ក្រុមហ៊ុនឯកជនចិនទទួលបានសិទ្ធិអនុវត្តគម្រោងលើកស្ទួយវិស័យកសិកម្មនៅកម្ពុជា

2015-09-17 16:43:12
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ១៦ កញ្ញាម្សិលមិញនេះ មន្ទីរកសិកម្ម និង មន្ទីរពាណិជ្ជកម្មខេត្តគ័ងស៊ី ប្រទេសចិនបានរៀបចំសន្និសីទសារព័ត៌មានមួយទាក់ទងនឹងការបើកគម្រោងមជ្ឈមណ្ឌលលើកស្ទួយវិស័យកសិកម្មកម្ពុជា-ចិន (CAPROC) នៅសាលប្រជុំរបស់មន្ទីរកសិកម្មខេត្ត នាទីក្រុងណានីង ខេត្តគ័ងស៊ី។

ក្រុមហ៊ុន Guangxi Forword គឺជាក្រុមហ៊ុនឯកជន ដែលធ្វើកិច្ចសហប្រតិបត្តិការខាងបច្ចេកទេសកសិកម្មអន្តរជាតិ ដែលទទួលបានការគាំទ្រពីក្រសួងកសិកម្មចិន សម្រាប់គម្រោងយុទ្ធសាស្ត្រសហប្រតិបត្តិការសុវត្ថិភាពអាហារនៅអាស៊ី និង គាំទ្រពីធនាគារនាំចេញ-នាំចូលរបស់ចិន ខាងផ្នែកសហប្រតិបត្តិការធនាគារ និង មូលនិធិសហប្រតិបត្តិការអាស៊ាន-ចិន។

អនុប្រធានមន្ទីរពាណិជ្ជកម្មខេត្ត លោក Huang Huansheng បានថ្លែងកាលពីរសៀលម្សិលមិញថា នេះជាលើកទីមួយហើយដែលរដ្ឋាភិបាលចិនយល់ព្រមឲ្យសហគ្រាសឯកជនអនុវត្តគម្រោងជំនួយបែបនេះ។

ដោយឡែក ប្រធានក្រុមហ៊ុន Guangxi Forword អ្នកនាង Lou Wenwen បានប្រាប់អ្នកសារព័ត៌មានថា គម្រោងនេះដើមឡើយ គឺជាកិច្ចព្រមព្រៀងរវាងអតីតនាយករដ្ឋមន្ត្រីចិន លោក វិន ជាប៉ាវ ជាមួយប្រទេសនៅតំបន់អាស៊ី ដោយក្នុងកិច្ចប្រជុំអាស៊ានបូកបី លោកបានសន្យាថានឹងបង្កើតគម្រោងកសិកម្មបីនៅអាស៊ី ហើយក្នុងនោះមានគម្រោងមួយគឺនៅកម្ពុជា។

ភាគីចិនបានពិភាក្សាជាមួយក្រសួងកសិកម្មនៅកម្ពុជា និង បានព្រមព្រៀងគ្នាដោយរដ្ឋាភិបាលចិននឹងផ្ដល់ជំនួយក្នុងរយៈពេល៣ឆ្នាំ ហើយក្រុមហ៊ុនខាងលើនឹងបន្តគម្រោងក្នុងរយៈពេល ១៥ ឆ្នាំ។ សរុបមក គម្រោងទាំងមូលគឺ ១៨ ឆ្នាំ។ អ្នកនាងក៏បានបញ្ជាក់ដែរថា ក្នុងរយៈពេលបីឆ្នាំដំបូង រដ្ឋាភិបាលចិននឹងផ្ដល់ជំនួយប្រមាណ ៤០ លានដុល្លារ។

គម្រោង CAPROC បង្កើតឡើងដោយផ្ដោតលើគោលដៅសំខាន់៥គឺ ការជ្រើសរើសពូជកសិកម្មល្អ ការបណ្ដុះបណ្ដាលបច្ចេកទេសកសិកម្ម ការប្រើប្រាស់គ្រឿងចក្រកសិកម្ម ការផ្លាស់ប្ដូរពាណិជ្ជកម្មក្រោយការប្រមូលផល និង ចុងក្រោយគឺ ការអភិវឌ្ឍធនធានថាមពលថ្មី។