សហគ្រាសកម្ពុជាជំរុញការប្រើប្រាស់បច្ចេកវិទ្យាដើម្បីបង្កើនប្រសិទ្ធភាពអាជីវកម្ម
- 2015-09-10 16:20:37
- ចំនួនមតិ 0 | ចំនួនចែករំលែក 0
សហគ្រាសកម្ពុជាជំរុញការប្រើប្រាស់បច្ចេកវិទ្យាដើម្បីបង្កើនប្រសិទ្ធភាពអាជីវកម្ម
ចន្លោះមិនឃើញ
ក្រុមហ៊ុនអាជីវកម្មនៅកម្ពុជា កំពុងផ្តោតយកចិត្តទុកដាក់លើការប្រើប្រាស់ប្រព័ន្ធបច្ចេកវិទ្យាជាដំណោះស្រាយ ដើម្បីជួយបង្កើនប្រសិទ្ធភាពការងារនិងសម្រួលដល់ប្រតិបត្តិការអាជីវកម្មកាន់តែប្រសើរ។
លោក ពេន វិទូរ នាយកជាន់ខ្ពស់ផ្នែកលក់នៃក្រុមហ៊ុន First Cambodia បានឲ្យដឹងថា ដោយសារតែមើលឃើញពីប្រយោជន៍នៃប្រព័ន្ធបច្ចេកវិទ្យាដែលជាដំណោះស្រាយជួយដល់ការអភិវឌ្ឍអាជីវកម្ម ក្រុមហ៊ុននិងសហគ្រាសកម្ពុជាកាន់តែច្រើនបានជំរុញក្នុងការនាំប្រព័ន្ធបច្ចេកវិទ្យាថ្មីៗ យកមកប្រើប្រាស់នៅក្នុងខ្សែសង្វាក់ការងារដើម្បីសម្រួលក្នុងដំណើរការអាជីវកម្ម។
លោកថា បណ្ដាស្ថាប័នធំៗដូចជាធនាគារ និងសណ្ឋាគារបានប្រើប្រាស់ប្រព័ន្ធបច្ចេកវិទ្យាដើម្បីគ្រប់គ្រងដូចជារក្សានិងដោះដូរទិន្នន័យ និងការសហប្រតិបត្តិការជាមួយដៃគូ ដែលបានជួយធ្វើឲ្យអាជីវកម្មរបស់ពួកគេដំណើរការរលូននិងមានប្រសិទ្ធភាព។
លោកបន្តថា អនាគតស្ថានភាពអាជីវកម្មផ្នែកបច្ចេកវិទ្យានឹងមានលក្ខណៈប្រសើរឡើង ដោយសារតែតម្រូវការពីអាជីវកម្មខ្នាតតូចៗ និងសហគ្រាសមានកើនឡើងពីមួយថ្ងៃទៅមួយថ្ងៃ។ យ៉ាងណាលោកទទួលស្គាល់ថា សហគ្រាសខ្នាតតូចមួយចំនួន នៅមិនទាន់យល់ពីការប្រើប្រាស់ប្រព័ន្ធបច្ចេកវិទ្យាលើការគ្រប់គ្រងអាជីវកម្ម ដែលជួយដល់ម្ចាស់អាជីវកម្មអាចសម្រេចចិត្តបានច្បាស់លាស់ ចំណាយពេលវេលាតិចនិងបានផលច្រើន។
លោក អេង សារ៉ាក់ បុគ្គលិកបម្រើការនៅគ្រឹះស្ថានហិរញ្ញវត្ថុក្រេឌីតបានឲ្យដឹងថា វិស័យហិរញ្ញវត្ថុនៅប្រទេសកម្ពុជា មានការអភិវឌ្ឍន៍ជាលំដាប់។ លោកថា ការប្រើប្រាស់ប្រព័ន្ធបច្ចេកវិទ្យាបានរួមចំណែកយ៉ាងធំក្នុងការជួយបង្កើនប្រសិទ្ធភាពការងារ និងជួយកាត់បន្ថយការចំណាយបានយ៉ាងច្រើន។
ក្រុមហ៊ុន First Cambodia បានសហការជាមួយក្រុមហ៊ុន VMware បើកសិក្ខាសាលាដើម្បីណែនាំពីដំណោះស្រាយ Virtualization សម្រាប់ណ្តាសហគ្រាសអាជីវកម្មនៅក្នុងប្រទេសកម្ពុជា។
លោក ចាហ្វារ៉ាលី អ្នកទទួលខុសត្រូវលើផ្នែកអភិវឌ្ឍន៍អាជីវកម្មទីផ្សារជំនួញរបស់ក្រុមហ៊ុន VMware បាននិយាយថា VMware ជាក្រុមហ៊ុនផ្តល់ដំណោះស្រាយផ្នែក Virtualization ដ៏ឈានមុខគេ ដែលផ្តល់ដំណោះស្រាយប្រព័ន្ធបច្ចេកវិទ្យាយ៉ាងមានប្រសិទ្ធភាពដើម្បីពង្រឹងលើសុវត្ថិភាពអាជីវកម្ម។
លោកថា បច្ចេកវិទ្យា Vmware ជាដំណោះស្រាយដ៏ប្រសើរសម្រាប់ជួយដល់ម្ចាស់អាជីវកម្មជា ធនាគារ និងគ្រឹះស្ថានហិរញ្ញវត្ថុទាំងឡាយ អាចសម្រេចបានស្ថិរភាពទីផ្សារនិងប្រសិទ្ធភាពខ្ពស់ដើម្បីទទួលបានការគាំទ្រនិងការទុកចិត្តពីសំណាក់អតិថិជន។
អត្ថបទ៖ ប៊ុណ្ណារ៉ា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
