ថតក្រៅឆាកឃើញតួដាច់ក្បាល ភាពយន្តខ្មែរមួយរត់ទៅក្រុងពាលីម្ដងទៀត

2015-11-10 20:36:25
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង “វិស្សមកាលមរណៈ” របស់ផលិតកម្មចក្រវាឡពេជ្រភាពយន្ត បានសម្រេចក្រុងពាលីរបស់ខ្លួនម្ដងទៀត បន្ទាប់ពីចាងហ្វាងផលិតកម្មថតតារាសម្ដែងនៅក្នុងរឿងនេះមួយចំនួនឃើញដាច់ក្បាល។

ពិធីក្រុងពាលីជាលើកទី២នេះ មិនមែនធ្វើនៅកន្លែងដដែលឡើយ ពោលគឺផលិតកម្មបានទៅធ្វើនៅលើកប៉ាល់ធំមួយ ស្ថិតក្នុងទឹកដី កោះឧកញ៉ាតី ជាទីដែលប្លង់មួយចំនួននៃសាច់រឿងត្រូវថតតែម្ដង។

ចាងហ្វាងផលិតកម្មបានប្រាប់ឲ្យដឹងថា កាលដែលថ្ងៃក្រុងពាលីដំបូងនៅឯស្នាក់ការផលិតកម្មនោះ អ្នកស្រីបានថត សកម្មភាពតារាសម្ដែងជាច្រើន ដោយនៅក្នុងនោះឃើញមានតារា២នាក់ មានរូបដាច់ក្បាលចេញពីគ្នា។

តារាសម្ដែង២នាក់ដែលត្រូវបាន ម្ចាស់ផលិតកម្ម ថតដោយទូរសព្ទដៃ iPhone 6 Plus ដាច់ក្បាលនោះ គឺជា គ្រូបង្រៀនក្បាច់គុនតែម្ដង ។ អ្នកស្រី ថុង ស៊ីវទៀង លើកឡើងថា ដោយសារតែឃើញមានអព្ហូតហេតុចម្លែកបែបនេះ អ្នកស្រីក៏បានទៅរកព្រះសង្ឃឲ្យទាយមើល ហើយលោកក៏បានបង្គាប់ឲ្យ ធ្វើពិធីក្រុងពាលីម្ដងទៀត ប្រសិនបើមិនធ្វើតាមទេនោះ ការថតនឹងជួបបញ្ហាច្រើនជាក់ជាមិនខាន។

ការធ្វើពិធីក្រុងពាលីជាលើកទី២លើកោះឧកញ៉ាតីកាលពីម្សិលមិញនេះ បានរៀបចំតាមការបង្គាប់របស់ព្រះសង្ឃទាំងអស់ ដោយនៅក្នុងនោះតម្លៃនៃគ្រឿងបដាទាំងអស់មានតម្លៃរាប់ពាន់ដុល្លារឯណោះ។ តារាសម្ដែងស្ទើរតែទាំងអស់ សុទ្ធតែបានទៅចូលរួមទាំងអស់។

រឿង “វិស្សមកាលមរណៈ” គឺជាខ្សែភាពយន្តមួយ និយាយពីការស្រាវជ្រាវរបស់សិស្សមួយក្រុម ដែលបានជួបឧបទ្ទវហេតុជាច្រើន លើកិច្ចការស្រាវជ្រាវរបស់ពួកគេ ដោយនៅក្នុងនោះ មានឈុតឆាកគ្រប់រសជាតិ រួមមាន ស្នេហា សើចសប្បាយ កម្សត់ និង ភ័យរន្ធត់ជាដើម។ ជាមួយគ្នានោះ ខ្សែភាពយន្តមួយនេះ ក៏បានបញ្ចូលក្បាច់គុនខ្មែរជាច្រើនប្រភេទផងដែរ ដោយតារាសម្ដែងទាំងអស់ សុទ្ធតែមានឈុតវ៉ៃប្រហារ ជាច្រើន។

តារាសម្ដែងនៅក្នុងរឿងនេះ មាន នី មុន្នីនាថ កញ្ញា យ៉ាដាវ អ្នកនាង ឆ័យលី ដាឡែន ថន លក្ខិណា នាងខ្ញុង ចាន់តារាទី លោក ថៃ ប៊ុនាង លោក ហម ឈរ៉ា លោក សាយ សៀរ៉ា និង សិល្បករសិល្បៈការិនី ជាច្រើនទៀត។រឿងមួយនេះ គឺជាវណ្ណកម្មទី២របស់ផលិតកម្ម “ចក្រវាឡពេជ្រភាពយន្ត” បន្ទាប់ពីផលិតកម្មមួយនេះ បានងាកមកថតខ្សែភាពយន្តឡើងវិញ ក្រោយពីបានផ្អាក ជាច្រើនឆ្នាំមក។ ស្នាដៃទី១របស់ផលិតកម្មមួយនេះមានចំណងជើងថា រឿង “ស្ទឹងស្នេហា” ថតចប់ជិត១ឆ្នាំមកហើយ គ្រោងចាក់នៅលើ ស្ថានីយទូរទស្សន៍ My TV ឆាប់ខាងមុខនេះ។

បន្ទាប់ពីបានធ្វើពិធីក្រុងពាលី តាមក្បួនខ្នាតបែបបទប្រពៃណីនេះឬយច អ្នកស្រី ថុង ស៊ីវទៀង សង្ឃឹមថា រឿង “វិស្សមកាលមរណៈ” នឹងដំណើរការថតដោយរលូន ហើយពេលចាក់បញ្ចាំងទៅ ច្បាស់ជាទទួលបានការគាំទ្រខ្លាំងជាក់ជាមិនខាន៕