កីឡាគុនដាវរកឃើញជើងឯកថ្នាក់ជាតិប្រចាំឆ្នាំល្ងាចម្សិលមិញ

2015-10-01 16:55:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាគុនដាវប្រចាំឆ្នាំ២០១៥ បានរកឃើញជើងឯកកាលពីល្ងាចម្សិលមិញ ឆ្លងកាត់ការប្រកួតយ៉ាងស្វិតស្វាញអស់រយៈពេល៣ថ្ងៃគិតចាប់ពីថ្ងៃទី២៨ រហូតដល់ថ្ងៃទី៣០ ខែកញ្ញា ឆ្នាំ២០១៥ នៅអគារដំបូលទូកក្នុងបរិវេណសាកលវិទ្យាល័យភូមិន្ទភ្នំពេញ។

កម្មវិធីប្រកួតកីឡាគុនដាវក្នុងឆ្នាំ២០១៥ នេះមានវិញ្ញាសាចំនួន៤ ហើយបានរកឃើញជើងខ្លាំង និងជើងឯករួចរាល់គឺ វិញ្ញាសានារីឯកត្តជនដាវធំ ជើងឯកបានទៅលើកីឡាការិនី ឆាយ លីលី មកពីក្លិបអ៊ីសា ជើងឯករងបានទៅកីឡាការិនី មួង ម៉ានុត មកពីក្លិបហូសាណា និងចំណាត់ថ្នាក់លេខ ៣បានទៅកីឡាការិនី សួង ពិសី មកពីក្លិប ហូសាណា។ ចំណែកវិញ្ញាសា បុរសឯកត្តជនដាវតូច មេដាយមាសបានទៅកីឡាករ ជិម ធារ៉ា មកពីក្លិប ហូសាណា មេដាយប្រាក់បានមកលើកីឡាករ ឆាយ សុខលាភ មកពីក្លិបអ៊ីសា និងមេដាយសំរឹទ្ធ បានទៅលើកីឡាករ សាន់ សុខសីហា ដែលមកពីក្លិបអ៊ីសា។

សម្រាប់វិញ្ញាសាបុរសឯកត្តជនដាវធំ ជើងឯកបានទៅលើកីឡាករ ឃឹម សាមាន មកពីក្លិបសន្ធរមុខ ជយលាភីលេខ ២បានមកលើកីឡាករ មាលា បូរិន មកពីក្លិប HMM និងចំណាត់ថ្នាក់លេខ៣ បានទៅកីឡាករ សាន់ សុខសីហា មកពីក្លិបអ៊ីសា ។ ចំណែកវិញ្ញាសា បុរសក្រុមដាវធំ ជយលាភីជើងឯកបានមកលើក្រុម សន្ធរមុខ ជើងឯករងបានមកក្រុម អ៊ីសា និងចំណាត់ថ្នាក់លេខ ៣បានទៅលើក្លិបនរា។

តាមរបាយការណ៍របស់គណៈកម្មការរៀបចំការប្រកួតបានឲ្យដឹងថា ការប្រកួតកីឡាគុនដាវជ្រើសរើសជើងឯកថ្នាក់ជាតិប្រចាំឆ្នាំ បានបង្កើតឡើងចំនួន ៣ដងមកហើយរួមទាំងឆ្នាំនេះ ក្រោមការឧបត្ថម្ភទាំងស្រុងពីក្រសួងអប់រំ យុវជន និងកីឡា។ ដោយអនុវត្តតាមផែនការប្រកួតកីឡាមហាជន របស់ក្រសួងអប់រំ យុវជន និងកីឡា នាយកដ្ឋានអប់រំកាយ និងកីឡាសហការបច្ចេកទេស ជាមួយសហព័ន្ធកីឡាគុនដាវកម្ពុជា។

ជាមួយគ្នានោះដែរលោក ព្រំ ប៊ុនយី អគ្គនាយករង នៃអគ្គនាយកដ្ឋានកីឡា បានឲ្យដឹងថា ក្រសួងអប់រំមានក្ដីសង្ឃឹមយ៉ាងខ្លាំងទៅលើសហព័ន្ធ ដើម្បីបំផុសកីឡាករ-កីឡាការិនីគុនដាវកម្ពុជាឲ្យចូលរួមប្រឹងប្រែងហ្វឹកហាត់ និងចូលរួមប្រកួតកីឡាមហាជននេះឲ្យបានច្រើននាក់ ដើម្បីជាទន់មួយរួមចំណែកអភិវឌ្ឍន៍កីឡាគុនដាវកម្ពុជាឲ្យមានការរីកចំរើនកាន់តែខ្លាំង៕