ប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិក្នុងខេត្តកែបចាប់ផ្ដើមនៅថ្ងៃអាទិត្យនេះ

2015-10-21 20:38:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិ នឹងចាប់ផ្ដើមពីថ្ងៃទី២៥ រហូតដល់ថ្ងៃទី២៦ ខែតុលា ក្នុងខេត្តកែប។ ការប្រកួតឆ្នាំនេះ មានការចូលរួមពីកីឡាករ-កីឡាការិនី ១៥០នាក់ មកពី១២ សមាគម-ក្លឹបទូទាំងប្រទេសកម្ពុជា។

ការប្រកួតកីឡាទ្រីយ៉ាត្លុងនាពេលកន្លងមក

លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជាបានប្រាប់ Sabay ថា ការប្រកួតឆ្នាំនេះចែកចេញជា ៤វិញ្ញាសា។ វិញ្ញាសាទី១ គឺទ្រីយ៉ាត្លុងមិនកំណត់អាយុសម្រាប់បុរស ហែលទឹកចម្ងាយ ១,៥គីឡូម៉ែត្រ ជិះកង់(កង់គួក) ៤០គីឡូម៉ែត្រ និងរត់ ១០គីឡូម៉ែត្រ។ វិញ្ញាសាទី២ ឌូអាត្លុងមិនកំណត់អាយុសម្រាប់បុរស រត់ចម្ងាយ ៥គីឡូម៉ែត្រ ជិះកង់(ដៃត្រង់) ២០គីឡូម៉ែត្រ និងរត់ ២,៥គីឡូម៉ែត្រទៀត។

សម្រាប់វិញ្ញាសាទី៣ គឺអាគ័រត្លុងបុរសអាយុក្រោម ១៨ឆ្នាំ ហែលទឹក ២៥០ម៉ែត្រ និងរត់ ៥គីឡូម៉ែត្រ។ ចំពោះវិញ្ញាសាទី៤ អាគ័រត្លុងនារីអាយុក្រោម ១៨ឆ្នាំ ហែលទឹក ២៥០ម៉ែត្រ និងរត់ ៥គីឡូម៉ែត្រដូចគ្នានឹងវិញ្ញាសាទី៣។ ចំពោះប្រាក់រង្វាន់ មិនទាន់ដឹងច្បាស់នៅឡើយទេ ព្រោះជាការឧបត្ថម្ភទាំងស្រុងរបស់ក្រសួងអប់រំយុវជន និងកីឡា។

សមាគម-ក្លឹបទាំង ១២ដែលចូលរួមមាន អង្គការដើម្បីភាពញញឹមនៃកុមារ(១២នាក់), ក្លិបកង់តាខ្មៅ(៤នាក់), សាកលវិទ្យាល័យធនធានមនុស្ស(៦នាក់), អង្គការមិត្តសម្លាញ់(១៩នាក់), ក្លិបអនុវិទ្យាល័យ ហ៊ុន សែន តាខ្មៅ(១០នាក់), ក្លិបយុវជនភូមិឫស្សី(១៤នាក់), ក្លឹបទួលអំពិល(៨នាក់), ក្លិបក្រសួងមហាផ្ទៃ(៩នាក់), ក្លឹបអនុវិទ្យាល័យទួលស្លែង ១១នាក់, ក្លឹបឫទ្ធិសែន(១៦នាក់), ក្លិបវាសនាមានជ័យ(១៣នាក់) និងសាកលវិទ្យាល័យអាស៊ីអឺរ៉ុប(១០នាក់)។

នៅថ្ងៃសៅរ៍ទី២៤ ក្រុមកីឡាករ-កីឡាការិនីទាំងអស់ នឹងជួបជុំគ្នានៅភ្នំពេញ រួចចេញដំណើរទៅខេត្តកែប។ ថ្ងៃទី២៥ និង ២៦ គឺជាការប្រកួតផ្លូវការ ជ្រើសរើសជើងឯកថ្នាក់ជាតិ។ ថ្ងៃទី២៧ ក្រុមកីឡាករ-កីឡាការិនីទាំងអស់ នឹងធ្វើដំណើរមកភ្នំពេញវិញ៕

អត្ថបទ៖ គង់ វិសាល