ពិព័រណ៍ចិន-អាស៊ាន លើកទី ១២ មានជាង ៥ ៥០០ ស្តង់

2015-09-17 23:59:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ការតាំងពិព័រណ៍អាស៊ានចិនឆ្នាំ ២០១៥នេះនឹងបើកជាផ្លូវការនៅព្រឹកថ្ងៃទី ១៨ កញ្ញា ស្អែក ដោយមានស្តង់ដាក់តាំងចំនួន៥៥៦៣ស្ដង់ ដែលចំនួននេះស្មើនឹង ២១% លើសចំនួនដែលបានគ្រោងទុក។ លោក Hu Suojin អគ្គនាយករងការិយាល័យព័ត៌មានក្រសួងពាណិជ្ជកម្មចិន ថ្លែងក្នុងសន្និសីទសារព័ត៌មានកាលពីព្រឹកមិញនេះ។

នេះជាលើកទី ១២ ហើយ សម្រាប់ការតាំងពិព័រណ៍អាស៊ាន-ចិន ដែលតែងប្រារព្ធឡើងនៅទីក្រុងណានីង ខេត្តគ័ងស៊ី ប្រទេសចិន។ ក្នុងពិធីពិព័រណ៍នេះដែរនឹងមានការចូលរួមពីថ្នាក់ដឹកនាំសំខាន់ៗប្រចាំប្រទេសនីមួយៗក្នុងតំបន់អាស៊ាន និងប្រទេសចិន ដោយឡែក សម្រាប់ប្រទេសកម្ពុជានឹងមានការអញ្ជើញចូលរួមដោយឯកឧត្តម ទេសរដ្ឋមន្ត្រី ស៊ុន ចាន់ថុល និង ជារដ្ឋមន្ត្រីក្រសួងពាណិជ្ជកម្ម។

លោក Suojin មានប្រសាសន៍បន្តថា មាន ២ ២០៧ សហគ្រាសដែលត្រូវបានអនុញាតិឲ្យចូលរួម និង មាន ៤ ៦០០ ស្ដង់ត្រូវបានរៀបចំឡើងសម្រាប់សហគ្រាសទាំងនោះ។ ក្នុងចំណោមនោះក៏មាន១២៩៦ស្ថង់សម្រាប់ប្រទេសអាស៊ានទាំងដប់ និង ប្រទេសដែលមិនស្ថិតក្នុងតំបន់ពាណិជ្ជកម្មសេរី ចិន-អាស៊ាន CAFTA។

ពិព័រណ៍អាស៊ានចិនឆ្នាំនេះ ថៃនឹងធ្វើជាប្រទេសកិត្តិយស ដោយមានសាធារណរដ្ឋកូរ៉េចូលរួមជាប្រទេសភ្ញៀវពិសេស។ សារព័ត៌មានចំនួន ២០៥ នៃប្រទេស និង តំបន់ទាំង២២ និងមានអ្នកយកការណ៍ អ្នកសារព័ត៌មានចំនួន ១ ២២៦ រូបនឹងធ្វើសេចក្ដីរាយការណ៍ពីការតាំងពិព័រណ៍នេះ។