អ្នក​នាង An So Hyun បាន​ធ្វើ​ដំណើរ​មក​​​កម្សាន្តប្រទេស​កម្ពុជា​នៅ​​​ឆ្នាំ ២០០៥។ ក្រៅ​ពី​ទាក់ចិត្ត​ទៅ​សម្រស់​ធម្មជាតិ​និង​សម្បត្តិ​វប្បធម៌​​ជា​កេរតំណែល​ដ៏​អស្ចារ្យ​​ជា​ច្រើន​​ អ្វី​ធ្វើ​ឲ្យ​អ្នក​នាង​ An So Hyun ដកចិត្ត​និង​ចាប់​អារម្មណ៍​ប្រទេស​កម្ពុជា​គឺ​ស្នាមញញឹម​ដ៏​រួសរាយ​រាក់ទាក់​របស់​ពលរដ្ឋ​ខ្មែរ​ ដែល​បង្ហាញ​ពី​កា​រស្វាគមន៍​ដល់​ភ្ញៀវ​ទេសចរ​ទាំង​ឡាយ​។

អ្នក​នាង An So Hyun (រូបខាង​ស្តាំ)

អ្នក​នាង An So Hyun ជា​មគ្គុទ្ទេស​ក៍​ទេសចរ​​​ប្រចាំ​ប្រទេស​កូរ៉េ។ អ្នក​នាង​​បាន​ដឹកនាំ​ភ្ញៀវ​ទេសចរ​ខ្មែរ​មួយ​ក្រុម​រួម​ទាំង​បណ្ដាញ​សារព័ត៌មាន​មួយ​ចំនួន ​ធ្វើ​ដំណើរ​ទេសចរ​​កម្សាន្ត​​ស្វែង​យល់​​ពី​សក្តានុពល​​ទេសចរ​ប្រទេស​កូរ៉េ​កាល​ពី​ពេល​ថ្មីៗ​នេះ។ ឆ្លៀត​ក្នុង​ពេល​នាំ​ភ្ញៀវ​ទេសចរ​ខ្មែរ​ទស្សនា​តំបន់​កម្សាន្ត​នានា​ជា​ច្រើន​ ​អ្នកនាងក៏​បាន​រំលឹក​ពី​ប្រវត្តិ​មក​ទស្សនា​ប្រទេស​កម្ពុជា ដែល​ធ្វើ​ឲ្យ​អ្នក​នាង​មិន​អាច​បំភ្លេច​បាន។

អ្នក​នាង An So Hyun បាន​ឲ្យ​ដឹង​ថា អ្នក​នាង​ធ្លាប់​ធ្វើ​ដំណើរ​វិស្សមកាល​មក​ប្រទេស​កម្ពុជា​ជា​លើក​ដំបូង​ក្នុង​អំឡុង​ឆ្នាំ ២០០៥។ ក្នុង​ពេល​ធ្វើ​ដំណើរ​កម្សាន្ត​ អ្នកនាង​ចាប់​អារម្មណ៍​ជា​ខ្លាំង​​ពី​សម្បត្តិ​វប្បធម៌​ដ៏​អស្ចារ្យ​នៃ​​ប្រទេស​កម្ពុជា​ និង​ភាព​រួសរាយ​រាក់ទាក់​នៃ​​ពលរដ្ឋ​ខ្មែរ​​ដែល​ធ្វើ​ឲ្យ​អ្នក​នាង​មាន​​ភាព​កក់ក្តៅ​សម្រាប់​ការមក​កម្សាន្ត​ប្រទេស​​កម្ពុជា​​ជា​លើក​ដំបូង​។

អ្នក​នាង​ថា ប្រទេស​កម្ពុជា​មាន​សម្បត្តិ​វប្បធម៌​ជា​ច្រើន មាន​ប្រាសាទ​អង្គរ​វត្ត​ដ៏​ស្រស់​ស្អាតជា​អច្ឆរិយ​របស់​ពិភពលោក ដែល​ធ្វើ​ឲ្យ​ជនជាតិ​ដទៃ​រួម​ទាំង​អ្នក​នាង​មាន​ការ​កោត​ស្ញប់ស្ញែង​ជា​ខ្លាំង។

[audio mp3="http://media.sabay.com/uploads/2015/08/Ah-Soo.mp3"][/audio]

អ្នក​នាង​ថា ដោយសារ​តែ​ភាព​សំបូរ​បែប​នៃ​ធនធាន​ធម្មជាតិ ក៏​ដូចជា​កេរដំណែល​ប្រវត្តិសាស្ត្រ​ជា​ច្រើន​ធ្វើ​ឲ្យ​ភ្ញៀវ​ទេសចរ​គ្រប់​ជាតិ​សាសន៍​នៅ​ជុំវិញ​ពិភពលោក​តែង​តែ​ស្រមៃ​ចង់​ស្គាល់​និង​មក​កម្សាន្ត​ប្រទេស​កម្ពុជា។

អ្នក​នាង​អះអាង​ថា អ្នក​នាង​​ក៏​កំពុង​មាន​​គម្រោង​​ធ្វើ​ដំណើរ​មក​ទស្សនា​ប្រទេស​កម្ពុជា​ជា​ថ្មី​ម្តង​ទៀតក្នុង​ពេល​អនាគត​ដ៏​ខ្លី​ខាង​មុខ បន្ទាប់​ពី​ទទួល​បាន​បទ​ពិសោធន៍​ដ៏​អស្ចារ្យ​សម្រាប់​ការ​ការ​ធ្វើ​ដំណើរ​​ជា​លើកដំបូង​មក​កាន់​ទឹក​ដី​ដ៏​អស្ចារ្យ​នេះ​៕

អត្ថបទ៖ ប៊ុណ្ណារ៉ា