ឆ្លងផុតរដូវភ្ជុំ DJ កូនកណ្ដុរ ជួបទុក្ខធំ ឪពុកស្លាប់

2015-10-16 17:12:16
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកជុំ ផានិត ហៅ DJ កូនកណ្ដុរ កំពុងតែជួបទុក្ខធំ ត្បិតអីលោកឪពុកបានស្លាប់ កាលពីម្សិលមិញនេះ ដោយរោគាពាធ។

DJ កូនកណ្ដុរ បានប្រាប់ Sabay នៅព្រឹកនេះថា ឪពុករបស់ខ្លួនបានស្លាប់កាលពីវេលាម៉ោង៥ និង៤៧ នាទីល្ងាច ក្នុងភេទជាព្រះសង្ឃ ព្រះជន្ម៨៦ព្រះវស្សាដោយជំងឺសាច់ដុះក្នុងតម្រងនោម។ បច្ចុប្បន្នកំពុងតម្កល់ធ្វើបុណ្យក្នុង វត្ត "ព្រៃឃ្នេស" ស្ថិតក្នុងភូមិ ព្រៃឃ្នេស ឃុំ ព្រៃឃ្នេស ស្រុក មេសាង ខេត្ត ព្រៃវែង ជាទីអារាម ដែលឪពុករបស់ខ្លួន សាងផ្នួសនៅទីនោះ។ ពិធីបូជា គ្រោងនឹងធ្វើនៅថ្ងៃ សៅរ៍ ស្អែកនេះ។

DJ បានប្រាប់ឲ្យដឹងទៀតថា ឪពុករបស់ខ្លួន បានបួសជាព្រោះសង្ឃជាង៣០ព្រះវស្សាមកហើយ ពោលគឺតាំងពីខ្លួនមិនទាន់ដឹងក្ដីមកម្ល៉េះ។ កន្លងមក លោកធ្លាប់បានយកទៅព្យាបាលនៅមន្ទីរពេទ្យមិត្តភាពខ្មែរ-សូវៀត ជាច្រើនខែផងដែរ ប៉ុន្តែដោយអាការធ្ងន់ធ្ងរ ក៏បញ្ជូនមកស្រុកកំណើតវិញ កាលពីជាង១០ថ្ងៃមុននេះ។

ការធ្វើបុណ្យ៧ថ្ងៃឬ១០០ថ្ងៃ ស្ថិតការរៀបចំដោយគណៈកម្មការវត្ត ប៉ុន្តែនៅមិនទាន់កំណត់ថ្ងៃច្បាស់លាស់នៅឡើយ។ DJ កូនកណ្ដុរ លើកឡើងថា ពិធីបុណ្យសពប្រហែលមិនអាចធ្វើធំដុំបានឡើយ ត្បិតអីវត្ត ដែលឪពុករបស់លោកគង់នៅនេះ បច្ចុប្បន្នកំពុងតែខ្វះខាត ជំពាក់ប្រាក់គេច្រើន។ DJ កូនកណ្ដុរ ពោលថា លោកសោកស្ដាយចំពោះមរណភាពលោកឪពុក ត្បិតអីលោកនៅមិនទាន់បានតបស្នងសងគុណបានច្រើននៅឡើយ៕

អត្ថបទ៖ ខុត សីហា