ចាន់តារាទី ជួបគ្រោះថ្នាក់ចរាចរណ៍បុកជាមួយនឹង ម៉ូតូ កាលពីយប់មិញ

2015-10-21 19:24:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញម៉ោង ៨ យប់តារាសម្តែងជើងចាស់ ចាន់ តារាទី បានជួបគ្រោះថ្នាក់ចរាចរណ៍បង្កឡើងដោយ ម៉ូតូ ជាមួយនឹងឡានធ្វើដំណើរបញ្ច្រាសទិសគ្នានៅម្ដុំស្ពានបុរីពិភពថ្មីចម្ការដូង ប៉ុន្តែ អ្នកស្រីមិនមានរបួសអ្វីនោះឡើយ។

"ចាសអូន...យប់មិញបងបានជួបគ្រោះថ្នាក់ចរាចរណ៍ជាមួយនឹងម៉ូតូ ប៉ុន្តែបងអត់អីទេ ចំណែកខាងម៉ូតូពេលបុកភ្លាមៗសន្លប់៥នាទីដែរ បន្ទាប់មកបានដឹងខ្លួនវិញ។ ហើយម៉ូតូនោះបុកឡានបងផ្នែកខាងស្តាំ បែកធុងទឹកឡាន"។ ចាន់ តារាទី ថ្លែង។

ចំពោះហេតុការណ៍កាលពីយប់ម្សិលមិញ តារាជើងចាស់ ចាន់ តារាទី បានប្រាប់ថា ទាំងអ្នកស្រី និងកូនស្រី ភ័យឡើងញ័រខ្លួនព្រោះម៉ូតូដែលបើកដោយជនស្រវឹងរូបនោះបុកឡាន អ្នកស្រី ខ្លាំងរហូតលាន់ ឮដូចគ្រាប់បែកផ្ទុះ។

"អូនអើយ...បង និងកូនបងភ័យឡើងញ័រខ្លួនកូនសត្វធ្លាក់ទឹកចឹង ព្រោះមិនដែលជួបហេតុការណ៍ចឹងពីមុនមកទេ។ រឿងលុយកាក់បងមិនបានទាមទារ១០០$ដូចអ្នកកាសែត ចុះពីម្សិលមិញទេ បើត្រឹមប៉ុណ្ណឹង បងមិនសូវប្រកាន់ទេ ចេះតែបិទភ្នែក ប៉ុន្តែនេះខូចច្រើនណាស់ ណាមួយអ្នកបើកម៉ូតូហ្នឹងគាត់ស្រវឹងអីចឹងបងចង់ឲ្យគាត់មានទំនួលខុសត្រូវ"។

តារាសម្ដែងជើងចាស់រូបនេះបន្តថា ពីមុនអ្នកនាងក៏ធ្លាប់ជួបប្រទះដែរ ប៉ុន្តែមិនដល់ម្លឹងទេ គឺធ្លាប់តែគេកៀរឡានអ្នកនាងតិចតួច ហើយមិនដែលទៅទាមទារសំណងពីគេអីនោះទេ។

កិច្ចសម្ភាសន៍ជាមួយ Sabayមុននេះ តារារៀមច្បងដែលមានស្នាមសាក់នៅស្មាបានប្រាប់ថា រឿងរ៉ាវកើតហេតុ មិនទាន់បានបញ្ចប់ទេ។ ដោយសារតែយប់ម្សិលមិញ អ្នកស្រី សុំឲ្យខាងម៉ូតូចេញថ្លៃខូចខាតឡាន និងមិនមានការទាមទារលើសហ្នឹងទេ ប៉ុន្តែ ភាគីខាងម៉ូតូមិនព្រម ដូច្នេះខាង ប៉ូលីស បានយកឡាន និងម៉ូតូ ទៅតម្កល់ទុកនៅទីស្នាក់ការសិន រង់ចាំថ្ងៃនេះវេលាម៉ោង២ ទើបដោះស្រាយម្តងទៀត។ នេះបើតាមការបញ្ជាក់ពី ចាន់ តារាទី។

ជាចុងក្រោយ តារាពូកែទឹកភ្នែក សំណូមពរទៅដល់បងប្អូនប្រជាពលរដ្ឋទាំងអស់គ្នា ពេលពិសាគ្រឿងស្រវឹងសូមកុំបើកបរ ព្រោះកាលណាស្រវឹង គឺមិនអាចឃុំគ្រងអារម្មណ៍ខ្លួនឯងបានឡើយ ដូចករណីធ្លាប់បានកើតឡើងជារឿយៗ និងជាពិសេសបានកើតជាមួយនឹង អ្នកស្រី កាលពីយប់មិញ ដោយសារឥទ្ធិពលសុរាចូលក្នុងខ្លួននេះឯង៕

អត្ថបទ៖ ថា ម៉ាលីដា