៥ចំណុចនេះអាចបញ្ជាក់ថា សំ ថារ័ត្ន ជាកីឡាការិនីពហុជំនាញ
- 2015-09-14 18:18:59
- ចំនួនមតិ 0 | ចំនួនចែករំលែក 0
៥ចំណុចនេះអាចបញ្ជាក់ថា សំ ថារ័ត្ន ជាកីឡាការិនីពហុជំនាញ
ចន្លោះមិនឃើញ
កញ្ញា សំ ថារ័ត្ន បានក្លាយជាកីឡាការិនីខ្មែរម្នាក់ដែលមានជំនាញច្រើន បន្ទាប់ពីចូលប្រឡូកក្នុងវិស័យក្បាច់គុនបុរាណខ្មែរកាលពីឆ្នាំ២០០៨ក្នុងវ័យ១៨ឆ្នាំ។ រហូតដល់ពេលនេះ កញ្ញាបានចូលប្រឡូកក្នុងអាជីពជាច្រើនក្នុងនោះមានទាំងការប្រកួត សម្តែង និងធ្វើជាពិធីការិនី។
១- ក្បាច់គុនល្បុក្កតោ សំ ថារ័ត្ន បានចាប់ផ្តើមហ្វឹកហាត់ក្បាច់គុនបុរាណខ្មែរតាំងពីតូចដែលបានធ្វើឲ្យនាងជាប់ចិត្តស្រលាញ់ក្បាច់គុន។ លទ្ធផលនៃការហាត់ល្បុក្កតោនេះបានផ្តល់ឲ្យនាងមានឱកាសសម្តែងក្នុងស្រុក និងក្រៅស្រុកឲ្យមហាជនស្គាល់ក្បាច់គុនមរតកដូនតារបស់ខ្មែរ។ ជាក់ស្តែងកាលពីប៉ុន្មានខែមុន កញ្ញាបានចេញទៅសម្តែងក្បាច់គុនល្បុក្កតោ និងក្បាច់ប្រដាល់ខ្មែរបុរាណនៅសាធារណរដ្ឋឆែកតាមរយៈការអញ្ជើញរបស់ស្ថានីយទូរទស្សន៍មួយ។ អ្វីដែលគួរកត់សមគាល់បំផុត គឺថ្មីៗនេះ កញ្ញា និងក្រុមល្បុក្កតោកម្ពុជាទើបទទួលបានមេដាយប្រាក់ពិភពលោកនៃការប្រកួតសម្តែងក្នុងព្រឹត្តិការណ៍ក្បាច់គុនបុរាណពិភពលោកនៅប្រទេសកូរ៉េ។
២- ប្រដាល់ក្បាច់គុនបុរាណខ្មែរ ក្រៅពីបានចាប់ប្រឡូកក្នុងពិភពក្បាច់គុនល្បុក្កតោ សុំ ថារ័ត្ន បានឡើងប្រកួតប្រដាល់ក្បាច់គុនខ្មែរបុរាណនៅតាមកម្មវិធីប្រដាល់ទូរទស្សន៍ជាច្រើន។ មិនត្រឹមតែប៉ុណ្ណោះ កញ្ញាបានទាំងឡើងប្រកួតជាលក្ខណៈមិត្តភាពអន្តរជាតិជាមួយកីឡាការិនីមកពីប្រទេសថៃទៀតផង។ រហូតដល់ពេលនេះនាងប្រកួតប្រដាល់ក្បាច់គុនខ្មែរបុរាណបានចំនួន១៣ដងហើយ។
៣- ប្រដាល់គុនចម្រុះក្នុងទ្រុង អ្វីដែលធ្វើឲ្យកីឡាការិនីស្រអែមស្រស់ សំ ថារ័ត្ន កាន់តែទទួលបានការចាប់អារម្មណ៍ពីមហាជននោះគឺការប្រកួតក្នុងទ្រុងរបស់កម្មវិធីប្រកួតក្បាច់គុនចម្រុះអន្តរជាតិ One Championship។ កញ្ញាបានប្រកួតក្នុងកម្មវិធីអន្តរជាតិនេះបានពីរដងហើយគឺលើកទីមួយឈ្នះកីឡាការិនីក្នុងស្រុកដែលរៀបចំនៅរាជធានីភ្នំពេញ និងលើកទីប្រកួតនៅប្រទេសហ្វីលីពីនដែលពេលនោះនាងចាញ់កីឡាការិនីម្ចាស់ផ្ទះ។
៤- សម្តែងខ្សែភាពយន្ត ក្រៅពីការប្រកួត ក្បាច់គុនខ្មែរបានជួយឲ្យ សំ ថារ័ត្ន ទទួលបានឱកាសថតសម្តែងខ្សែភាពយន្តថែមទៀត។ កញ្ញាបានសសម្តែងជាតួឯកក្នុងរឿង«កណ្ដាប់ដៃទីក្រុង ប៉ះជង្គង់ជនបទ» ក្នុងឆ្នាំ ២០១៤។ ខែធ្នូខាងមុខនេះ កញ្ញាគ្រោងថតសម្តែងខ្សែភាពយន្តថ្មីគឺរឿង ហែកគុក ឬJailbreak ដែលមានតារាហូលីវូដសម្តែងជាមួយ។
៥- ធ្វើពិធីការិនីប្រដាល់ កាលពីថ្ងៃអាទិត្យម្សិលមិញនេះ សំ ថារ័ត្ន ត្រូវបានគេមើលឃើញធ្វើជាពិធីការិនីប្រដាល់ក្នុងកម្មវិធី«ជើងឯកលេខ១គូប៊ូតា»របស់សង្វៀនបាយ័ន។ កញ្ញាប្រាប់ថា នេះជាការផ្តល់ឱកាសដ៏ពិសេសបំផុតសម្រាប់រូបនាងពីអ្នកគ្រប់គ្រងទូរទស្សន៍បាយ័ន ហើយនាងនឹងខិតខំប្រឹងប្រែងធ្វើឲ្យបានល្អបំផុត៕
អត្ថបទ៖ ជាន ចាន់រ៉ា