iPhone ថ្លៃហួសលទ្ធភាព អ្នកគាំទ្ររារែកទោះចិត្តប្រាថ្នាចង់បាន

2015-10-08 16:28:33
ចំនួនមតិ 0 | ចំនួនចែករំលែក 0

ចន្លោះមិនឃើញ

iPhone 6s និង 6s plus បានបញ្ចេញលក់នៅលើទីផ្សារប្រហែលពីរសប្ដាហ៍មកហើយ។ មានអ្នកស្វែងរកក៏ច្រើន ហើយអ្នកដែលប្រាថ្នាចង់បានតែខ្វះលទ្ធភាពក៏មានជាហូរហែ។

កំពុងអង្គុយលើបង់ក្រោមម្លប់ឈើតែម្នាក់ឯងនៅខាងមុខសាលាបញ្ញាសាស្រ្តម្ដុំវិមានឯករាជ្យ កញ្ញាវរលក្ខណ៍ប្រាប់ថា ពេល iPhone ចេញថ្មីម្តងៗចិត្តចេះតែចង់បាន តែលទ្ធភាពមិនអាចទៅរួច។

កញ្ញាដែលមានសម្បុរខ្មៅស្រអែមនិយាយដោយទឹកមុខញញឹមញញែមនិងមាន iPhone 6Plus កាន់ក្នុងដៃផងបន្តថា iPhone ចេញជំនាន់ថ្មីៗគួរឲ្យទាក់ចិត្ត ប៉ុន្តែតម្លៃក៏មិនថោកដែរដែលធ្វើឲ្យកញ្ញានិងអ្នកប្រើប្រាស់ជាច្រើនទៀត រារែកចិត្តក្នុងការត្រូវចំណាយថវិកាដ៏ខ្ពស់ដើម្បីបានទូរសព្ទដ៏ឡូយឆាយនេះ។

កញ្ញាថា តាមទីផ្សារតម្លៃ iPhone នៅជាង ៨០០ ដុល្លារ បើធ្លាក់ក្រោមជាងនេះកញ្ញាអាចពិចារណាបាន។

មិនខុសគ្នានេះដែរ យុវជនមួយរូបទៀតដែលកំពុងអង្គុយក្បែរនោះ ដាណេត ក៏បន្ទរការចាប់អារម្មណ៍ដែរថា iPhone ចេញម្តងៗមានអ្នកគាំទ្រភ្ល្លូកទឹកភ្លូកដី។

យុវជនរូបនេះថា iPhone ជាទូរសព្ទលំដាប់កំពូលដែលមានការពេញនិយមបំផុត។ តែយុវជនរូបនេះទទួលស្គាល់ថា តម្លៃដ៏ខ្ពស់ធ្វើឲ្យអ្នកប្រើប្រាស់ជាច្រើនបានត្រឹមតែស្រមៃ ដែលមិនអាចមានលទ្ធភាពទិញទូរសព្ទដ៏ទំនើបបាននេះ។

ចំណែកយុវតីមួយរូបទៀតក៏ជាអ្នកគាំទ្រនិងប្រាថ្នាចង់បានទូរសព្ទ iPhone ជាកម្មសិទ្ធិដែរ។ ស្រីនិច ប្រាប់ថា iPhone ជាទូរសព្ទដែលទទួលការពេញនិយម ការរចនាឡើងទាក់ទាញចិត្តអ្នកប្រើប្រាស់ទាំងបច្ចេកវិទ្យាក៏ដូចជាការឌីហ្សាញរូបរាងដ៏ស្រស់ឆើត។ យ៉ាងណា យុវតីរូបនេះថា អ្នកប្រើប្រាស់ជាច្រើនមិនមានលទ្ធភាពទិញទូរសព្ទដ៏ទំនើបនេះប្រើប្រាស់ ដោយសារតម្លៃដ៏សែនថ្លៃដែលធ្វើឲ្យអ្នកប្រើប្រាស់មានចិត្តចង់បានត្រូវពិចារណាខ្លាំង។

iPhone 6S បានធ្លាក់នៅសល់ជាង ៧០០ ដុល្លារបន្ទាប់ពីការចេញលក់ដំបូងជាង ១០០០ ដុល្លារ។ ខណៈដែល iPhone 6S Plus វិញ តម្លៃក៏ធ្លាក់នៅប្រហែលជាង ៩០០ ដុល្លារ។ តម្លៃនេះនឹងអាចបន្តធ្លាក់ថ្លៃបន្ថែមទៀត ខណៈតម្លៃនេះជាតម្លៃលក់ក្រៅផ្លូវការតាមហាងនានា៕

អត្ថបទ៖ រក្សា