ឧកញ៉ា ឃ្លោក បង្កើតមូលនិធិថ្មីជួយអ្នកសិល្បៈក្រីក្រ

2015-09-15 13:11:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីទទួលបានតួនាទី ជាប្រធានកិត្តិយស សមាគមសិល្បករខ្មែរភ្លាម ឯកឧត្ដម ឧកញ៉ា ឃ្លោក បានប្រកាសថា នឹងបង្កើតមូលនិធិមួយ ដើម្បីជួយដល់សិល្បករក្រីក្រពេលធ្លាក់ខ្លួនឈឺមិនមានលទ្ធភាពមកមន្ទីរពេទ្យ។

មូលនិធិដែលលោកបង្កើតនេះ គឺជាមូលនិធិថ្មី មិនជាប់ពាក់ព័ន្ធនឹងមូលនិធិចាស់ ដែលសមាគមសិល្បករមានបច្ចុប្បន្នឡើយ។ លោកឧកញ៉ា បានលើកឡើងថា លោកនឹងខិតខំកៀគរ ថ្នាក់ដឹកនាំ ក៏ដូចជា អ្នកសិល្បៈល្បីៗនាពេលបច្ចុប្បន្ននេះ ដើម្បីមកចូលជាមួយមូលនិធិសង្គ្រោះនេះ។ ដើម្បីឲ្យមានភាពជំនឿជាក់ លោកបានប្រកាសថា នឹងដាក់ប្រាក់មួយចំនួនរបស់លោកមុនគេ។ ប៉ុន្តែអតីតតារាកំប្លែងធ្លាប់មានប្រវត្តិជាអ្នកបញ្ចូលសំឡេងកុនម្នាក់នេះ មិនបានបង្ហាញឲ្យដឹងថា ប្រាក់ដែលលោកគ្រោងដាក់នោះ ប៉ុន្មានឡើយ។

លោក សុះ ម៉ាច ប្រធានសិល្បករខ្មែរ ក៏ដូចជាសមាជិកក្រុមប្រឹក្សាទាំងអស់ ក៏បានយល់ព្រមចំពោះការបង្កើតមូលនិធិ ដែលនាយឃ្លោកបានលើកឡើងនេះផងដែរ ដោយលោកសង្ឃឹមថា មូលនិធិនេះ នឹងជួយទ្រទ្រង់ដល់សិល្បៈដែលកំពុងខ្វះខាតជាក់ជាមិនខាន។

ដើម្បីឲ្យមូលនិធិ ខាងលើ ទទួលបានជោគជ័យ លោក សុះ ម៉ាច បានស្នើឲ្យអ្នកសិល្បៈទាំងអស់ដែលមិនទាន់ជាសមាជិករបស់សមាគមសិល្បករខ្មែរ មកចុះឈ្មោះឲ្យបានទាំងអស់គ្នា ដោយគ្រាន់តែ១ខែបង់១ដុល្លារក្នុងម្នាក់ប៉ុណ្ណោះ ហើយនៅពេលដែលសមាជិកណាម្នាក់មានបញ្ហា សមាគមនឹងចុះជួយភ្លាម៕