ក្រុម​បាល់ទាត់​ជម្រើស​ជាតិ​ក្រោម​អាយុ​១៥​ឆ្នាំ បាន​ក្លាយ​ជា​ម្ចាស់​ជើង​ឯក​ក្នុង​ពាន​រង្វាន់​អន្តរជាតិ GFA Soriya U-15 Cambodia International Tournament 2015 ក្រោយ​យក​ឈ្នះ​ក្រុម​​ U-14 Japan Gifu Selection  មក​ពី​ជប៉ុន​​នៅ​វគ្គ​ផ្ដាច់ព្រ័ត្រ ដែល​រៀបចំ​នៅ​មជ្ឈមណ្ឌល​និង​សាលា​បាល់ទាត់​ជាតិ​បាទី ថ្ងៃ​អាទិត្យ​​ទី ២៣ ខែ សីហា ឆ្នាំ ២០១៥ ម្សិលមិញ។

ក្រុម U-15 កម្ពុជា លើក​ពាន (រូបថត៖ GFA Soriya - Cambodia)

GFA Soriya Academy សហការ​ជាមួយ​សហព័ន្ធ​កីឡា​បាល់ទាត់​កម្ពុជា ក្រោម​ការ​ឧបត្ថម្ភ​ពី​ក្រុមហ៊ុន Yamaha បាន​បង្កើត​ពាន​រង្វាន់​បាល់ទាត់​អន្តរជាតិ​មួយ​​នេះ​ឡើង​សម្រាប់​យុវជន​ក្រោម​អាយុ​១៥​ឆ្នាំ​ ដោយ​មាន ៤ ក្រុម​មក​ពី ៣ ប្រទេស​ចូលរួម​ប្រកួត​ប្រជែង​​។ ពាន​រង្វាន់​នេះ​បង្កើត​ឡើង​​ដើម្បី​​បង្កើន​ការ​ទំនាក់ទំនង​រវាង​កីឡាករ​ទាំង ៤ ក្រុម ព្រម​ទាំង​ផ្លាស់ប្ដូរ​បទពិសោធន៍ ចំណេះដឹង ជំនាញ និង វប្បធម៌ ​រវាង​គ្នា​និង​គ្នា​ទៅ​វិញ​ទៅ​មក។

ពាន​រង្វាន់​នេះ​រៀបចំ​ឡើង​ចាប់​ពី​ថ្ងៃ​ទី ២១ ដល់ ២៣ ខែ សីហា ឆ្នាំ ២០១៥ នេះ ស្រប​ពេល​ក្រុម​ចូលរួម​មាន ក្រុម U-14 Japan Gifu Selection របស់​ជប៉ុន ក្រុម U-15 GFA Singapore របស់​សិង្ហបុរី ក្រុម​​សាលា​បាល់ទាត់​ជាតិ​កម្ពុជា U-15 និង ក្រុម​​ជម្រើស​ជាតិ​កម្ពុជា U-15៕