iPhone បាន​បង្ហាញ​ខ្លួន​ជា​ច្រើន​ជំនាន់​និង​ចេញ​វាយលុក​ទីផ្សារ​យ៉ាង​កក្រើក។ អ្វី​ចាប់​អារម្មណ៍​បំផុត iPhone 6 Plus ត្រូវ​​អាជីវករ​ក្នុង​ស្រុក​ប្រាប់​ថា ជា​ស៊េរី​​ទូរសព្ទ​ iPhone ដែល​អាច​លក់​បាន​ថ្លៃ​បំផុត​នៅ​ទីផ្សារ​​កម្ពុជា។

ម្ចាស់​ហាង​លក់​ទូរសព្ទ​ សុខ លី ដែល​បាន​នាំ​ចូល​ទូរសព្ទ​ស៊េរី iPhone ជា​ច្រើន​ជំនាន់​ប្រាប់​ថា បើ​ទោះ​បី iPhone ជា​ទូរសព្ទ​លំដាប់​ខ្ពស់​មាន​តម្លៃ​ថ្លៃ ប៉ុន្តែ​មាន​ការ​គាំទ្រ​និង​ប្រជាប្រិយភាព​បំផុត​លើ​ទីផ្សារ។

លោក​ថា ក្នុង​ចំណោម​ស៊េរី​ទូរសព្ទ iPhone ដែល​ហាង​របស់​លោក​ធ្លាប់​នាំ​មក​លក់​មាន​តែ iPhone 6 Plus ដែល​លោក​អាច​លក់​បាន​ថ្លៃ​បំផុត​។

" iPhone 6 Plus ចេញ​​ដំបូង​អាច​លក់​បាន​ជាង ២ ០០០ ដុល្លារ​ជា​តម្លៃ​ឯតទគ្គកម្ម​សម្រាប់​ប្រភេទ​ទូរសព្ទ​ដ៏​ទំនើប​នេះ​"។

លោក​ថា អ្នក​ប្រើប្រាស់​មួយ​ចំនួន​ហ៊ាន​ចំណាយ​លុយ​ទិញ ដោយ​មិន​ខ្វល់​ពី​តម្លៃ​ដោយសារ​តែ​ពួកគេ​​ដឹង​ពី​គុណ​តម្លៃ​ដែល​មិន​ត្រឹម​​​ទំនើប​មាន​ភាព​ឡូយឆាយ ប៉ុន្តែ​ក៏​មាន​ប្រយោជន៍​ប្រើប្រាស់​ជា​ច្រើន។

ចំណែក​កញ្ញា សុជាតា បុគ្គលិក​នៅ​ហាង​លក់​ទូរសព្ទ​ នីកា ជា​ហាង​លក់​ទូរសព្ទ​ដ៏​ធំ​មួយ​ដែរ​នោះ​ឲ្យ​ដឹង​ដែរ​ថា iPhone 6 Plus ហាង​កញ្ញា​អាច​លក់​បាន​ជាង ២ ០០០ ដុល្លារ​កាល​ចេញ​លក់​ដំបូង ជា​តម្លៃ​មួយ​ខ្ពស់​បើ​ធៀប iPhone ស៊េរី​ផ្សេង​ទៀត។

កញ្ញា​ថា iPhone 6 Plus ត្រូវ​បាន​ក្រុមហ៊ុន​រចនា​រូបរាង​ថ្មី​សន្លាង​ជាមួយ​ការ​បំពាក់​ប្រព័ន្ធ​បច្ចេកវិទ្យា​ថ្មីៗ​និង​អេក្រង់​កាន់​តែ​ធំ​ងាយស្រួល ដែល​ធ្វើ​ឲ្យ​អ្នក​ប្រើប្រាស់​ជាច្រើន​ចាប់​អារម្មណ៍​និង​ហ៊ាន​ចំណាយ​លុយ បើ​ទោះ​បី​ត្រូវ​បង់​ក្នុង​​តម្លៃ​​មួយ​ខ្ពស់។

iPhone បាន​ចេញ​ជា​ច្រើន​ជំនាន់​ដោយ​មាន​ការ​អភិវឌ្ឍ​រូបរាង​និង​បច្ចេកវិទ្យា​កាន់តែ​ទំនើប។ ទូរសព្ទ​ដៃ​លំដាប់ High Class នេះ ត្រូវ​បាន​នាំ​មក​ទីផ្សារ​ប្រទេស​កម្ពុជា​និង​ក៏​ទទួល​ការ​ពេញ​និយម​ពី​អ្នក​ប្រើប្រាស់​មួយ​ចំនួន បើ​ទោះ​បី​តម្លៃ​របស់​វា​ខ្ពស់​បើ​ធៀប​ស៊េរី​ទូរសព្ទ​ទំនើប​មួយ​ចំនួន​ទៀត។

iPhone 6 Plus តម្លៃ​លើ​ទីផ្សារ​នៅ​សល់​​ប្រហែល ៧៣០ ដុល្លារ​សម្រាប់​ទំហំ 16 GB។ ថ្មីៗ​នេះ Apple បាន​បញ្ចេញ iPhone ស៊េរី​ថ្មី iPhone 6S និង iPhone 6S Plus ដែល​មាន​ការ​រចនា​រូបរាង​និង​នាំ​មក​មុខងារ​ថ្មីៗ​ជា​ច្រើន​ខុស​ពី​ជំនាន់​មុន ដែល​ធ្វើ​ឲ្យ​អ្នក​គាំទ្រ​មួយ​ចំនួន​ទន្ទឹង​រង់ចាំ។ ក្រុមហ៊ុន Apple ក៏​បាន​ឲ្យ​អតិថិជន​កុម្ម៉ង់​មុន​ដែរ មុន​ដាក់​លក់​ជា​ផ្លូវការ​នា​ពេល​ដ៏​ខ្លី​ខាង​មុខ​នេះ។

យោង​តាម​ប្រភព​ហាង​ក្នុង​ស្រុក​ប្រាប់​ថា iPhone ជំនាន់​ថ្មី​អាច​មក​ដល់​ទីផ្សារ​កម្ពុជា​បន្ទាប់​ពី Apple បាន​បញ្ចេញ​លក់​លើ​ទីផ្សារ​ប្រទេស​នានា ដែល​តម្លៃ​អាច​ដល់ ២០០០ ដុល្លារ​សម្រាប់​ការ​ចេញ​លក់​ដំបូង៕

អត្ថបទ៖ ប៊ុណ្ណារ៉ា