អស្ចារ្យបទភេ្លងបុរាណខ្មែរ ទទួលបានការគាំទ្រទាំងក្នុង និង ក្រៅប្រទេស
- 2015-09-01 21:37:22
- ចំនួនមតិ 0 | ចំនួនចែករំលែក 0
អស្ចារ្យបទភេ្លងបុរាណខ្មែរ ទទួលបានការគាំទ្រទាំងក្នុង និង ក្រៅប្រទេស
ចន្លោះមិនឃើញ
លោកគ្រូ កែវ សុភី បានសម្ដែងអារម្មណ៍រំភើប គ្រាដែលឃើញបងប្អូនខ្មែរ ក៏ដូចជា ជនបរទេសមួយចំនួនគាំទ្រវីដេអូ នៃការប្រគំតន្រ្តីបុរាណខ្មែរចម្រុះជាតិសាសន៍មកពីប្រទេសក្នុងតំបន់អាស៊ាន ដែលវីដេអូនេះ បានបង្ហោះនៅលើបណ្ដាញសង្គមកាលពីកន្លងទៅថ្មីៗនេះ។
“ខ្ញុំពិតជារំភើប និង សប្បាយចិត្តជាខ្លាំងពេលដែលឃើញវីដេអូរបស់ខ្ញុំមានគេចូលទស្សនាច្រើន ព្រោះមិននឹកស្មានថា ពួកគាត់ស្រលាញ់ចូលចិត្តភ្លេងបុរាណខ្មែរដូច្នេះសោះ។ បានជាខ្ញុំនិយាយចឹង ព្រោះសង្កេតឃើញថាវប្បធម៌បរទេសបានវាយលុកចូលប្រទេសខ្មែរយើងខ្លាំងណាស់ហើយប្រពៃណីបទភ្លេងខ្មែរយើងសឹងតែបាត់បង់។ មិនតែប៉ុណ្ណោះកាលខ្ញុំសម្ដែងនៅប្រទេសកូរ៉េពួកគេបានយកចម្រៀងយើងច្រៀងរលេងនៅតាមទីកន្លែងនានាដោយមិនដឹងខ្លួនទៀតផង"។ លោក កែវ សុភី និយាយប្រាប់ Sabay។
វីដេអូយកចេញពីបណ្ដាញសង្គម Facebook ដែលបានចែកចាយកាលពីពេលថ្មីៗនេះ
សាស្ត្រាចារ្យនៃសកលវិទ្យាល័យភូមិន្ទវិចិត្រសិល្បៈ បន្ថែមទៀតថា វីដេអូនេះ លោកគ្រូ សម្ដែងតាំងពីឆ្នាំ ២០១៣ ប៉ុន្តែលោកមិនដែលបានយកមកបង្ហាញដល់ប្រជាជនខ្មែរបានឃើញនោះទេ។ ទើបតែប៉ុន្មានថ្ងៃមុន លោកសម្រេចចិត្តថាមុននឹងផ្ញើទៅប្រទេសកូរ៉េ ចែកជូនកូនខ្មែរបានឃើញ និង ចងចាំ ហើយក៏ស្រាប់តែមានការគាំទ្រច្រើនស្ទើរមិននឹកស្មានដល់។
“ចំពោះវីដេអូមួយនេះធ្វើឡើងដើម្បីផ្ញើទៅប្រទេសកូរ៉េក្នុងគោលបំណងឲ្យគេជ្រើសរើសយកខ្ញុំទៅចូលរួមសម្ដែង និង ដើម្បីបង្ហាញពីវប្បធម៌ខ្មែរឲ្យពិភពលោកបានស្គាល់ម្តងទៀតហើយក៏ជាខួប១០ឆ្នាំនៃកម្មវិធីមួយដែលមានឈ្មោះថា Culture Partnership Initiative។ គេបង្កើតឡើងតាំងពីឆ្នាំ ២០០៥ មានរយៈពេល ៦ ខែ គឺចាប់ពីខែ មិថុនា ដល់ខែ ធ្នូ។" លោកគ្រូ កែវ សុភី និយាយ។
គោលដៅសំខាន់ នៃកម្មវិធីនេះ លោកគ្រូ កែវ សុភី ប្រាប់ថា ជាការជួបគ្នានៃបណ្ដាប្រទេសអាស៊ីដើម្បីយកវប្បធម៌របស់ខ្លួនបង្ហាញដល់គ្នាទៅវិញទៅមក។ ពិធីធ្វើឡើងមានរយៈពេល ៦ ខែ គឺចាប់ពីខែ មិថុនា ដល់ ខែ ធ្នូ ដែលបង្កើតឡើងដំបូងក្នុងឆ្នាំ ២០០៥ ។លោកគ្រូមានប្រសាសន៍ថា ពិតជាមោទនភាពណាស់ពេលដែលបានទៅសម្ដែងចែកជូនបណ្ដាប្រទេសដទៃបានឃើញពីប្រវត្តិសាស្ត្រវប្បធម៌ដ៏រុងរឿងតាំងពីបុរាណ។
ស្ថិតក្នុងត្រកូល ដែលមានឈាមជ័រជាអ្នកសិល្បៈឧបករណ៍ភ្លេងបុរាណតាំងពីជំនាន់ជីតាមកលោកប្រាប់ថា បម្រើការក្នុងវិស័យភ្លេងបុរាណខ្មែរនេះជាង២០ឆ្នាំមកហើយ។ លោកគ្រូ កែវ សុភី មានក្ដីសុបិនថា មុននឹងលោកស្លាប់ទៅ លោកចង់បន្សល់ស្នាដៃមួយចំនួន ដើម្បីបង្ហាញនូវអ្វីដែលជាវប្បធម៌ខ្មែរទៅពិភពលោកឲ្យបានដឹង៕
អត្ថបទ៖ ថា ម៉ាលីដា រូបថត៖ ផ្ដល់ឲ្យ
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
