧត្ដម ឌី វិជ្ជា ប្រធានក្លិបចង់ឲ្យស្តាតស្វាយរៀងបើកសម្ពោធជាផ្លូវការនៅថ្ងៃបុណ្យអុំទូក នៅដើមខែក្រោយនេះ។ ពិធីសម្ពោធនេះគ្រោងអញ្ជើញក្លិបបាល់ទាត់របស់វៀតណាមចំនួនបីមកធ្វើការប្រកួតមិត្តភាពក្នុងនោះរួមមានក្រុមខេត្ត ឡុងអាង(Long An) តៃនិញ(Tay Ninh) និងហូជីមិញ(Ho Chi Minh)។
លោក អោក សំអាង បានបញ្ជាក់ថា ហេដ្ឋារចនាសម្ព័ន្ធរបស់ក្លិបបាល់ទាត់ខេត្តស្វាយរៀងបានរៀបចំរួចរាល់ស្ទើរតែ១០០ភាគរយហើយនៅពេលនេះ ដោយតារាងស្មៅសិប្បនិម្មិតទំហំ ៦០ម៉ែត្រ គុណនឹង៤០ម៉ែត្រ បំពាក់ដោយបង្គោលភ្លើងបំភ្លឺពេលយប់ បានដាក់ឲ្យដំណើរការប្រហែល៤សប្ដាហ៍មកហើយ។ លោកបន្តថា តារាងស្មៅសិប្បនិម្មិតនេះក៏ធ្វើការជួលដល់សាធារណជនផងដែរ ហើយជួលក្នុងតម្លៃថោកសមរម្យទៀតផងគឺតម្លៃ ១៥,០០០រៀលក្នុងមួយម៉ោង។
ចំពោះទីលានធំសម្រាប់បម្រើឲ្យការប្រកួតផ្លូវការឯណោះវិញ គឺបានដាំស្មៅធម្មជាតិរួចរាល់ជាងមួយខែមកហើយ ហើយត្រូវរង់ចាំប្រហែល២ឬ៣សប្ដាហ៍ទៀត ដើម្បីឲ្យស្មៅក្រាស់ល្អ អាចកាត់បាន។ ក្រៅពីនេះ កន្លែងអង្គុយ កន្លែងស្នាក់នៅ ឬបន្ទប់ផ្លាស់សំលៀកបំពាក់ជាដើមក៏រៀបចំរួចរាល់អស់ហើយដែរ ប៉ុន្តែនៅសល់តែបង្គោលភ្លើងធំៗទាំង៤ប៉ុណ្ណោះ ដែលកំពុងរៀបចំដំឡើង។
ដោយឡែកដំណឹងដែលថា នឹងមានប្រកួតដណ្ដើមពានជាលក្ខណៈអន្តរជាតិនៅថ្ងៃបើកសម្ពោធផ្លូវការជាមួយក្លិបបណ្ដាប្រទេសអាស៊ាននោះគឺនឹងមិនមានទេនៅពេលនេះ ប៉ុន្តែគម្រោងនេះរង់ចាំការពិភាក្សាគ្នានៅពេលក្រោយ។
ស្វាយរៀងនឹងក្លាយជាក្លិបលីកដំបូងគេ ដែលមានលទ្ធភាពគ្រប់គ្រាន់ក្នុងការរៀបចំការប្រកួតលក្ខណៈក្នុងដី និងក្រៅដី(Home/Away) សម្រាប់រដូវកាល Metfone Cambodian League 2015 ខាងមុខនេះ បន្ទាប់ពីឯកឧត្ដម សៅ សុខា បានប្រកាសជាផ្លូវការថានឹងមានការប្រកួតក្នុងដី និងក្រៅដី សម្រាប់លីករដូវកាលក្រោយ៕
អត្ថបទ៖ អៀង សូទ្រី រូបថត៖ ក្លិបស្វាយរៀង
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
