កែវ រំចង់ ប៉ះជើងខ្លាំងមហាកម្លាំង Iquezang ក្នុងកម្មវិធី Thai Fight ចុងខែក្រោយ

2015-09-21 18:45:45
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករចិត្តសឿង កែវ រំចង់ កំពុងត្រៀមខ្លួនឆ្លងដែនទៅប្រទេសវៀតណាម ដើម្បីចូលរួមប្រកួតជាមួយជើងខ្លាំងមហាកម្លាំងថៃ Iquezang Kor Rungthanakeat ដែលធ្លាប់យកឈ្នះកីឡាករជួរមុខកម្ពុជា ពេជ្រ សីហា និង វង្ស ណយ ក្នុងកម្មវិធី Thai Fight នាថ្ងៃទី២៤ ចុងខែតុលាខាងមុខ។

កីឡាករ កែវ រំចង់

តាមការគ្រោងទុក កែវ រំចង់ នឹងត្រូវឡើងសង្វៀន Thai Fight ក្នុងជំនួបលើកដំបូងជាមួយកីឡាករពោរពេញដោយបទពិសោធន៍ Iquezang Kor Rungthanakeat នៅក្នុងប្រទេសវៀតណាម នៅថ្ងៃទី២៤ ខែតុលាខាងមុខ។ នេះបើតាមសាមីខ្លួននិយាយប្រាប់ Sabay កាលពីព្រឹកមិញ។

កីឡាករ Iquezang(ឆ្វេង) ពេលប្រកួតជាមួយកីឡាករ ពេជ្រ សីហា (ស្តាំ)

កីឡាករខេត្តបាត់ដំបងរូបនេះបានបញ្ជាក់ទៀតថា ការចាកចេញទៅប្រទេសវៀតណាម ខាងភាគីថៃជាអ្នករៀបចំទាំងអស់ ប៉ុន្តែមិនទាន់ដឹងថ្ងៃចេញដំណើរច្បាស់លាស់នៅឡើយទេ។ បច្ចុប្បន្ន កែវ រំចង់ កំពុងហាត់ត្រៀមយ៉ាងសកម្មដើម្បីសងសឹកជូនកីឡាកររួមជាតិ ហើយថ្ងៃទី០២ ខែតុលាខាងមុខ រូបគេនឹងជួបប្រកួតសាកកម្លាំងជាមួយកីឡាករថៃនៅសង្វៀនបាយ័ន មុនចេញទៅប្រទេសវៀតណាម។

គូប្រកួតរបស់ កែវ រំចង់ កីឡាករ Iquezang ត្រូវចាត់ទុកថា ជាអ្នកប្រដាល់ខ្លាំងម្នាក់លើសង្វៀន Thai Fight ព្រោះការប្រកួតរបស់គេម្តងៗសម្រុកចូលវាយគ្មានត្រាប្រណីឡើយ។ កីឡាករថៃម្នាក់នេះធ្លាប់ផ្ដួលជើងខ្លាំងប្រើកែង វង្ស ណយ ក្នុងទឹកទីបីកាលចុងឆ្នាំ២០១៣ និងយកឈ្នះអ្នកលេងកណ្ដាប់ដៃ ពេជ្រ សីហា កាលពីខែមេសានេះ។

សង្វៀន Thai Fight ប្រជុំទៅដោយកំពូលអ្នកប្រដាល់ ហើយក្នុងចំណោមកីឡាករកម្ពុជា មានតែ សេន ប៊ុនថេន ម្នាក់ប៉ុណ្ណោះដែលធ្លាប់ស្គាល់ជ័យជម្នះ។ ក្នុងកម្មវិធី Thai Fight នេះ កែវ រំចង់ ធ្លាប់បានបង្ហាញខ្លួនម្តងហើយដោយត្រូវជើងខ្លាំងថៃ Yodsanklai វ៉ៃឲ្យលោកអាជ្ញាកណ្តាលបញ្ឈប់ការប្រកួតក្នុងទឹកទី២៕